|
30th June, 2009
PENAMPANG: Nakapagaau o pulis 5.6gm syabu pisosoomo kigatang hobi RM1,000 mantad songuhun kinoizonon i noihaan sabaagi do papatazad dadah di Tadau Minggu.
Huguan Pulis Uvang DSP Madang Usat pinopoiho magaganu abal id suang iso pitimbungakan abal di koniab.
Iso tinimungan puu pulis narkotik mantad IPD Penampang minonoodo pinomolisaan tinan kumaa songuhun di natandasan i kiumul piahatan 30an i okito id suang koozuzuvo kotootongob.
“Puu ku maamaso papanau pomolisaan id uvang pongindopuan Towering songian nokopisoomo di natandasan id suang koozuzuvo kotootongob om minonoodo do pinomolisaan kumaa disido,” ka di Madang.
Nokosoomo o pulis duvo plastik kituluan uha-uha om 18 plastik toniini kisuang do songintinduug do oniting kikotumbazaan do syabu mantad di natandasan.
Minonimba iso tudizo, minoboos i Madang pinonoizukan pinopokito do i natandasan papanau do abaabazan kapatazadan dadah id lahan misosonguhun om okon ko puu kumaa noonombo papatazad dadah.
“Dadah i nagamu nopo nga padagangon id uvang Penampang,” ka di Madang.
Minoboos isido do tomoimo o pulis mongintong abaabazan kapatazadan dadah om kapadagangan dadah id uvang toitom i noihaan kozo do soosongian nopo.
I natandasan babaino tinaan naamot id siibo Seksyen 117 Kanun Abaabazan Kahasaan Tavagat (KAJ) montok monuhung koponoizukan id siibo Seksyen 39A (1) Akta Dadah Kohigaganan 1952.
|
