|
24th July, 2008
SANDAKAN: Iso ponoihian poingangkub kumaa doid vaza kozomutan om kosudongan do hivang projik Panaakan Vinakas ontodonon kavo Giis toi ko Alang Vatu nopo nga mositi do maan poguhui o kopolintaan do papahantoi panadaan dino id uvang disan kohisaon Sabah.
Minoboos i Mononotuduk Sains, Technologi om Sandad Posoihi kumaa doid di Vovozoon Montili Sabah, i Datuk Tham Nyip Shen do gisom baino diti, au po nokoponoodo o kopolintaan do koputusan kokomoi ningkokoton hivang kavavagu panaakan vinakas nokomoi nga kivaa atag dino do potodoon id Sandakan.
“Poingkuo po nga Sandakan nopo nga atag noopo om au po noputus om kakaal o kopolintaan do mogium hivang di kosudong gisom do kivaa koputusan mantad mantad sav avi boogizan, kaampai nohusi kopoihaan do tuhun mogigizon posoihi.
“Mokianu tokou mooi o Sabah Electricity Sdn Bhd (SESB) om Tenaga Nasional Berhad (TNB) do monoodo ponoihian poinggonop kumaa doid projik om vaza dino kumaa doid sandad posoihi,” ka disido kuminaa doid magaganu ngaavii abal di kahapas minoniikon kopointahangan do ‘Clean Coal Technology’ id Sabah Hotel, do doiti di koniab.
Pinopoimagon nogi i Tham do haang piipio puu om komiti guguminavo sandan posoihi uvang do minaganu haang minomoduan pangan pitimbungakan di tinikoonon di Tham di ontok o kopointahangan do ‘Clean Coal Technology, i pinobuzu do SESB, i tinindapou do hahansanon ngaavi layat om nogi poniikon koisaan, puu pongindopuan om tuhun ginumuan.
Pinopoiho i Tham do komponi mananaak bakaang lotilik nokomoi doid iso pangan kopointahangan om nakaanu huhusi kokomoi ‘Clean-Coal Technology’ di sabaagi iso technology di kaanu moanahob kozomutan sandad, hobi no id ahal kozomutan mantad do alang vatu.
Ka disido, kopointahangan di isooi nga nakaanjul no id Kota Kinabalu om poonjulon id potitikid uvang di momoguno kopointahangan kokomoi projik panaakan vinakas kavavagu di uvang disan kohisaon di pisosoomo do kotoguvang kakasaan id gontob di oindamaan, sokio nung ontodonon koonuan do au aanu.
“Pointatap tokou do monoodo panaakan vinakas id uvang diti, Tumanud do kinoputusan Kabinet di kahapas pinopotingkod projik id Lahad Datu, mantad diho do baino id pinggisoman mogium hivang om kinoizonon kavavagu montok panadaan dino.
“Nung au, kumadop tokou om hobi oindamaan po vagu nung au tokou monoodo panaakan vinakas kavavagu diti, mantad diho do kotoguvang tokou kakasaan.
“Mantad diho do pomihian dotokou nopo nga pointantu do monnoodo panaakan vinakas mantad doid nunu noopo ontodonon, mantad do alang vatu toi ko giis om okon ko mositi do alang vatu nga au mongihi ontodonon mantad kavo diti,” ka vagu disido.
Suminimba tudizo suvai kokomoi ahal panadaan panaakan vinakas alang vatu diho, minoboos i Tham do: “Ahal panaakan vinakas alang vatu id Lahad Datu nopo nga nasansagan do pinotingkod tu hivang om kinoizonon dino au kosudong miampai pososoihi, mantad diho do asansagan o kopolintaan do mogium kinoizonon suvai id uvang disan kohisaon diti.
Mantad diho, ahansan isido do tuhun ginumuan do kaanu monoimo kointahangan di minaa do SESB kumaa doid vaza do teknologu nokomoi do touvi.
|
