Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
20 foreign owned tour companies operating in Sabah |  SESB for takeover? |  Team Malaysia dominate ladies golf tournament |  Three Sabahans for national trials |  Sabah Eagles take cautious approach in title challenge |  Bigger Christmas celebration this year |  Kumoduvo polosiden UPKO nopihi Puu Dewan Pogun |  Isuzu Malaysia treats loyal customers in gala night |  Hilton to introduce new brands |  Timber export value to decline |  103 pelajar UMS sertai Aktiviti Ekonomi dan Pola Guna tanah pinggir pantai anjuran FKSW |  Sizam pongkimamaan popoinsavat tangangazan kalaja polinta |  Fatahanne dinobatkan 'New Star malaysia' melalui pertandingan NKTS |  DBP galak pembangunan sastera melalui pengiktirafan |  Nahas jalan: Lelaki patah paha, kaki kanan akibat tersepit dalam kenderaan | 
 Kadazan Dusun

UPKO Ranau tumilombus popoburu’ kopotutan om koundaran Kadazan Dusun Murut

6th September, 2018

RANAU: Kotinanan Pasok Momogun Kadazan Dusun Murut Bersatu (UPKO) Bohogian Ranau tumilombus do mogowit di kopotutan om kosuulon do mogiigiyon Kadazan Dusun Murut kumaa koporintaan babaino’.

I Luguan Bohogian parti dilo’ do hiti i Datuk Dr Ewon Ebin minoboros, sabaagi kotinanan i mongobi’ do tinaru Kadazan Dusun Murut, UPKO mositi’ katama’ popoburu’ kopotutan diolo’ kaampai no mokianu di koporintaan babaino’ diti do monuluk di nakabatos id pinomilian tagayo pogun (PRU) di katatalib.

“Sundung UPKO poingampai do koporintaan pogun momorinta’, kiguno tokou do abalangas popolombus toisoiso’ ahal i kapaamai do kopotutan rayat Sabah miagal do kopoindalanan MA63 (Pibatosan Malaysia 1963),” ka disio.

Minoboros isio do soira’ haro ahal nokoimbulai kokomoi koporojistoran Modidikot Aiso’ Kasagaan (PTI) silihon mogiigiyon pointatap om kaanu kad kointutunan, ginaga’ do rayat o ahal dilo’ maya’ do UPKO.

Montok manalasai kotongoban kokomoi ahal dilo’, UPKO tumilombus mokianu mooi do kad kointutunan id Sabah gayaton kawagu om alanan di kad kointutunan pinotomod montok nopo do rayat Sabah, ka disio kawagu.

I Ewon i po nogi’ bagas Puru Parlimen Ranau minoboros dilo’ id Mitingan Tagayo Tritahunan (MAT) UPKO Ranau ko-15 i pinoimagon di Ponowoli UPKO Datuk Seri Wilfred Madius Tangau id Lintuhun Mogiigiyon Ranau di kaawagu diti.

Minongomi di kinopotingkodan Molohingon Kampung om Ponorikohon Komitikuasa’ Koburuon om Koumoligan Kampung (JKKK), pinokianu di Ewon koponuangan karaja’ dilo’ do undion om okon ko’ koposilihan pulitik di puru Warisan toi Pakatan Harapan nopo.

Id ahal kopongiduan geran komunal kumaa garan minsosongulun do koporintaan pogun, pinokianu di Ewon i Madius do papaatag kumaa koporintaan mooi do koponukatan lot-lot tana’ powonsoiyon tosikap sabab ogumu’ ilo’. Pinosotol nogi’ disio do kopoburuan UPKO kakal do kosudong di angkab do rayat kosuul no mogiigiyon Kadazan Dusun Murut sabab parti dilo’ toririmo mongobi’ di kopotutan om koundaran diolo’.

Poingkuro po ka disio, kopoburuan ngaawi’ dilo’ momoguno pisompuruan di toinsanan puru miampai momolihu di pigogutan sabalik dino monginggirot do pihunungan.

Id pinomilian AJK doid mitingan nokomoi, i Ewon kakal mongigit karaja’ Luguan Bohogian UPKO Ranau soira’ nakalantoi amu’ tinanding om i Japirin Sahadi sinili sabaagi Kumoduo Luguan Bohogian soira’ aiso’ tuminanding.

Karaja’ Ponorikohon Pointatap nalantoi di Sualim Gopog, kumoduo i Maharin Mahali om io’ Aliyu Zinin dii Joseph Asir sabaagi timbang luguan bohogian.

Luguan Tinimungan Komulakan nopo nga’ i Jackson Musidan uhupan di Eldy Yakin (kumoduo) om Luguan Koonduan i Colesta Sigam nogi’ i Maslah Rumpado (kumoduo).

10 AJK Bohogian kapaampai dii Japari Yadam, Masiton Daransun, Awang Shari Jumat, Simon Gindalu, Yakimin Baranting, Lajius Yunsik, Sopikin Bondiwai, Walimin Suruk, Julis Yabi om i Hawili Lamin.

Nokotindapou nogi’ id kinopoimaganan mitingan dilo’ i mobi’ rayat Paginatan Datuk Abidin Madingkir, Luguan Pemanta Pemilihan Datuk Matius Sator om lalansanon UPKO nokoiyonon.-Di JIMMY AKAU

   
Email Print
   
 
 
E-browse