Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
20 foreign owned tour companies operating in Sabah |  SESB for takeover? |  Team Malaysia dominate ladies golf tournament |  Three Sabahans for national trials |  Sabah Eagles take cautious approach in title challenge |  Bigger Christmas celebration this year |  Kumoduvo polosiden UPKO nopihi Puu Dewan Pogun |  Isuzu Malaysia treats loyal customers in gala night |  Hilton to introduce new brands |  Timber export value to decline |  103 pelajar UMS sertai Aktiviti Ekonomi dan Pola Guna tanah pinggir pantai anjuran FKSW |  Sizam pongkimamaan popoinsavat tangangazan kalaja polinta |  Fatahanne dinobatkan 'New Star malaysia' melalui pertandingan NKTS |  DBP galak pembangunan sastera melalui pengiktirafan |  Nahas jalan: Lelaki patah paha, kaki kanan akibat tersepit dalam kenderaan | 
 Kadazan Dusun

Pinibatosan i poinsurat doid ‘Batu Sumpah’ kiguno tonudon

140918asembirai

14th September, 2018

Di MARUTIN ANSIUNG

KENINGAU: Pinibatosan rayat Sabah om lansanon koporintaan Longkod i nokosurat doid Batu Sumpah Keningau kiguno tonudon do po’ompus timpu om okon ko’ simbayagon.

Pinosotol ilo’ di songulun bagas mongiingia’ i Adin Basinau i nakatanud do pinopoudong Batu Sumpah Keningau di ko 31tw Kowalu’ 1964.

Ka disio, Batu Sumpah Keningau pinoudong nosusuhut di kinoponuridongan Malaysia di toun 1963. Tumanud i Adin i babaino’ diti mongigit karaja’ Mongobi’ Luguan Tanak Mamasok Pogun (WKAN), kinopoudongan do Batu Sumpah dilo’ sabab no, di timpuunon ii’ lansanon nabantug id Keningau di ontok dilo’ i OKK Sodomon Kina amu’ kaakun do mamung Malaysia sabab orosian oidu’ o kopotutan rayat Sabah suai ko’ tumongob kotumbayaan tinaru id Sabah kosuul no id Poonsokid oumpadan.

Poingkuro po ka disio, tohuri nopo nga’ nakaakun i OKK Sodomon soira’ impiipiro ponongkibarasai di lalansanon koporintaan Longkod kaampai no i Tunku Abdul Rahman om i Tun Abdul Razak.

“Rundingan tohuri no pinaharo doid walai tagayo di OKK Sodomon hinombo di ontok dilo’ i Tun Abdul Razak sondiri’ minooi ruba’ di OKK Sodomon,” ka di Adin.

Id pinirundingan dilo’ ka disio, haro kosudongan tosuul miagal di poinsurat id Batu Sumpah Keningau i kakal poimagon gisom do babaino’ diti i pinotoguang di OKK Sodomon kuminaa di Tun Abdul Razak.

“Kosudongan no ilo’ i nokoowit do kinopoudongan Batu Sumpah Keningau i rinangkat mantad Senagang om pinoimagon di Montiri Buruh di ontok dilo’ i Tan Sri Manickavasagam,” ka di Adin soira’ rinubaan di maso kinopoundolihan do Batu Sumpah Keningau mantad luan Upis Watas Keningau kuminaa id watas Muzium Warisan do hiti di tadau Minggu’ katatalib.

I Adin i kiumur nogi’ do 18 toun di ontok pinoudong o Batu Sumpah Keningau pinopoilo, ontok kinopoudongan dilo’ soginumu’ do 21 tayam pinolubuk ilo’ nopo nga’ turu’ karabou, turu’ wogok om turu’ manuk kombura’ i tinanggayan do rinait i kisuang do taru pibatosan.

“Rinait dilo’ pinoindalan di turu’ Bobolian mantad Poonsokid i nabantug di ontok dilo’ wookon nopo nga’ gisom di sinorou ku i Tobidong Binti Kandimau (tiagak), Kulim (tiagak) om i Muri Kulim (kakal do babaino’).

“Bobolian ngaawi’ di suai amu’ ku no ahandaman ngaran nga’ ontok dilo’ haro Bobolian mantad Apin-Apin om nogi’ mantad tinaru Murut mantad Pensiangan, Tenom om Kemabong,” ka di Adin pinoposusui.

Kokomoi do boros ‘Kerajaan Malaysia Jamin’ i komoyon do nidu’ mantad ‘plak’ di maso kinopoundolihan kumoinsan do Batu Sumpah Keningau dilo’ mantad luan Upis Watas Keningau (laid) pinakaya’an doid Upis Watas Keningau di wagu, ka di Adin kiguno do pogulion ilo’.

“Di pogulu haro o boros dilo’ (Kerajaan Malaysia Jamin) nga’ asio’ nodii do baino’, om pokionuon tokou do pogulion ilo’,” ka disio pinoposotol.

Nuhot nung haro kinoponohuban di batos id watu sumpah dilo’, amu’ di Adin olimon do haro nga’ kakal do okoro’.

“Kalansanan tokou, koponohuban di agayo amu’ aantakan sabab kopomidsala’ ilo’ disaisai i manahub do pinibatosan i poinsurat doid watu sumpah dilo’,” ka disio.

I nopo kalasanan tokou do babaino’ ka di Adin, lansanon koporintaan Longkod mananud do pinibatosan watu sumpah om ingkaa po nogi’ o lansanon om rayat pogun Sabah.

   
Email Print
   
 
 
E-browse