|
30th June, 2009
TAWAU: Kaganaan kopomowotuan om tinunturu’ aanu do popokomosil okon nopo ko’ id suang pogun nga’ kumaa labus pogun, ka di Puru Lintuhun Koundangan Pogun (Adun) Tanjung Batu i Datuk Hamisa Samat.
Ka disio, kaganaan dilo’ doid pogun diti iso’ i alaid no do pinoindalan om binuru’ lolobi no kopio id kokompungan sabaagi iso’ mantad ponunuang timpu osimbayan.
Minoboros isio do id timpu diti, pinggisaman dilo’ nosili do iso’ pomorunan di nointutunan doid mogigiyon kampung id pinggisaman mongingkawas po do nindopuan diolo’.
Ka disio kawagu, seni tinunturu’ nakaanu pamaramit tosonong okon nopo ko’ tulun minsosongulun nga’ nogi’ mantad koporintaan.
“Id ahal diti potilombus koporintaan do poposodia’ poruntukan kumaa di nombo-nombo mongungusaha’ i orohian tumabung doid kaganaan ngaawi’ diti,” ka disio.
Minoboros isio dilo’ ontok pinopoimagon do Bingkil Komilaan Tinunturu’ Mamawatu Mengkuang id Gerakan Desa Wawasan (GDW) Merotai, doros hiti.
Ababayan nopo dilo’ nga’ pinaanjur do Yayasan Sabah Zon Tisan Kosilahon Koributan.
Kikiro do 20 tutumanud i nosompipi’ mantad koonduan id Kampung Merotai Besar tuminanud do bingkil nokomoi.
Ka di Hamisa, kopolobusan do kakamot tinunturu’ miampai komosil maya’ pomogunaan tiknologi kawawagu kopomonu’ di kororohian toinsanan tulun, i potuu montok kogugunaan potitikid tadau toi ko’ maan do ponginlulumis id walai diolo’.
“Pinggisaman diti aanu mongingkawas maya’ komilaan sompopori id sunduk sinonong, linumis do buru’, kororohian di momoguno i mositi’ no do posuulon,” ka disio.
Pinokianu po nogi’ disio o tongo’ komulakan do minsingilo kaganaan kopomowotuan om tinunturu’ tu’ kogumuan di tumabung do kaganaan dilo’ nopo nga’ koonduan om tulun nongolohing.
“Amu’ tokou mimang do seni kopomowotuan diti atalup sundung timpu babaino’ ogumu’ i momoguno do misin do mamawatu,” ka disio kawagu.
|
