|
3rd October, 2008
TAMBUNAN: Songinan luri kiwinagat onom tan i tinongkiadan doid natad walai songulun mogigiyon id Kampung Mangi Pangi, doros hiti di sontoun nakatalib nokoponinong do mogisusuai ponguhatan.
Sanganu do natad walai di pinotimparanan do luri dilo’ i Sius Sylvester, 53, nga’ muhot-uhot nokuro tu’ tinongkiadan o luri dilo’ om momusorou do pinanakau doti’ o luri di nokomoi.
I Sius songulun kukumaraja’ Pos Malaysia pakaraja’ doid Upis Pos Kakadayan Keningau, om kouli’ no do potitikid tompok minggu.
Kohondot dilo’, amu’ disio noilaan om isai pinopoiliu do luri i noponu’ do kakamot kagaganapan mamawaal toi pamansaian walai dilo’. I tongo’ sungkad tukad di Sius nga’ amu’ monongkoilo.
Pinointalang di Sius do luri dilo’ di pogulu diti id koyuon di osonong nga’ baino’ diti miagal podi ‘bosi’ buruk’ i nokoponinong kobolingkahangan kumaa paganakan dau.
“Luri dilo’ nosili koiyonon pogigianakan di tangaanak om koligogo’,” ka disio i pinopointalang do luri dilo’ nga’ kaantob po nogi’ diolo’ do mongusaha’ di natad diolo’.
Pinointalang dau do ogumu’ no takal dau do mongintutun di sanganu luri ponit Isuzu kinumbur rojistor SAA 2019 F dilo’ nga’ aiso’ i monongkoilo.
“Norugi’ oku nopo do timpu om tusin do manamong luri dilo’ mada’ do panakahon di tulun aiso’ tinonggungan,” ka disio pinopointalang.
Kohondot dino, minanahak isio timpu turu’ tadau kumaa sanganu luri dilo’ do mogongoi om talib dilo’ maan disio songonuo’.
“Rumuput oku doid pulis,” ka disio i minoboros do mokianu isio do ganti rugi’ om siwa’ poompus do kinopoiyanan luri dilo’ id natad walai dau.
|
