|
|
|
Huguan Koupisan Koponoizukan Kahasaan Tavagat Bandaraya DSDP Ahmad Asri Jamaluddin (vanan) miampai songuhun upisol takavas narkotik pinopokito kuminaa magaganu abal ganja i nagamu.
|
24th July, 2008
KOTA KINABALU: Nakapanaan o pulis songuhun tondu om songuhun kusai Modiidikot Aiso Kasagaan (PATI) om minagaau 1kg ganja kigatang RM10,000 Tadau Koduvo nakatahib.
Iso’ tinimungan puu koupisan koponoizukan kahasaan tavagat narkotik (JSJN) mantad Hongkod Upis Pulis Karamunsing minanaan PATI dino id Talun alun Sulaman, di kuang hobi jaam ko 12.10 doungadau.
Huguan Pulis Bandaraya ACP Ahmad Sofi Zakaria pinopoiho magaganu abal id suang iso’ pitimbungakan magaganu abal, dikoniab.
“Tinimungan JSJN minongoi id tampat kinantakan montok papanau koponoizukan songian nakaanu kopoihaan mantad tuhun ginumuan,” ka di Ahmad Sofi.
Nokito o pulis izioho dino i kiumul piahatan 40an om 50an id suang koozuzuvo kototongob ontok maapanau pougadan kumaa Taman Indah Permai.
“Kumininam izioho do minogidu songian nokokito do pulis mininsomok, tondu dino nokito do minagaau iso’ kantung plastik mantad hongon do kusai dino om kumininam papataam id tongungut poindodoos nga naatu id somok dioho,” ka di Ahmad Sofi.
Nakahantoi o pulis minanaan duuduvo dioho id tampat kinantakan songian nantakan iso’ pigagahan.
“Naanu do pulis kantung plastik i pinataam montok pomolisaan om noihaan loun nokoing kikotumbazaan do ganja,” ka disido.
Minonimba iso’ tudizo, minoboos i Ahmad Sofi izioho nopo nga’ okon ko misasavo nga kivaa piwolisan.
Maamaso o pulis papanau koponoizukan montok mongintutun nung izioho diti puu mogogohimu papatazad dadah toi ko sinuu do tuhun kotohu montok papaatod do ganja dino kumaa momohi id uvang Taman Indah Permai.
Ganja dino kikotumbazaan hinimu suminuang mantad pogun sungkad tukad.
Tinaan izioho dino naamot montok koponoizukan id siiob Seksyen 39B Akta Dadah Kohigaganan (ADB) 1952.
“Iti nopo nga kiis dadah kohimo soizukon id siibo Seksyen 39B i nosogu id Kota Kinabalu mantad po timpuunon toun diti,” ka di Ahmad Sofi.
|
