|
29th September, 2008
KENINGAU: Tinonggungan do koonduan id kopotundaan pogun amu’ aanu do mintong poinsiriba’ sabab yolo’ nga’ nokogompit po nogi’ dodi kopomuruanan pulitik om sistom kopomorintaan pogun.
Timbang Luguan Umno Bohogian Pensiangan i Wahanin Ismail, minoboros do koonduan babaino’ diti mitopong nodi di kokusaian tu’ yolo’ nga’ poingigit nogi’ do karaja’ takawas doid kotorinaan koporintaan.
“Suai ko’ poingigit karaja’ takawas id porinta’ haro nogi’ wokon koonduan i mongigit karaja’ montiri id kabinet pogun om pisompuruan,” ka disio ontok minongobi di Luguan Umno Bohogian Pensiangan i Datuk Abdul Ghani Datuk Mohd Yassin do pinopoimagon iso’ ababayan montok koonduan om paganakan i pinaanjur do Kounsol Kopotundaan Koonduan om Pagakanan Parlimen dilo’ id Lintuhun Ogumu’guno Kampung Penagatan Ulu di songkonihab.
Ka di Wahanin, gulampot do koonduan okito po nogi’ soira’ do haro wokon diolo’ i nosili lalansanon takawas pogun miagal doid Filipin, Pakistan nogi’ Indonesia di pogulu diti.
Id timpu di miagal, ka disio tinonggungan di koonduan doid toisoiso’ kolominan nga’ kosuul nogi’.
Kokomoi do ababayan dilo’, ka disio kosudong kopio do poonjuron ilo’ sabab id timpu pomogunan aiso’ gontob diti potoguang yolo’ do kahagakan kopurimanan doid nunu nopo karaja’ kaampai no id suang paganakan.
“Mantad no do haro o ababayan diti, kaanu i koonduan ngaawi’ do toilaan,” ka disio i pinopointalang do haro koonduan i amu’ kotunud do koongoiyon id koposion diolo’ sasabab no do amu’ kaanu monoibau di kahagakon do topurimanan.
|
