|
2nd July, 2009
KUALA LUMPUR: Minoboos i Datuk Seri Najib Tun Razak do aiso atag toi pamalanan do kopolintaan do babaino diti montok popointutun pakej ransangan kotohu tu mimang o Malaysia do mongivad kozuzuvo asansagan kotoguvang deficit fiscal di takavas.
Minoboos i Huguan Montili do gisom baino diti, pinopointutun o kopolintaan do duvo pakej kobuuon toi ransangan soginumu RM67 bilion.
Najib, isido ponogi i Montili Kousinan, minoboos do pakej ransangan koduvo I kigatang od RM60 bilion, i pinotimpuun di Vuhan Kotohun toun diti nopo nga tinoodo montok koongkuban timpu duvo toun.
Pakej koiso di kigatang RM7 bilion nopo nga pinointutunan di Vuhan Koopod om Iso di toun nakatahib.
“Kinaman ku mongivad (montok popointutun) pakej ransangan kotohu. Iti nopo nga popoimbuhai koundunan (deficit fiscal di hobi kinavas) nung pointutunon dagai o pakej kotohu.”
“Nga nung kivaa lahan suvai, kaanu zikoi popobuu po vagu ikonomi dagai, kikoimaan zou poingukab montok mokinongou diho, nung pokionuon. Soihion dagai miampai poimatu o deficit fiscal,” ka disido doiti ponuubungan miampai CNBC, pionitan tilivison abal kousinan di pinosohimbou maza pionitan 518 Astro di kosuab koniab.
Suminimba isido tudizo kokomoi nung popointutun vagu o Malaysia do iso pakej ransangan kotohu nung ikonomi global om Malaysia do kotoguvang kokusutan ontok kohimpupuson toun diti.
Nung pointutunon o pakej kotohu, kousinan diho mositi aanu mantad id pasalan om okon ko manta akaun do kopolintaan, ka disido.
Ontok udizoo nung papaanjul ponoihian minsiibo, susuutonon dino do kosunizon ikonomi Malaysia, minoboos i Najib do iho nopo nga mozo kumaa do poingkuo o pakej ransangan diho do popokito kobuuon dino.
“Dadi nung popokito o pakej rangsangan diho do kobuuon di tavasi, apatut izikoi (Malaysia) id impoon montok humantoi doid 4.0 gisom 5.0 piatus miaga di pisosoomo dagai,” ka disido.
Id sapalu koduvo di toun diti ka disido, kaanu o ikonomi popokito koinsavaton kopoonjulan (pakej) diho om kousinan dino maso poboogizon.
“Otumbazaan zikoi do misosomok kohimpupuson toun diti om kohimpupuunom toun dumonto, apatu do kokito tokou pononduhian pointatap do ikonomi global. Ontok o ahal diho naantakan, id suang ningkokoton o Malaysia di hobi vinasi om nakaanu hobi pomuginavaan mantad papapaapu,” ka disido.
Suminimba tudizo do suvai, minoboos i Najib do aiso atag do kopolintaan montok papakaa id sompomogunan do ringgit tu kogompitan di kikoundunan. “Nakabalajal zikoi binalajalan di kopomodi mantad Kokusutan Kousinan Asia di 1997/98.”
Ka disido, aiso kopokionuan mnotok mimang diho (montok papakaa do ringgit id sompomogunan) tu ringgit do baino diti nopo nga kavasa poohonon id nomboo noopo.
Au zikoi mimang ‘manipulasi’ pasalan, Pohogoson o ringgit do mogium gatang totopot dino. Nadadi iho impoon dagai om popotindooi zikoi do impoon dagai,” ka disido.
Nukab o Rinngit id gontob 3.52, pibagahon do dolar AS di kosuab koniab, mantad 3.52 di songkoniab.
|
