|
1st July, 2009
SEMPORNA: Giatmara momoguno do koomungan lobi kogumu’ komulakan sabaagi koponilombusan do kopomuruanan di osonong montok monimbuat do bantug pogun sabaagi pogun di oulud, abantug om pantangon do pogun suai id pomogunan.
Montiri id Koupisan Boyoon Montiri i Datuk Nasir Tun Sakaran pinopointalang, sundung ababayan di poindalanon doid Giatmara sopisuai di kotinanan do suai nga’ kopokito ilo’ do kosuulan di kopotundaan pomusarahan montok poposimban do mogigiyon ksouul no tinimungan komulakan doid kaganaan komilaan id gontob di akawas.
“Iti nopo nga’ kopiongoi di rikoton kinoponuridangan do Kounsol Amanah Rakyat (Mara) i mongunsub, mangahak, momoluda’ om mongobi’ do Mamasok lolobi no id watas labus kakadayan do tumanud miampai lobi kaparagat doid ababayan pidagangan om porusahaan kumaa koponuridangan do mogigiyon mongungusaha’ Mamasok di asangal, kitoilaan om ogirot.
I Nasir i po nogi’ Puru Lintuhun Koundangan Pogun (Adun) Senallang, minoboros dilo’ ontok pinopoimagon do Pialaan Inovasi, Rekacipta om Gimik nayatan Giatmara pogun Sabah 2009, id Lintuhun Mogigiyon Semporna.
Nokotindapou po nogi’ i Monorina’ Giatmara Pogun Sabah i Fazal Baniamin, Mobi’ Upisor Watas Semporna i Abdullah Sukka, mobi’ Upisor Eksekutif Kounsol Watas Semporna, Lansanon Unit Komogoton Rayat (UPKR) Senallang i Tahir Amir, Luguan Watas Semporna OKK Musa Sabahani, Luguan Mogigiyon Cina’ watas Bubul i Datuk Chao Yan San om i Luguan Mogigiyon Cina’ Bandar Semporna i Ong Hang Seng.
Nokotindapou po nogi’ i mobi’ di Luguan Pulis Watas Semporna om tongo’ upisor koporintaan pogun nogi’ Pisompuruan.
Id pialaan dilo’, soginumu’ do 50 projik Inovasi, Rekacipta om onom gimik mantad onom zon di pinonongkialaan.
Kalansanan di Nasir o tongo’ projik om winonsoi dilo’ aanu popointanga’ om ponongkitondingan kumaa nayatan di lobi kakawas i potilombus dino sabaagi pangadangan kumaa di mingluluda’ Giatmara do mongimbulai om popoinggayo komilaan diolo’.
Suai mantad dilo’, ka disio maya’ do projik dilo’ kaanu po nogi’ o Giatmara do poposuni sunduan piuludan doid tongo’ komulakan i katanud dilo’ om kopotungag do iso’ tinimungan mogigiyon komulakan i osuau.
Kohondot dilo’, pinointalang disio do suai ko’ pinggisaman montok mongimbulai kosuulan do kopotundaan kopomuruanan kotinanan nogi’ momoluda’ tinimungan komulakan sabaagi tutumungkus do kopomuruanan pogun.
Giatmara Pogun Sabah tinuridong di toun 1993 maya’ kinoponuridangan do Giatmara Kota Belud sabaagi Longkod Giatmara di kumoiso’ om minaganu mingluluda’ kumoinsan di tulan Koiso’ toun di miagal om talib dino sinusuhut do Giatmara Kudat, Keningau om Kota Kinabalu.
Potimpuun di toun 2004, Giatmara Kota Kinabalu nonuan tinonggungan sabaagi longkod koponorinaan Giatmara pogun Sabah om kiupis doid Linimput Likas Plaza.
Gisom baino’ diti Sabah pasanganu do 22 tinan Longkod Giatmara i potorina’ poinponu’ doid poliliput pogun.
|
