|
2nd July, 2009
TAWAU: Mositi o sinakagon ngaavi tongomuhok do potounda tumoguvang tundoonok piohion pomuusoou toi minda om kosimbanon pososoihi di noikot sinikap montok mongiho kozo do pogun kotihombus pointindooi.
Pinoposoou i Puu Hintuun Koundan Pogun (Adun) Tanjung Batu, i Datuk Hajah Hamisa Samat doid dioho mooi do au maganu ahal diho do agaan tu savi avi kahantazan do pogun nopo nga atagak songkiop mato ontodonon do mogisusuvai tundoonok miaga do kokusutan pulitik, ikonomi om sosial di koimbuhai miampai ouhan.
Minoboos zosido do au kavasa o layat do ouhan miampai ahal ngaavi di au songkuo kopogovit kounalan, maso ko vinoun diti maso kozo sumimban om pigusaan montok maganu kahantazan nga maso pointihombus id savi avi kaganaan miampai au tumood.
“Id pomusaavan ku, tundoonok kumaa doid ‘kemerdekaan’ do baino diti nopo nga kivaa doid kavo trogumy. Songian o iso pomogunan diho do omungkang mantad ahal au koimau popovihou pombiian dino id doguhu, iho nopo nga okon ko ‘kemerdekaan’ di totopot.
“Songian o iso pomogunan diho do au koimau monguhun ‘hala tuju’ dino, sabap no sosoto mantad boogizan suvai om songian o layat do sansagan montok monoimo pomusaavan tuhun suvai, iho komozon ‘kemerdekaan’ do pomogunan nokomoi nopo nga totootopot noudu,” ka dosido.
Minoboos zosido diti di ontok pinopohombus pason id Kapanaadakan Tadau Puteri Islam Uvang Tawau 2009 id Mosogit Al-Kausar, Tawau do doiti di koniab.
Abaabazan diho nopo nga pinaanjul do Tinimungan Puteri Islam Uvang Tawau om Jakim Tawau. Vookon abaabazan di pinaanjul nhopo nga piboian kawad takod, piboian nsyid, forum, sipoot toukut ukut, magansak miampai aiso tapui, monupu bakaang pinataam, piboian monoodo brosur om piboian tudung.
Tumanud di Hamisa, Malaysia, i somok do 52 toun merdeka nopo nga nakahantoi minongunonom kobibasan mantad ahal manaak pomusaavan om monoodo ‘hala tuju’ sondii doid koponundaan pogun.
“Id proses diho, nakaanu pamantangan do vinoun o pogun diti . Nga montok popotindooiaha diho, mositi tokou do totootopot potounda om kivaa kagaganapan di poinggonop.
“Sindata di tindama nopo kozo do toihaan balajalan tu iho nopo nga kunsi kumaa doid inovasi, diplomasi di kivaza, pamalanan ikonomi di kikahantazan om panadaan struktur sosial di kivaza,” ka dosido.
Pinoposoou nogi i Hamisa doid sinakagon tongumuhok do okon ko ouhan montok do pogun mamahantoi gontob ikonomi di tapantod, tavakas om ontok ponogi diho, kahantoi manampaso do pisompuuvan tinau.
“Pointantu no do okon ko ouhan montok monimba miampai tuutulus do ula fizikal om sosial id iso pomogunan di poguhui dino komozon do nokotouvi, kumaa doid iso kuasa ikonomi pososoihi pogun di nadadi poombitanan kumaa doid pomogunan ngaavi tumunda om bontugon do pomogunan Kohisaon om Kotonobon.
“Kahantazan diho nopo nga au mikot sondii, sabahik dino, aantakan mantad asil pamalanan di topiodo om ponguhudan di noponu kabaahan mantad buuan pogun,” ka dosido.
Id ahal diti, ahansan i Hamisa doid Puteri Islam di sabaagi iso mantad popopobuu sinakagon tongomuhok do kaanu humaang id doguhu miampai mogovit modul di kinkounalan kumaa doid tinimungan tongomuhok id pototongkop pomogunan mooi do mungkakod izioho om kopiumana kokomoi katapatan di potounda poingandad id tumpu mikot.
Ka dosido, kopomuu’anan om toihaan balajalan nopo nga komponen di kiguno kozo doid kopoimbuhazan sinakagon di kikomauan om vinakas kalaja di kaanu monumbozo piohian global.
|
