Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Opposition walkout mere play-acting – Dr M |  Anifah, Khairy and Rosman stand their ground |  Party atmosphere at UMS Stadium |  Sabahan Yee breezes to victory |  PPKK tomoimo popotounda kosivatan kumaa di songintindooi ngaavi: Rosman |  MESEJ NUANGAN VINASI I KOSUDONG KAANDAK LAYAT |  Limkokwing University churned out 10,000 graduates worldwide |  UMS hosts Early Childhood Music Level II |  Honda New HR-V now in Malaysia |  Business as usual for Tealive stores |  Priceworth log harvests jump 247 pct in June |  Maspah: Majlis tahunan pelengkap permuafakatan Kampung Bua' Pintasan |  Kaedah bertaraf dunia bagi P&P tingkatkan kemahiran guru muzik |  UMS terima Anugerah Universiti Awam Bebas Denggi 2018 |  Beri peluang penghuni penjara: Rosman | 
 Leisure

Aura Montoria ‘The Hidden Wonders of Sayap’

12th July, 2018

Di MARRYAN RAZAN

AURA MONTORIA miampai ‘tageline’ toi pongintutunan ‘The Hidden Wonders of Sayap’ (Kinolumison Poinlisok id Sayap), iso’ mantad di 38 totombuluion labus kakadayan kapaampai balajaran (Edu Tourism) poinsumpak id Kampung Sayap, Kota Belud, do babaino’ diti nointutunan nodii okon nop oko’ id nayatan tutumombului nokoiyonon nga’ mantad sompogunan.

I Ponorikohon Komitikuasa’ Takawas Ponombuluyan Kampung Sayap Kota Belud i Ezara Sadok pinopoilo do Aura Montoria kiikiro 24 kilometer mantad kakadayan Kota Belud poinsumpak id guas Nulu Nabalu pinotunda’ sondiri’ di tongo’ mogiigiyon kampung id sahau do Eko Edu Tourism kampung nokomoi.

“Pointonod nopointutunan di toun 2017, Aura Montoria do babaino’ diti nakaramit somok 1,000 tutumombului nokoiyonon om sompogunan.

“Kinoiyonon diti koimbayat kopio mantad no di kinolumison wawaya’an id gouton, pasanangu lokos id suang do luang (gua), gua pungit, Gua Mulut, bunga Raflesia om nogi’ liwogu otomou,” ka disio.

Di timpuunon, ngaran ‘Aura Montoria’ diti ointutunan no do ‘Montoria’ nga’ noputand o ‘Aura’ di songulun profesor mantad Univositi Malaysia Sabah (UMS) i Jakaria Dasan i nolulumisan di kinolumison om kosuusuayan kinouluuludon kowotuan id watas dilo’.

Sinodu’ koinsanai do Trail Aura Montoria kiikiro turu’ kilometer. Tongo’ tutumombului kawaya’ do 17 ‘check point’ wookon nopo nga’ i ointutunan do Tangga Seribu Aura Montoria, Sulap di Aki Adam, Watu Mondou, Gua Mulut, Waig Minorol, Gua Wongking, Liogu Ourod, Gua Pungit, Wasai Montoria om nogi’ Liwogu Otomou (Lubuk Hijau).

Suai ko’ Aura Montoria, Edu Tourism Kampung Sayap pasanganu lobi10 homestay (songkoduonon) om 26 sinusuulap tutumombului. Wookon kosuusuayan id Kampung Sayap nopo nga’ kinoiyonon do kampung dilo’ id guas do Nulu Nabalu, haro siam baang tagayo, lokos om nogi’ Nulu Minotuhan.

Kokomoi do ababayan Mini Estate Sejahtera (MESEJ) Ponombuluyan Desa, ababayan kaawagu i pinointutunan do Komontirian Kopotundaan Labus Kakadayan (KPLB), ka di Ezra osonong ilo’ montok monguhup mogiigyon kampung popoburu’ po do ponombuluyan labus kakadayan.

“Monongkounsikou yahai sabab i pinatahak dahai nokosuang no doid ababayan komontirian om Kampung Sayap nointutunan sabaagi projik pongimpuun do kopoindalanan ababayan MESEJ Ponombuluyan Labus Kakadayan.

“Kampung Sayap pasanganu kosiwatan tagayo do poburuon sabaagi longkod ponombuluyan labus kakadayan. Kalansanan ku maya’ koponguhupan om sokodung do KPLB, mangangahak tutumombului id kampung diti nga’ ookunan,” ka disio.

Minoboros isio kinopomilian kampung dilo’ montok ababayan nokomoi tantu’ no do koposindak kopotundaan id po’ompus waya’an pakaya’an id kampung nokomoi.

“Kopotundaan ponombuluyan Kampung Sayap miampai amu’ mitilombus kopongingkawas po do kopotundaan id sunduk kogoogonopan id toinsanan kampung di otoliban,” ka disio.

Edu Tourism SK Sayap

Nosusuhut di pinogibaabarasan do mogihum pomusarahan mamawaal songinan sulap i aanu silihon do asil ponombuluyan kikoyuon balajaran di toun 2016, Sikul Tosiriba’ (SK) Sayap Kota Belud minongulud laang om nakalantoi pinoposurat ngaran sabaagi sikul labus kakadayan kumoiso’ id pomogunan diti pinopoindalan Ababayan Ponombuluyan Momoguno Balajaran (Edu Tourism).

Sikul dilo’ i poinsumpak kiikiro 20 kilometer mantad kakadayan Kota Belud om misampaping do watas Taman-Taman Sabah, do babaino’ nokoimbayat kinorikotan rinibuan tutumombului saalom om labus pogun.

Koinsanai diti mantad no di pininggisoman di Koisaan Molohing om Mongiingia’ (PIBG) nogi’ sokodung di Ewon Benedick, pogulu po disio nosili Puru Lintuhun Koundangan Pogun (Adun) Kadamaian.

Wookon koimbayat i haro id sikul dilo’ nopo nga’ onom tinan sulap palajaran kaampai songinan sulap potimburulu, i kopokito do walai koubasanan mogigiyon Kadazandusun.

Monorina’ ababayan dilo’ i Boniface Jiran pinopoilo do Edu Tourism sikul dilo’ nopo nga’ wookon asil ponombuluyan id sahau Ponombuluyan Kampung Sayap pinoindalan do Komitikuasa’ Takawas Ponombuluyan kampung nokomoi. “Unsikohon ku pinggisoman do KPLB pinopointutun ababayan MESEJ Ponombuluyan Labus Kakadayan om otumbayaan oku maya’ do ababayan diti, Edu Tourism SK Sayap aanu do popoburu’ po kopio.

“Okito ku kinoburuon tosonong id pomorunan ponombuluyan labus kakadayan id pogun diti i kooowit koburuon id sunduk suai miagal do ralan kampung,” ka disio i minoboros do kinoponginsonongan ralan kampung labus kakadayan koowit kosimbanon tagayo kumaa pomorunan ponombuluyan labus kakadayan.

Minoboros isio do wookon koundaran i aanu mantad kinopoindalanan Edu Tourism nopo nga’ kinoinsawaton do naangayan akademik di tongo’ susumikul.

“I nopo kopoondos dahai katalib nokoimpuun ababayan diti nga’ kinalantaion minonigampot ‘Sifar Linus’. Susumikul komilo mambasa’, monurat, mongintong om momusorou.

“Suai ko ilo’, nokounsub nogi ilo’ do susumikul id pilumaagan doid Boros Inggiris, sabab ogumu’ tutumombului sompogunan migal do Jipun om England i korikot doid SK Sayap,” ka disio.

Naamot dino, mongiingia’ SK Sayap i Kingfier Missin minongunsikou kumaa di Ewon (i babaino’ diti Adun Kadamaian) i po nogi’ Montiri Kopotundaan Labus Kakadayan sabab pinopotoluod do songinan LCD om ‘projektor’ i gunoon kopio do sikul nokomoi suai ko’ toluod ‘touch point’ soginumu’ RM5,000 montok kopotundaan ponombuluyan Kampung Sayaop.

“Sikul diti momoguno kopio do LCD loolobi no id Makmal Komputer pongolon di LDC om projektor di alaid noguno, koduo nopo nga’ sikul dahai nopo nga’ minonimpuun do Ponombuluyan Palajaran.

“Monongkotumbayaan yahai do kinosonongon kapawaladan tongo’ susumikul oinsonongan suai ko’ gambar toi video aanu popokito montok kopokitonan do kokiikitanai kopio kampung om SK Sayap momoguno kakamot wagu diti,” ka disio kawagu.

Ontok minoboros id ababayan Ramai Kaamatan om Tadau Tagayo Aidilfitri id Kampung Sayap di kaawagu diti, kalansanan di Ewon ababayan Edu Tourism sikul dilo’ kosili turianan di sikul suai id pogun diti montok poposili sikul diolo’ sabaagi longkod kalantaion i kopongimbulai intodonon kousinan sondiri’.

“Iti nopo nga’ kosili iso’ po pongimbayat kumaa Kampung Sayap i babaino’ diti nointutunan sabaagi wokon totombuluyon labus kakadayan kapaampai gouton, nuluhon, baang om kinolumsion sandad posorili’,” ka disio. Monongkoondos nogi’ isio di laang do SK Sayap minanahak kosiwatan kumaa susumikul sikul dilo’ do pinopointalang kokomoi longkod ngaawi’ ponombuluyan id Kampung Sayap.

“Minogisoosowoli yolo’ pinapatahak kopointalangan toniiba’ kumaa doho’ kokomoi di potitikid pongimbayat ponombuluyan om kotorinaan pinosodia’ nogi’ naangayan kaawagu do Eko Edu Tourism Kampung Sayap.

“Iti nopo nga’ ahal di amu’ ku insan kosimgapatai id sikul tosiriba’ di laid. Kalansanan ku do kotilombus yolo’ do kalantoi. Ponokotanda’ kosokodungan kumaa kopotundaan ponombuluyan id kampung diti, pinapatahak oku do poruntukan kopogulu soginumu’ do RM5,000.

“Kalansananku kounsub ilo’ di mogiigiyon kampung do tumilombus minggisom om kumaraja’ sabaagi iso’ tiim popoburu’ po do ponombuluyan id kampung diti,” ka disio.

   
Email Print
   
 
 
E-browse