Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Pelajar antara ditangkap kerana dadah |  Yayasan Tzu Chi perlu RM1.7j untuk bina bangunan Pusat Hemodialisis |  Gagal perjuangkan MA63 menerusi Umno, BN sebab keluar parti: Anifah |  Sabah divers a class above the rest |  Andre smashes triple jump record |  Notorius siblings arrested for multi break-ins |  27 Vietnamese fishermen charged |  Form 4 student among 22 druggies caught |  World Wellness Weekend 2018 at Suria Sabah this weekend |  Unduk Ngadau om Ratu Fesyen Sinakagon Baung |  Kouangan duvo kapal monoizuk TLDM, papantod panamangan pitakasan kohisaon |  SPRM papahabus nuzudan kopomoiganan harta buuan polinta kotimpuun ko 1 Vuhan Koopod |  Extra RM10m boost for YSG education fund |  43,565 to sit for UPSR examination |  Free CPR training on Sept 23 at Imago | 
 Kadazan Dusun

MOGISUSUVAI PAMBALAI PINOTOUNDA POLINTA MONTOK POMOUNAN KOTOMBUHUZAN

140318masidi

14th March, 2018

Di MARRYAN RAZAN

KOTA KINABALU: Popotounda o polinta mogisusuvai pongkimamaan om pongunsuban montok monuhung popobuu ngaavi kotombuhuzan id pogun diti popobuu pomounan kotombuhuzan kinoizonon om popoinsavat vinasi kohobusan kotombuhuzan dioho.

Montili Kotombuhuzan, Koubasanan om Sandad Posoihi Datuk Masidi Manjun minoboos, vookon pongkimamaan dino nopo nga Tozibut Kotundaan Infrastruktur Kotombuhuzan (TPIP) om Tozibut Poimbida Kotombuhuzan (TKP).

“TPIP nopo nga sakadai kotombuhuzan id boogizan pagahasan hoohobi no kozo montok projik ngaavi izonon miawga do hotel, resort om chalet.

“Tosiibo no kozo paahasan di pataakon nopo nga kiginumu RM5 lizong om had takavas kiginumu RM100 lizong. Kinavas bunga montok pagahasan diti nopo nga piahatan apat gisom onom piatus sontoun, id nombo ino osiibo om kopetetif piagahon bank ngaavi komersil di suvai,” ka disido.

Minoboos isido dino ontok minamason pinopoimagon Sesi Enggagement Dana Kotombuhuzaan om Malaysia Tourism Quality Assurance (MYTQA) Miampai Popobuu Pomounan Kotombuhuzan Pogun Sabah, id pacific Sutera Resort, id doiti, di koniab.

Minoboos i Masidi, TKP vagu montok kumaa popobuu kiningkokoton toniini om uha-uha miampai ginumu noohos di pataakon piahatan RM250 gisom RM30 lizong.

“Kinavas bunga montok pagahasan diti nopo nga osiibo piagahon bank ngaavi komersil di suvai. Pagahasan diti poingukab kumaa komponi popobuu kotombuhuzan i nokolijisto miampai Suruhanjaya Komponi Malaysia,” ka disido.

Kokomoi Malaysia Tourism Quality Assurance (MyTQA), minoboos i Masidi ino nopo nga iso pongkimamaan komontilian montok popoinsavat vinasi kotoinaan produk ngaavi kotombuhuzan id pogun diti.

Minoboos isido, MyTQA nga ningkokoton kumaa kohobusan kotombuhuzan om manaak koponoguvangan kumaa di popobuu pomounan kotombuhzuan mooi hobi poposoguhu vinasi kotoinaan di pinohombus om kouhanan di pinotounda.

“Ontok toun 2017, kiginumu 25 produk kotombuhuzan nakaanu ningkokoton MyTQA om Tabin Wildlife Resort nopo nga iso no mononoimo montok Sabah.

“Saasabap no dino monuu zou mooi hobi ginumu popobuu kotombuhuzan id pogun diti mikot montok mongupalai ningkokoton id siibo abaabazan MyTQA,” ka disido.

Kokomoi miampai kimpin Toun Tumombuhui Malaysia 2020 (VM2020), minoboos i Masidi, ino nopo nga kimpin kohimo mantad po pinotimpuun di toun 1990, kahapas dino di toun 1994, 2007 om 2017.

“Kaapat-apat kimpin diti nopo nga pinopokito koinsavatan koikatan tutumombuhui i positif om Sabah mositi magau kosivatan diti montok mumpazat popointutun produk ngaavi dotokou id nazatan sompomogunan,” ka disido.

Minoboos isido vookon tuduvan kopoguhu pongozuvan VM2020 nopo nga montok dumampot koikatan tutumombuhui dahabus kiginumu 35 lizong tuhun miampai tangangazan kotombuhuzan kiginumu RM168 bilion.

“Kimpin Toun Tumombuhui Malaysia 2020 momoguno tagline “Travel. Enjoy.Respect’ id lahan tagazo montok saviavi abaabazan kaampai no abaabazan popointutun om kapadagangan id suang om habus pogun.

“Saasabap o dino zou mooi popobuu kotombuhuzan id pogun diti maganu kosviatan diti montok popoinsavat vinakas ponongkiohian miampai vinasi kotoinaan montok tumoguvang ponginaman timpu mikot.

“Otumbazaan zou miampai kivaa kosivatan diti, kaanu tokou dumampot hizab om ikoton di pinatantu,” ka disido.

Humansan isido abaabazan miaga diti kaanu manaak koponoguvangan miampai kolotian kumaa popobuu pomounan kotombuhuzan id Sabah kokomoi tonggungan dioho sabaagi tambahut kosudong om medium kopotunuzan kopoihaan kumaa boogizan polinta id suang monguhan ahal ngaavi kotombuhuzan, i tuutulus popoinsavat pomounan kotombuhuzan id Malaysia, hoohobi no kozo id Sabah.

Nokotindapou nogi Potunud Upis Komontilian Kotombuhuzan om Koubasanan (MOTAC) Sabah, Ag Ahmad Zaki Abu Bakar.

   
Email Print
   
 
 
E-browse