Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
We are not traitors, says ex-youth chief |  Labourer accused of stealing RM400 had throat slit |  Promising start for Sabah junior shuttlers |  Peter is new Safa Supremo |  Potihombuson sunduvan guminavo pogun – Shafie |  KD Mahawangsa TLDM pinongimbayat Tadau Poingukab Mawilla 2 |  LHDN Sabah nokopouhu RM7.5 maya’ PKPS gisom ko 10tw Kohopod |  Attaining certain qualities critically needed for youth to face educational challenges |  DoubleVerify provides fraud filtering solution for advertisers globally |  MITI, MIDA, Intel hold IoT forum to review progress |  Pelajar Universiti hilang langgar pantang larang di Sabah |  Ewon: Lebih RM1.8j dividen dibayar 774 peserta Ladang PPRT Tongod |  Program pemutihan PATI tidak akan dilakukan kerap, kata Mohd Azis |  Masyarakat manfaat Hari Kapal Terbuka di MAWILLA |  Kes kematian pekerja ladang, polis giat kesan suspek | 
 Kadazan Dusun

Joniston kosudong poimogonon do ‘Tama Kotombuhuzan Kiulu’

170418-kiulu

17th April, 2018

Di ARTHUR EDWARD

TUARAN: Kiulu, i id kinoizonon poinsomok do puun Konuhuan Croker, maso kozo ointutunan sabaagi hongkod ekokotombuhuzan habus kakadazan id Sabah, hobi no do tapanazan minggakit id bavang.

Kogumuan mogiigizon i notuubungan minoboos do i Ponikoon Kotinanan Kotombuhuzan Sabah (STB), Datuk Joniston Bangkuai, monoguvang kalaja kiguno doid hobi po kobuuon do kotombuhuzan id Kiulu, hobi no do kotundaan kotombuhuzan i maso kozo opulokis do pahaabon id kinoizonon kampung pososoihi.

Lasmin Lopog, 42, minoboos do tumanud mogisuusuvai pimpaagatan i pinapanau di Joniston, montok popobuu ekokotombuhuzan om kotombuhuzan habus kakadazan diti, kosudong kozo isido do poimogonon sabaagi Tama Kotombuhuzan Kiulu.

“Okito tokou pinggisoman disido (Joniston) nopo nga mongumbangan montok popobuu ekonomi do mogiigizon habus kakadazan, hobi no id Kiulu.

“Kotundaan komtombuhuzan id Kiulu nakapanaak kosivatan kumaa mogiigizon posoihi montok tobungon om mimpaagat kozo id pomounan habus kakadazan i pointantu no kopoingsavat po vagu do ningkokoton ikonomi do mogiigizon kampung,” ka disido kuminaa Bernama.

Lasmin, isido ponogi sanganu do hongkod kotombuhuzan ‘Kondis Point Kiulu’ i id kinoizonon kiikila 2 kilometer mantad kakadazan tonini Kiulu, minoboos do tuminimpuun isido tuminabung kaganaan kotombuhuzan di 2014 di songian kokito mogisuusuvai pinggisoman i pinapanau di Joniston montok mongunsub do mogiigizon posoihi monunda kotombuhuzan id kinoizonon tososondii.

Naamot di Unus Limun, 43, mantad Kampung Lokub, Kiulu, minoboos do au isido minamagabas kosivatan montok tumanud kaganaan kotombuhuzan tu ogumu pininggisoman di pinapanau do kopolintaan montok popoingkavas kaganaan diti do doiti.

“Tuminindapou zou do piipio boos boson nazu do STB id Kiulu…om asil dino, nakaanu zou pomusaavan montok mongukab hongkod kotombuhuzan id Kampung Lokub, i nointutunan sabaagi ‘Oniting Camp’. Pinoimagon iho di Joniston, kopiondot Vuhan Tumombuhui Kiulu di vuhan Kaapat toun nakatahib.

“Ogumu abaabazan miho papanaon id Oniting Camp, kaampai no kiim, sumuok pias, om modtuongis miampai paganakan miaga do mimpodu id bavang id hongkod kotombuhuzan nokomoi,” ka disido.

Minoboos isido do mimang koontok kozo doid di Joniston komozon sabaagi Tama Kotombuhuzan Kiulu, tu tomoimo izido minggisom montok popopulokis pomounan diho id uvang Kiulu, i baino kivaa kiikila 50,000 tuhun mogiigizon.

“Kiulu di poguhui diti mimang do nointutunan miampai abaabazan bavang tohosog, poingkuo po nga mantad di kadadi hahansanon layat di kahapas pomihian tagazo ko-13 (PRU13), minogovit i Joniston, mogisuusuvai abaabazan miaga do abaabazan ‘tagal’, inap desa i baino minamadadi do Kiulu vookon toongozon pihi kotombuhuzan habus kakadazan id Sabah,” ka disido.

Minoboos i Unus do piipio kinoizonon id Kiumul baino tomoimo nadadi gondoon do momimiombo miaga do id Kampung Malangang, Rangalau Lama, Poturidong, Gamut om nogi piipio kinoizonon id Ulu Kiulu, iho nopo nga Kampung Mantob, Sinorut om Kamung Pinagon Baru.

Polosidin Koisaan Kotombuhuzan Kiulu, Dr Edmon Guntis, minoboos do sakadai di Joniston kuminaa kotundaan kotombuhuzan id uvang Kiulu mimang do au miho ohimon.

Minoboos isido do vookon dino nopo nga pinopointutun abaabazan Vuhan Tumombuhui Kiulu, i ponogi nokosuang id ‘takwin’ kotombuhuzan Sabah.

“Suvai diho, Kiulu nga nopihi nogi sabaagi ponimpuun do tudon kotundaan ekokotombuhuzan habus kakadazan miaga i pinoboos di Vozoon Montili Sabah, Tan Sri Musa Aman, di ontok pinapabantang Bajet Pogun Sabah 2018, di toun nakatahib,” ka disido.

Minoboos i Edmon, do montok popopulokis po vagu do pomounan kotombuhuzan do doiho, abaabazan ‘Cabaran Pengembaraan Kiulu’ i vookon dino popoimbuhai abaabazan panangkusan om mimbosikol sumusui Bavang Kiulu om nogi vaig tohosog do pinointutun.

Miampai sokodung do STB om nogi Koisaan Kotombuhuzan Kiulu, abaabazan diti nopo nga vookon pinggisoman do kopolintaan pogun montok papalaku kotombuhuzan habus kakadazan id pogun diti, hobi no montok mamadadi do Kiulu sabaagi tiikoton do tutumombuhui habus kakadazan i koiso,” ka disido.

Ka disido, ogumu pimpaagatan di pinapanau montok monunda do kaganaan ekokotombuhuzan Kiulu, okito do nakahantoi, songian o koikatan momimiombo id uvang tonini diho nokoinsavat kuminaa 53,000 di toun nakatahib, pibagahon do kivaa no 27,000 momimiombo di 2016. -Bernama

   
Email Print
   
 
 
E-browse