|
1st July, 2009
KOTA KINABALU: Kivaa hobi 600 uvang i oungib poindoos do talun alun i noihaan kozo do kikobohingkangan id Sabah ontok diti, i momoguno do kiginumu kuang hobi RM920 lizong montok monguhand ino.
Kumoduvo Potunud Koupisan Kalaja Pindahanan (JKR) Sabah, Amrullah Kamal minoboos ginumu dino pinopoompit do 517 i poimbihiu poindoos talun alun id siibo kotoinaan kopolintaan pogun om 130 vagu poindoos talun alun id siibo kotoinaan kopolintaan hongkod.
Sundung i do ingkaa tumanud disido koozuzuvo di ungib ngavi dino tomoimo intangan om ontok timpu dimiaga kalaja ngavi mongumbasi tongoungib dino notoodo no id piipio tampat.
“Nakapaatod no izikoi do upalai montok koonuan kapambalazan. Ginumu dino RM920 lizong dino nopo nga poguntaban babaino,” ka disido kuminaa magaganu abal kahapas tuminindapou do lamai kopomoiganan seminar kasaavan koumohigan ungib id doiti di koniab.
Minoboos isido sakadai montok angkab dino nga aanu mantad tozibut taabo-abpo songian gunoon, mantad dino tumanud disido ahal kokomoi balanja dino toinaon do soosongian nopo.
Minoboos i Amirullah dino ontok minonugut ginumu balanja dino I pinoboos do potunud JKR Sabah Ir John Anthony id suang pasondisido id lamai kopomoiganan seminar diti.
John Anthony id suang pason disido nga pinopohombus hinomi id suang pongintangan om koponoinaan ungib sabaagi iso mantad nontodonon kantakan tana opiang sundung tu katatadaai miampai kapanadaan dino tuminanud do pinonuuan.
Naamot dino Potunud Takavas Laan Injiniol Ungib JKR Datuk Prof Ir Ashaari Mohamad minoboos kotundaan pogun i nobobo mantad po duvo gontob nakatahib nontodonon do ogumu uvang tana noukab, i tuutulus nontodonon do koinsavat kopokionuan kumaa kotundaan id tana takavas.
“Id lahan au potihombus, kotundaan miaga diti kopoinsavat koozuzuvot ana opiang id suang pogun. Tumanud luputan kinantakan tana nopiang mantad toun 1973 gisom 2007, pogun nokotoguvang kinolugian i pisosomo RM2.55 bilion nontodonon do koozuzuvo diti,” ka disido.
Minoboos isido Laan Injiniol Ungib id siibo Komontilian Kalaja Pindahanan sinuu papanau koponoizukan Panan Hongkod Ungib Nasional montok monoina tana nopiang miampai ungib, om palan dino nopongo no timpuunon toun diti.
Vozoon Montili Datuk Seri Musa Aman id suang pason disido ontok pinopoimaton do seminar dino pinoposoou saviavi upisol i kogompit mooi do miingat-ingat id suang papasga palan kotundaan om monimbang saviavi boogizan kogompit koumohigan.
Seminar di koniab notindapou do kuang hobi 90 monongkibai i mantad upisol ngavi mantad mogisusuvai koupisan om agensi i kogompit.
Ino kiangkab mongintong saviavi boogizan kalati kokomoi nontodonon do kinantakan tana nopiang, miampai haang ngavi i mositi do onuon montok modihin dino.
Sabah nopihi sabaagi tampat koduvo seminar dino kahapas Sarawak saasabap no do ino nopo nga iso mantad pogun i nokoponuat ginumu kinantakan tana nopiang i takavas id suang pogun saasabap no do boogizan koozuzuvo pogun i kinuhu.
|
