|
7th September, 2008
TAWAU: Mimang i Vovozoon Montili Sabah, i Datuk Seri Musa Haji Aman do oginsi kopolintaan id Sabah do momit kinahantazan do ponguhudan di minaan do Kotinanan Pagahansan Sabah (SCC) i nokoimau minaganu kountungan pongindopuan om nogi kahantazan dino pinapapanau tonggungan sosial kuminaa doid tuhun ginumuan.
Musa, i ponogi Montili Kousinan Sabah, minoboos do kinahantazan do SCC nopo nga okon noopo ko nokoimagon id nazatan nasional miampai nakaambit tutungkap mantad di Huguan Monunuat Pogun tu kabaahan ponguhudan dino nga nogi sabap do kinahantazan dino do pinapapanau abaabazan doun kotuhunan id pototongkop Sabah.
“Abaabazan sosiol do SCC diti nopo nga apatut adadi tonudon do oginsi ngaavi suvai tu koimau papapanau tonggungan sosial dioho. Otumbazaan zou do nung iso o komponi diho do nakahantoi nakaanu kountungan maza ponguhudan di tabaa, (komponi)kaanu iho do manakadai kumaa doid tuhun ginumuan,” ka disido kuminaa doid magaganu abal di kahapas pinopoimagon do Hamin Tanak Aiso Mohoin Ar-Raudhoh id Vatu 4, Lahan Apas, somok doiti di koniab.
Hinominondazanak aiso mohoing di kigatang do RM170,000 diho i toguvangon do Koisaan Kotundunan Tanak Aiso Mohoing Islam Tawau nopo nga sinakadi do SCC.
Hivang hinominon dino i kaanu popoumpos do gisom 60 tuhun mogigizon diho nopo nga pinataak do songuhun puu pongindopuan mantad Tawaau, isido nopo nga i Bacho Kada.
Mantad diho, minokianu i Musa mooi do savi avi oginsi kopolintaan pogun Sabah do papaanjul lahan ponguhufan di tabaa tu maza lahan nokomoi, okon noopo ko kaanu o oginsi mamagamu kountungan nga nogi kaanu manakdai do tinimnugan di momoguno.
“Komponi di nuhud miampai abaa, suvai ko kaanu mamagamu kountungan di papavasa dioho popobuu do komponi, mnga kaanu nogi do monuhuk tongggungan sosial korporat montok manakadai do tuhun ginumuan,” ka disido.
Tumanud di Musa, hobi ginumu do oginsi kopolintaan di kahantoi om papapanau tonggunan sosiol korporat dioho, om mantad diho mimang kozo gaan vinagat otoguvang do kopolintaan montok manakadai tinimungan di momoguno sakadai.
“Iti no i mositi ombitanan do oginsi ngaavi suvai. Otumbazaan zou do kaanu izioho (oginsi ngaavi suvai) om tumanud haang do SCC,” ka disido.
|
