|
|
|
Azim (kaapat vanan), upisol om puu pulis miampai do koumatan monoodod o VCD om DVD hinimu i nagamu di Tadau Koiso.
|
30th June, 2009
SEMPORNA: Nakapagaau o pulis piipio koumatan monoina VCD om DVD hinimu moniip kigatang do RM20,000 di minsusuvab Tadau Koiso.
Mantad no do sogu tuhun ginumuan, iso tinimungan pulis i hinuguan di Insp. Aripa Changgi minonungod do iso hamin aiso numbul id Kampung Air somok doiti, di kuang hobi jam ko 12.15 minsusuvab.
Huguan Pulis Uvang DSP Mohd Azim Khan pinopointahang kinantakan dino ontok notuubungan do magaganu abal New Sabah Times, dikoniab.
“Nakapanaan o pulis di natandasan kinoizonon kiumul do 39 toun noihaan do monoodod o VCD om DVD hinimu id suang hamin dino ontok pinonugkuan,” ka di Azim.
Vookon koumatan i nagamu kaampai no apat set komputer, 300 VCD om 20 DVDi nopongo no minoniip miampai mogisusuvai ngaan do filem.
Minonimba iso tudizo, minoboos i Azim iti nopo nga kinantakan koinso mogohimu moniip nosogu id Semporna mantad po timpuunon toun diti.
Mamason isido tuhun ginumuan mooi do au gumompit id suang abaabazan mogohimu moniip i humasa do undang-undang.
I natandasan taanon id siibo Seksyen 18 (4)(a) Akta Panaasan Filem 2002 montok monuhung koponoizukan sumusuut.
“Mongintong o pulis saviavi abaabazan kahasaan tavagat id kakadazan, kampung om uvang poinsokid id suang uvang diti do soosongian nopo,” ka di Azim.
Mamason isido kotohuadan kumaa tuhun ginumuan i minaak sokodung om kopoihaan kokomoi kahasaan tavagat id uvang diti.
|
