Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
20 foreign owned tour companies operating in Sabah |  SESB for takeover? |  Team Malaysia dominate ladies golf tournament |  Three Sabahans for national trials |  Sabah Eagles take cautious approach in title challenge |  Bigger Christmas celebration this year |  Kumoduvo polosiden UPKO nopihi Puu Dewan Pogun |  Isuzu Malaysia treats loyal customers in gala night |  Hilton to introduce new brands |  Timber export value to decline |  103 pelajar UMS sertai Aktiviti Ekonomi dan Pola Guna tanah pinggir pantai anjuran FKSW |  Sizam pongkimamaan popoinsavat tangangazan kalaja polinta |  Fatahanne dinobatkan 'New Star malaysia' melalui pertandingan NKTS |  DBP galak pembangunan sastera melalui pengiktirafan |  Nahas jalan: Lelaki patah paha, kaki kanan akibat tersepit dalam kenderaan | 
 Kadazan Dusun

Mogiigiyon KRT kiguno toririmo popogirot pisompuruan

7th September, 2018

MOGIIGIYON id toisoiso’ kinoiyonon kiguno toririmo sopipantang om sopisokodung.

Ilo’ nopo nga’ mooi do koyuon i noubasanan doid koposion do babaino’ diti amu’ atalup sundung pia kotoguang do kinoinwoguan koyuuyuon pomogunan.

Ahal dilo’ pinounsub di Upisor Pisompuruan Watas Kota Belud i Bisi Jamit di ontok pinoimagon Ababayan Sodop Ambang Merdeka 2018 nayatan Watas Rukun Tetangga (KRT) Taman Nikmat Kota Belud di kaawagu diti.

Ka disio, mogiigiyon ngaawi’ kiguno po nogi’d o poposuul piisaan id nayatan diolo’ montok papatantu’ do nubasanan mamaamasi id mogiigiyon toririmo do poinggompi’.

“Amu’ momuntuk do kinotuohon, tinaru toi ko’ ugama’, nung ogompi’ no o pisompuruan om piupakatan tantu’ no do ogompi’ o koyuuyuon tosonong id kopooposion dilo’,” ka disio pinoposotol.

Minoboros nogi’ isio do mantad karalano’ dilo’, rayat orurukut tinaru id pomogunon diti kaanu masi otoronong om oulud.

Kopoluhuban sunduan ‘patriotisme’

Nokopogulu i Ponorikoon KRT Taman Nikmat Mahamudin Mohd Onon pinopoilo do nosili noubasanan diolo’ id taman pomuwalaian nokomoi do poposindak kapamaramaian Tadau Kabansaan potitikid toun.

Ka disio, mogisusuai ababayan noulud diolo’ ponuang dilo’ i kituduan popoluhub sunduan patriotisme (mongupus pogun) id nayatan mogiigiyon do hilo’.

“Mimang tokou do poposuul di korohian om iman-imanon do sukod wagu i po nogi’ nosili kaantaban tagayo do babaino’. “Oilaan atokou do karaaralano’ koposion tangaanak woguan babaino’ diti okon nodii ko’ miagal di pogulu, kohondot dilo’, kapabantaan kumaa ‘Jiran Muda’ om kosuulon mamarati Tadau Kabansaan kiguno powonsoion okon nopo ko’ kotinanan palajaran nga nogi’ tinan okon koporintaan (NGO). “Mogiigiyon amu’ kasaga’ do papatalahan tonggungan dilo’ kumaa nodi bohogian atantu’,” ka disio pinopointalang. Pinosotol disio do mantad haro ababayan miagal dilo’ do kaanu yolo’ monongkiromut amu’ momuntuk umur om kopongimbulai do koyuon di oulud, mogipapantang nogi’ koponigampot pisompuruan doid mogiigiyon,” ka disio.

Mogisusuai pinapanau

Wookon do ababayan pinoindalan kaampai no pinialaan suminding loyou patriotik i naampai di 10 tutumanud kapaampai di tongo’ Jiran Muda om nadang di juri naalap io’ Zainal Abidin Ahmad dii Rahim Sahili Wahit.

Id pinialaan dilo’, i Zaza Jamri nosili bontugan, Alessandra (koduo) om nokoindikau taang kotolu i Ilyana Sazlin. Pinoindalan nogi’ pinilaan sipak raga i nalantoi do tiim Harapan Juara, sinusuhut do tiim Daras id taang koduo om kotolu nopo nga’ tiim Tepak Bubur.

Naamot dilo’, montok ababayan ‘Street Soccer’ nalantoi ilo’ do tiim Geng Karas, koduo Thirty7 FC om kotolu, Urusetia FC.

Montok pinialaan momowotik Tadau Kabansaan nopo nga’ nalantoi di Rauah Reati Ramli o bontugan, Siti Zulaikha Rajin (koduo) om kotolu nopo nga’ i Nur Sumayyah Sharul Nizam.

Pinotunui po nogi’ o Gaa’ Pemain Berbakat Sepak Takraw kuminaa di Afiq Awang om i Faiz Adis, naamot Gaa’ Pinotomod kopihondot Tadau Kabansaan pinagaa’an kumaa di Zul Aslan Jaslin sabaagi ‘Jiran Muda Contoh’ nayatan KRT Taman Nikmat.

Id kinoompokon do ababayan dilo’, pinapalahat yolo’ do ‘Merdeka’ do intolu pinoguluanan do loyou ‘Negaraku’ om ‘Sabah Tanah Air Ku’.

Nokotindapou nogi’ i Asran Suin, Monunurat KRT Taman Nikmat Abel Mustapha, Luguan Monorina’ Jiran Koonduan i Nuatu Adsad, Luguan Monorina’ Jiran Muda i Zakaria Jamlin, Ponorikohon KRT Hospital Kota Belud i Fadli om Puru Komitikuasa’ Takawas KRT Taman Nikmat.

   
Email Print
   
 
 
E-browse