|
7th June, 2018
KOTA KINABALU: songuhun panakadai montili minongunsub do kopolintaan pogun Sabah di koniab do popointahang ‘solita totopot’ kumaa ginumuan kogompit kinaantakan toi tragedy ‘Double Six’ i pinopoundun kiniopon di vozoon montili di ontok dino, Tun Muhammad Fuad Stephens om nogi 10 po vagu i poinsakai do kapal tumuhud GAF Nomad Air, di 1976.
Panakadai Montili id Koupisan Vozoon Montili, Jimmy Wong, minoboos do tuhun ginumuan kumaandak mongiho solita totopot kinaantakan i naantakan di ontok ko 6 vuhan Koonom 1976 id Sembulan diho.
“Kogumuan do layat kakaal mimboos kokomoi kinaantakan talaat kapal tumuhud nokomoi om nogi mositi koiho solita di totopot dino,” ka disido kuminaa doid monunuat abal di kahapas abaabazan kasaavan kinaantakan id Monumen Double Six id Sembulan, doiti di koniab.
Monument diho tinuidong sabaagi kasaavan kinapatazon do buuan koiso Sabah om nogi i songinsakai do suvai id kinaantakan nokomoi i naantakan ontok kapal tumuhud dino id kotuhudan kumaa Kota Kinabalu mantad Labuan, poguhui do naatu id Sembulan, om pinopoundun kiniopon savi avi di songinsakai om nogi tanak kapal.
Di kavavagu diti, iso tinan okon kopolintaan minokianu do mooi o pinonoizukan tosoinig kinaantakan talaat diho i nopongo di ontok ko 28 vuhan Koopod 1976, do pointahangon kumaa ginumuan.
Di poguhui diho, abaabazan pinotimpuun miampai tafakur sohinaid sominit sinusuut miampai popovihiu bininduugan bunga i binuu’an di Wong om puu paganakan do munggui.
Sinavaan di Tongotiagak Mohammad Fuad, Toh Puan Rahimah Stephens nga potindapou nogi.
Naamot diho, minoboos i Wong do monument nokomoi kosudong dodizo kinoizonon pamagazat tutumombuhui do mooi o momimiombo kaanu mongiho hobi inahom kokomoi do kinaantakan.
“Ahansan zou nogi do momimiombo i mikot do doiti manaak pamantangan kumaa do bontugan dagai,” ka disido. -Bernama
|
