|
|
|
KISABAP DO MUNSIKOU...Adun Moyog, i Donald Peter Mojuntin miampai Yong popokito kad kointutunan MyKad dosido i pinovuhai do JPN.
|
10th October, 2008
KOTA KINABALU: Nopupusan nodii o kotongoban ginavo doid di Yong Lee Hua, 78, mantad Penampang di kahapas nakaambit do kad kointutunan MyKad dosido, i ponogi pinopoimagon dosido sabaagi tuhun momogun pogun Malaysia.
Nonuan zosido miampai do kad kointutunan Malaysia di poimagon id upis doKopisan Kopolijistohan Pogun (JPN) Sabah, di koniab. Minananud dosido do minogongoi do MyKad diho nopo nga tanak kusai dosido, i Frankie om i Jonathan Foo.
“Iti nopo timpu do tounsikou nokozo doid dogo tu nakaanu zou mahik do kopotutan sabaagi tuhun momogun do pogun diti. Poingkuo po nga mokiiho zou do nunu kinaantakan do sistom di gunoon dotokou do doiti, di songian zou nakaanu diho do tohu no minit o timpu.
“Di ontok katagakai zou do kad kointutunan ku haid di hobi sontoun nakatahib, minaganu timpu o JPN do noikot hinaid montok proses do upalai ku. Nga nunu kinaantaka talaat diho nopo nga di ontok pogongoi zou diho, tinadaan zou do miampai kad kointutunan taagang,” ka disido.
Kipononsohan i Yong miampai au kaadasan do koupisan nokomoi do monoina upalai dosido, minoboos do kinapanaakan dosido do kad kointutunan taagang diho, minamagabas dosido do ningkokoton tuhun momogun.
Ka dosido, kaantakan diho au daa adadi tu di ontok pongupalai zosido do MyKad, pinatanud dosido o dahin totopot do kad kointutunan haid id upalai dosido.
Aiso do nuununu di kosivavo id dokumen di pinatanud, ka dosido, miampai minoboos vagu do nung okon ko tuhun momogun Malaysia zosido, nookuo tu kavasa zosido do mongundi di ontok pomihian tagazo do popovuhai noopo do lisin papapanau kulita.
“Totopot dino, ngaan ku po nga kakaal poinsuang id nuhudan pongundian, i pointopot do popoimagon do ningkokoton ku do tuhun momogun.
Poingkuo po nga monongkotohuod om mongunsikou zou do kopolintaan doid haang tosikap montok minonguhan do ahal diti,” ka di Yong.
|
