|
2nd July, 2009
BEAUFORT: Apat tuhun nopujulan kiniopon doid duvo kinohigaganan talun alun misuvai id Membakut om Kuala Penyu di misosondopon tadau songkoniab.
Kinohigaganan talun alun koiso di naantakan id Kilometer 22 Beaufort, id Membakut nopo nga kopogompit iso lori trailer mantad Beaufort pakaazan id Kota Kinabalu, mokopidudu miampai iso kulita Proton Iswara mantad Kota Kinabalu pakaazan id Beaufort.
Kulita Proton Iswara di pinapanau do munggui i noihaan sabaagi Yaman bin Elling, 52, i poingkalaja id Koupisan Kalaja Tagazo (JKR) uvang Beaufort, nosunud no nokohivos pongigitan di maso papapanau id hivang nokomoi di kuang hobi jaam ko-6.00 minsosodop di songkoniab, nakasabap di kulita di pinapanau disido nokodudu do lori trailer nokomoi, i minogovit sinakai kalatas pakaazan id Kota Kinabalu.
Tumanud di Huguan Trafik Uvang, i C/Insp. Syahlan Sukimin di ontok tuubungo do magaganu abal, minoboos do munggui i id suang kulita Proton Iswara nokomoi, i pinapanau di Yaman nopo nga himo tuhun suvai do poinsakai, izioho nopo nga i Yaman sondii, i nopujulan kiniopon tuutulus id hivang kinaantakan kinopiduduan, naamot di songuhun po vagu nopujulan kiniopon nopo nga i Kasbudin bin Elling, 44, poingkalaja id Koupisan Vaig Uvang Beaufort, naamot di sinavaan di Kasbudin, i Surayati bte Ariffin nopo nga aiso kinosinduahan om songuhun po vagu tanak i nointutunan sabaagi do i Adam Ikhbal Kesbudin, i nogompit doid kinohigaganan nokomoi nopo nga nosinduahan om baino diti maso usapon id Hamin Pongusapan Queen Kota Kinabalu om songuhun po vagu minggui di natampasi doid kinaantakan nokomoi, i Isham bin Rosli , isido nopo nga tanak tobpinai di munggui.
Duuduvo do minggui di nopujulan kiniopon nopo nga novit id Hamin Pongusapan Beaufort montok pamazazakan ponoizukan, ka di Syahlan. Nosunud do noovit no minuhi o tinan di duuduvo mungggui di Kampung Selagun, Beaufort di kaadau koniab montok hosokon.
Naamot diho, id Kuala Penyu, songuhun papapanau motusaikol, nopujulan kiniopon, nointutunan sabaagi do i Marrof bin Haji Alias, 23, mantad Weston, songuhun tinau Brunei, i pinapapanau motusaikol nokolumpak do songuhun tanak di poinsakai bosikol id Kampung Kebunau.
Tanak diho i nointutuna sabaagi do i Maya bin Dahlan, 10, nga nopujulan nogi kiniopon doid kinohigaganan nokomoi.
Naamot diho, minoboos i C/Insp. Syahlan do kiis diho nopo nga maso doid ponoizukan do boogizan pulis, om minoboos vagu isido do mositi o savi avi momoguno talun alun do papapanau miampai oumohig om oingat songian id talun alun.
|
