Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Pesta Rumbia harus dipertahan: KM |  Projek Agropolitan Gana perlu disiapkan segera: Shafie |  Agensi kerajaan diminta kembalikan tanah milik rakyat |  Liew: Permohonan dapatkan peruntukan bina 150 PPRT Kg Gas sudah dikemuka kepada KKLW |  Sabah bakal berdepan krisis pekerja ladang |  Poor finishing haunts Sabah again |  Mika wary of Kedah threat |  KK, Tawau in Group of Death |  SEPA: Study on Sabah energy should not be limited to coal |  Kuala Penyu to get new Ko-Nelayan building next year |  Six-man gang who mugged police constable arrested |  Shafie wants govt agencies to return the rakyat’s land |  Suspected child molester nabbed |  Sabah facing labour shortage in 10 years |  Onom sabap ra kua 7-Eleven ra Jipun moonsoi | 
 Kadazan Dusun

Susumikul SK Menumpang KP pinabantaan kopongilagan dadah

6th December, 2017

Di RAPHIEL PINUS

“MOMOLOKUD do poring mantad hobung.” Ilo’ no tukadan di nakasandad i koowit rati, monuduk do tanak mositi’ timpuunan do kakal po diolo’ do omulok tu’ asanang po do mumboyo’.

Kohondot dilo’, id nunu nopo ponudukan, kiguno do maganu laang mantad tosopung om okon ko’ indadon gisom do (nung poring) okikang tu’ otipu’ nogi’ ko’ lumookud po dii.

Mantad no dilo’, SK Menumpang id Kuala Penyu di kaawagu diti pinapaharo kinopointutunan kopomogunaan sala’ dadah, waya’ araat mantad koulalaho’ dilo’ kuminaa di susumikul id sikul nokomoi.

Ontok kinopoonjuran do ababayan duo tadau nokomoi, soginumu’ do 45 susumikul i minampai. Ababayan nokomoi i roitan do Tadau Ponontudukan Kopongilagan Dadah om Ababayan IMAN, sinakadai do Koisaan Kopongilagan Dadah Malaysia (Pemadam) Pogun Sabah.

Po’ompus do ababayan nokomoi, pinoindalan o pokiikitanan mantad mogisusuai kotinanan kaampai no Koupisan Kolidasan Kuala Penyu om Walai Pongubatan Kuala Penyu suai ko’ Pemadam Pogun Sabah.

Wookon tuduan do ababayan dilo’ montok manahak kopoilaan di tongo’ susumikul kokomoi kopongilagan dadah. Suai mantad dilo’, minanahak po nogi ilo’ do kopoilaan kokomoi di ponit-ponit do dadah kopoligogon om waya’ i otoguang di tongo’ mangangakan dadah.

Montok pinaparati kopio, pinaharo o ponomborosan kokomoi kopongilagan dadah pinolombus di Upisor Kolidasan Beaufort i Ahmad Zamani.

Naamot dino, minanahak booboroson pinopoimagon do ababayan nokomoi, i Upisor Pemadam Pogun Sabah Ahmid Yusuf lumansan do ababayan dilo’ kosili ababayan tikid toun do sikul nokomoi.

Minongunsikou po ngoi’ isio kumaa SK Menumpang i nakaanu pinopoindalan do ababayan nokomoi montok kumoinsan nogi’ doid Kuala Penyu.

Pinopolombus po nogi’ isio do kopongunsikohan kumaa di Molohingon Mongiingia’ SK Menumpang i Ahmad Husin i minanahak do sokodung montok kinopoindalanan do ababayan dilo’.

Ponongkotoluadand i miagal pinolombus po nogi’ disio kuminaa di Mononorina’ Ababayan i Azlan Md Zainal mantad no do tinonggungan takawas disio gisom nakalantoi kinopoindalanan do ababayan nokomoi.

   
Email Print
   
 
 
E-browse