Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
13 anggota parlimen kerajaan belum isytihar harta: SPRM |  Teach students to hate corruption, says Lee |  'Tackling encroachments first priority' |  Chinese New Year Dragon, Unicorn and Lion Dance Festival Jan 19 |  Sikul Minbuul Sabah ii tiudongon id suang timpu tosomok |  Puu antisusuap Sabah tiudongon papavakas ababazan humavan susuap |  Galoh-Galoh gergasi simbolik perasmian Pesta Kubis |  Ketua PKR Sabah dijangka diputuskan pada 11 Dis ini |  Anwar antara 13 Anggota Parlimen belum isytihar harta |  Percutian enam sekeluarga bertukar tragedi |  Jawatankuasa Anti Rasuah Sabah bakal ditubuh perhebat perangi rasuah |  Delayed SMK Kipouvo construction may start next year |  Sabah PKR may see leadership change – Anwar |  Sabah to set up committee to fight corruption |  13 govt MPs yet to declare assets – MACC | 
 Kadazan Dusun

Talun-alun kininaru 2KM id Kadamaian pongimpuun pomogunaan gata’

100718_rubber-colour

10th July, 2018

Di MARRYAN RAZAN

KOTA KINABALU: Komontirian Kopotundaan Labus Kakadayan (KPLB) minomili’ do Ralan Taginambur – Kampung Tambulaung – Kampung Podos, Kota Belud id watas Lintuhun Koundangan Pogun (DUN) Kadamaian sabaagi projik pongimpuun talun-alun momoguno tiknologi kaawagu kapaampai kopomogunaan gata’ (Rubberised Road).

Montiri dilo’ i Ewon Benedick lumansan do projik kininaru 2 kilometer (KM) dilo’ aanu monimpuun do toun tiso’.

“KPLB papaharo pibarasan teknikal lobi kosorisid kokomoi ahal diti miampai do Kotinanan Gata’ Malaysia (LGM), Koupisan Karaja’ Tagayo (JKR), Kotinanan Pomorunan Gata’ Sabah (LIGS), do talib diti om lumansan projik diti aanu popoindalan do toun dumontol.

“LGM kaakun montok projik pongimpuun koponginsonongan ralan labus kakadayan id watas Kadamaian, hinombo do wookon kos koponginsonongan sakadaion do LGM id sahau Ababayan Ponolidikan om Kopotundaan (R&D) om intangan do JKR ilo’ id sunduk teknikal, naamot LIGS mintong id sunduk kapangabaan do kogoogonopan,” ka disio.

Minoboros isio dilo’ id kapahabaran meia katalib minokinongou Kopointalangan Pinotomod mantad di Luguan Potunud LGM Dr Zairossani Mohd Nor kumaa KPLB Sabah, JKR Saabh, LIGS om Upis Watas Kota Belud id Pisuk Mitingan KPLB do hiti, konihab.

Nokotindapou nogi’ i Monunurat Pointatap Komontirian i Abu Bakar Abdul Latif, Upisor Watas Kota Belud Abd. Gari Itam, mongongobi’ mantad JKR om LIGS.

Ka di Ewon, kopointalangan nopo dilo’ nga’ montok popointutun do tiknologi Rubberised Road id koponginsonongan ralan labus kakadayan id Sabah kaampai no mintok kopikiikiraan momoguno tiknologi dilo’ id koponginsonongan ralan tagayo doid pogun diti.

“Suai mantad dilo’, kopomogunaan tiknologi diti kopongimbulai tokou do iso’ kopomogunaan po’ompus do gata’ om kalansanan do koowit koinsawaton gatang,” ka disio.

Ka disio kawagu, KPLB pinopoburu’ do kopomogunaan gata’ id kapamansaian talun-alun sabab ilo’ nopo nga’ wookon mantad di koponginsonongan ababayan koponoibahan komosikinan do komontirian dilo’.

“KPLB Sabah pasanganu do 16 kabun Mini Estate Sejahtera (MESEJ) Pananaman Gata’ om lobi 40,000 tulun poingampai doid ababayan e-Kasih i kiguno tokou do uhupan om hinadapan noribu kawagu momumukabun tokoro’ gata’ id labus kakadayan i lumansan kopongobian tokou.

“Ilo’ no do pinapaharo tokou kopointalangan diti om pilot projik id Sabah mooi do kapanahak pongunsuban om angkab kumaa rayat do koporintaan wagu maganu laang montok popoingkawas gatang gata’ potilombus dino koponginsonong ralan labus kakadayan id pogun diti,” ka disio.

Nuhot nung pomorunaan tiknologi diti kopogkikit do kos kapamansaian talun-alun, ka di Ewon, id sunduk koponginsonongan, kopogkikit ilo’ do kos nung pitopongon nodi kapamansaian noubasanan.

“Tumanud di nawaawaya’an do LGM id Semenanjung Malaysia, haro ralan i nowonsoi duo gisom tolu toun talib dilo’ nga’ amu’ po naraag gisom baino’. Iti nopo nga’ nokopokito do pomogunaan tiknologi Rubberised Road lobi kokikit id sunduk kopongundaran.

“Suai mantad dilo’ okito tokou nogi’ kopogkikitan id sunduk kapatahakan tusin toi koponguhupan kumaa tongo’ momumukabun tokoro’ gata’. Tusin di patahakon kumaa momumukabun tokoro’ gata’ dilo’ aanu alanan kumaa tiknologi diti mooi do haro kopomogunaan po’ompus pangaba’ gata’ id pomorunan pamansaian talun-alun, potilombus dino gatang gata’ di lobi kosonong. Iti po nga’ iso’ kopogkikitan,” ka disio kawagu.

Naamot dilo’ i Dr Zairossani minoboros do wookon kosonongon ralan i momoguno gata’ pinokodou nopo nga’ kopongingkawas kinatahanon do ralan mantad kababakon, kotuohon, linamou om nogi’ kopongimpian do tuni.

“Suai ko ilo’, kopongingkuri’ nogi’ do kos koponginsonongan id timpu di anaru suai ko’ kapanahak kosimbayanan kumaa momoguno ralan nung piiradon di pomogunaan ralan noubasanan.

“Okito tokou id Sabah ogumu’ padsakaian awagat, mantad dilo’ momoguno tokou do ralan di lobi kogirot om mantad pomogunaan tiknologi diti kalansanan tokou do kopongingkawas ilo’ do sinonong om kinatahanon ralan id pogun diti,” ka disio.

Minoboros isio do LGM miampai kosokodungan JKR minomonsoi ralan minomoguno gata’ kininaru 77KM di koompokon toun 2014 id somok koinsanai pogun doid Semenanjung Malaysia ilo’ nopo nga’ Pahang, Kelantan, Perak, Negeri Sembilan, Johor om Melaka.

“Id Melaka, okon nopo ko’ ralan i winonsoi nga’ kinapamansaian do tutubpoon kapal minomoguno nogi’ tiknologi diti. Minomonsoi tokou do ralan kumoiso’ momoguno tiknologi diti id Kota Tinggi, Johor di koompokon toun 2014 om gisom baino’ aiso’ po pinongundaran. Mongiikiro tokou kinatahanon ralan momoguno tiknologi diti aanu monginaru,” ka disio.

Id sunduk koponginsonongan ka di Dr Zairossani, talun-alun kiguno lopisan kawagu id suang timpu apat gisom limo toun tumanud di pomogunaan do ralan dilo’.

“Nga’ momoguno do tiknologi Rubberised Road, koponginaru tokou timpu dilo id pialatan walu’ gisom 10 toun,” ka disio.

Pomogunan suai i momoguno tiknologi miagal nopo nga’ Thailand om Indonesia, i kogumuan diolo’ momoguno do ‘Latex’ nga’ id Malaysia momoguno kantalan gata’.

   
Email Print
   
 
 
E-browse