Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Caretaker gets 20-year jail term for sexual offence against two boys |  Murder: March 24 date for prison wardens, senior officer |  Christian set to spearhead Sabah’s gold medal quest |  Perfect getaway at beautiful Ulu Look Lungsung Beach |  250 participants vie for top honours at Borneo Hospitality Challenge |  JPKA mogium mohoingon toi walis songuhun bagang |  Sakadai RM260 lizong montok mongumbasi sikul nakahaid id Sabah |  Kapanadaan ikoton polinta montok kovosian layat potihombuson |  Learning beyond textbooks: An enriching field trip for IMU Chinese Medicine students |  RM260 million for repair of 67 dilapidated schools in Sabah this year |  Malaysia's economy to grow within 3.2 to 4.2 pct, fiscal deficit expands |  Kejuruteraan Asastera secures RM19.78 mln project in Desa ParkCity |  Neurogine, UMSKAL team up to groom financial services talent |  Kejayaan kelulusan 100 peratus sekolah menengah wajar dipertahan: Mohd Arifin |  JPKA cari waris bayi lelaki | 
 Kadazan Dusun

37 kiis pomodungan id talian nosuat id Labuan

29th November, 2018

Di JAINUDIN DJIMIN

LABUAN: Pulis Labuan nokoponuat kiginumu 37 kiis kahasaan tavagat momoduung id talian pinopoompit kolugian kiginumu RM1,329,110 poompus toun 2018.

Kumoduvo Huguan Pulis Uvang Tana Pisompuuvan Labuan, DSP Mohd Ghani Mohd Ibrahim minoboos, mantad ginumu dino 3 kiis noop nga African Scam pinopoompit kolugian RM404,350.00, 2 kiis Macam Scam miampai kolugian RM207,880.00 om 32 kiis pinopoompit pomohizan balang mazaa internet miampai ginumu kolugian kihoogo RM716,880.00.

“Kiis kavavagu nantakan di kavavagu diti pinopoompit duvo koonduan kinoizonon noduung mazaa Macau Scam pinopoompit kolugian RM208.00 om African Scam/ Love Scam pinopoompit kolugian RM376,100,” ka disido id suang iso pitimbungakan abal id upis disido, id doiti di koniab.

Minoboos isido, kiis koiso nantakan di ko 8 Vuhan Koopod om Iso nakatahib pinopoompit songuhun koonduan aiso kalaja kiumul 49 toun i nolugi kiginumu RM208,000 kahapas noduung di natandasan kaaka dino kiva tutang kad kredit miampai iso bank id hongkod Kuala Lumpur.

“Ontok timpu dimiaga i natandasan nga pinopoiho di nogompitan do nokogompit id abaabazan koposimbanan usin aiso kasagaan om saviavi usin di pinoposogu mositi poundohion id iso akaun montok soizukon,” ka disido.

I natandasan nga tuminuubung di pinoposogu momoguno talian i no devoid momoguno numubl tolifaun balai pulsi om upis SPRM i kaaka dino usin di kiva id suang akaun disido nopo nga asil abaabazan aiso kasagaan i mositi soizukon.

Montok angkab dino i natandasan pinokianu monoodo pambalazan di pinatantu mazaa misin ATM bank i pinatantu om i pinoposogu nga sinuu papataam saviavi lisin transaksi kosuangan usin id suang akaun.

Montok kis koduvo minoboos i Mohd Ghani, kinantakan ontok di ko 22 Vuhan Koopod om Iso nakatahib, songuhun pakalaja polinta tondu, 39 toun noduung mazaa African Scam/ Lover Scam pinopoompit kolugian kiginumu RM376,000.

Id suang kiis diti, i pinoposogu nokopintutun miampai di natandasan mantad po sombuhan nakatahib mazaa laman Facebook i pinopointutun di natandasan songuhun popotuhud kapal id iso komponi podtuhudan Kanada.

Id suang timpu pintutunan dino i natandasan pinopoiho papaatod vava kumaa di pinoposogu usin kiginumu 500,000 USD, perfume, balang kihoogo om ogumu po balang suvai sabaagi vava pintutunan dioho.

“Kahapas dino i pinoposogu notuubungan do mogohimu popoiho vava di pinaatod di natandasan tinaan do boogizan Kastam miampai minanaak saasabap i pinokilim dino kisuang do usin 500,000 USD miampai balang kihoogo om i pinoposogu pinokianu monoodo pambalazan sukai kumaa boogizan Kastam mazaa piipio akaun i tinaak montok papahabus balang pinaatod dino,” ka disido.

Sundung i do ingkaa ka disido, kahapas minonoodo pambalazan i pinoposogu noundonok di natandasan montok au popoiho kumaa isai-isai om i pinoposogu gokomon tu atandasan kogompit id suang abaabazan koposimbanan usin aiso kasagaan nung au kahantoi monoodo pambalazan.

Id suang kinantakan diti i natandasan minomoguno vahu numbul akaun di misuvai. Duuduvo kiis diti soizukon tumanud Seksyen 420 Kanun Koponinduahan.

Mamason isido kumaa tuhun ginumuan hoohobi nokozo tinau koonduan mooi hobi miingat-ingat nung kivaa tuhun ngaavi di nakatantu kuminam mokianu nuununu kopoihaan akaun, numbul kad kointutunan om numbul kad kredit miampai papaatod kad ATM toi ko mogohos akaun kad ATM.

Id suang kobuuon suvai, pulis Labuan nakagakom songuhun kusai kinoizonon, 50, tu nokogompit id suang kapadagangan numbul 4D aiso kasagaan id iso kadai kupi id Jalan Tamu.

Ka disido, i natandasan nagakom di Tadau Koduvo kuang hobi jam ko 6 minsosodopon do iso tinimungan upisol om puu pulis mantad Boogizan Koponoizukan Kahasaan Tavagat IPD Labuan.

“Asil pinomolisaan pulis id meja makan tampat nikoon di natandasan nokosoomo iso tolifaun piovit-ovit id suang galeri dino kiva 35 keping gambar kalatas nosuatan numbul aiso kasagaan om usin RM40 asil kinadagangan numbul,’ ka disido.

Pinomolisaan id tinan nga tinoodo om nokosoomo usin RM1,082 id suang poizazanan usin di natandasan asil kinapadagangan numbul.

I natandasan baino tinaan kihinaid do tohu tadau kotimpuun di koniab om soizukon tumanud Seksyen 4A(a) Akta Hamin Judi Poingukab 1953 om nung kotompit kahasaan oukum danda au okuang RM20,000 om tolungku au katahib himo toun.

Nokotindapou nogi id pitimbungakan media Huguan Ponohinuan/Kalaja Boogizan Koponoizukan Kahasaan Tavagat (JSJ), ASP Yahya Apandi om Upisol Monoizuk Insp Liza George Mokunjil.

   
Email Print