|
1st July, 2009
KOTA KINABALU: Lalansanon Koonduan parti komponen Barisan Nasional (BN) Sabah kiguno do tumilombus sumili do ponokotorigi id kopoinggiratan kokitanan om sokodung rayat kohondot do koporintaan babaino’.
Ponorikohon Koonduan BN Sabah i Senator Datuk Armani Mahiruddin, minoboros do montok mamagampot rikoton dilo’, koinsanai bohogian kiguno minggisom manamong om poposuni pisompuruan sompipi’ tiso’ om tiso’.
Tumanud disio, sabaagi songinan parti tosuul pogun i kirikod pomorintaan tosonong, kosuul montok toinsanan bohogian do amu’ kalawong gisom kopomolihu di laang popogirot do nindikohon di haro mantad.
“Iso’ ahal i kiguno onuan kopomodulian do koinsanai bohogian nopo nga’ parti komponen kakal pasanganu pamanahon om kopoburuan pulitik di anaru.
“Sabab pogi’ dilo’ do kakal tokou kiharo tinonggungan tagayo id kopoinggiratan do pisompuruan om poporonit di nuludan tokou montok papatantu’ do aiso’ tulun suai i monowoli dati’ sabaagi parti momorinta’,” ka disio.
Minoboros isio dilo’ katalib minonorikohon Mitingan Kumoinsan Luguan-Luguan Koonduan Barisan Nasional Sabah do hiti di konihab.
Nokotindapou po nogi’ i Timbang Luguan Koonduan Sabah Datuk Azizah Mohd Dun, Monunurat Koonduan BN Sabah i Datuk Jainab Ahmad (Umno), Datuk Agnes Shim (MCA), Datin Jamilah Sulaiman (PBS), Rosnie Manain (PBRS), Datin Noami Chong (LDP), Ambalzkee A/P Perumal (MIC) om i Dr. Jaina Sintin (UPKO).
Id mitingan dilo’, Koonduan BN Sabah papaharo do duo ababayan ilo’ nopo nga’ Jalinan Mesra kumaa id onom zon doid Sabah om bondira’ bobos tanaru Jalur Gemilang kopihondot do Wulan Komordikaan.
Pikikiro do pohimogonon di Boyoon Montiri Sabah i Datuk Seri Musa Aman id Padang Merdeka do ko 11tw Kawalu’ obontol i kopogompit do tangaanak tadika posorili’ kakadayan Kota Kinabalu om Dewan Bandaraya Kota Kinabalu (DBKK).
Pinokianu po nogi’ o koinsanai kopomuruanan Koonduan BN Sabah do tumilombus kumaraja’ ogoris poposili BN sabaagi sumpili’ poinbida’ do raayat id pomilian om katalib o pomilian tagayo pogun.
Ka wagu disio, nunu-nunu kobolingkahangan toi kokusutan apatut salasaion miampai id saalom maya’ do pogibabarasan.
Naamot dino, kopointalangan di poingukab kiguno do ilagon montok mongilag do kopomurilong di tongo’ puru om mononokodung.
“Sasabab do parti komponen mongobi’ ogumu’ bohogian, amu’ tokou koidu’ mantad pogisusuaian do karalano’ karaja’, apatut tokou do mongingkuri’ pigogutan sompipi’ sondiri’.
“Iti nopo nga’ mongilag do opongonuan kosiwatan di parti pembangkang i orohian kokito tokou do olomog,” ka disio kawagu.
Minongimbayat nogi’ isio do kopomuginawaan di koinsanai lalansanon Koonduan BN do manahak sokodung poinponu’ kumaa angkab 1Malaysia i pinointutunan di Luguan Montiri Datuk Seri Najib Tun Razak sabab ilo’ nopo nga’ osonong kumaa koporintaan pisompuruan i poburuon do BN solinaid diti.
|
