|
23rd July, 2008
IPOH: Komontilian Kotundaan Koonduan, Paganakan om Mogiigizon monuidong iso komiti kikuasa poimbida montok monguhan kobohingkangan tanak ngaavi id pogun diti i aiso do suat kinosusuvon, ka di Monontuduk Montili Kotundaan Koonduan, Paganakan om Mogiigizon, Datuk Shamsiah Abdul Rahman.
Minoboos kuminaa magaganu abal id Hamin Kotundunan Arutperum Jothi, Buntong id doiti di koniab, minoboos isido komiti kikuasa poimbida dino naampazat do agensi kopolintaan miaga do Koupisan Kopolijistahan Pogun, Koupisan Kotundunan Mogiigizon miampai tinan okon kopolintaan (NGO).
Minoboos isido komontilian dino nga monoodo abaabazan kopolijistahan montok tanak ngaavi i aiso do suat kinosusuvon.
Tumanud di Shamsiah mazaa abaabazan dino, mohoingon toi ko mintamong tanak ngaavi i aiso do suat kinosusuvon kavasa mokilijisto kinosusuvon tanak ngaavi dino.
“Montok kalaja kopolijistahan dino, mositi oviton miampai suat katapatan tanak ngaavid ino i pinopokito do nosusu izioho id Malaysia miaga do suat kasagaan tampat kinosusuvon mantad hamin pongusapan toi ko suat sasi nung nosusu izioho id daamin. Mohoingon om mintamong nga mositi mogovit suat dioho miaga do MyKad om suat kinosusuvon,” ka disido.
Minoboos isido babaino diti, abaabazan miaga dino tinoodo kiginumu do intohu id Kuala Lumpur ino nopo nga id induvo id Chow Kit om insan id Setapak miampai kotuhungan NGO miampai do Yayasan Salam Malaysia om kiginumu do 70 gisom 80 tanak aiso suat kinosusuvon nahantoi do pinopolijisto.
“Otumbazaan izikoi montok popobuu abaabazan diti kumaa pototongkop ogun om nogi tumuubung Potunud Koupisan Kotundunan Mogiigizon id pototongkop pogun montok monimpuun kalaja,” ka disido.
Kopiondot dino, minoboos isido boogizan disido nga momoguno kaampazatan mantad NGO om sukarelawan id potitikid pogun montok papahantoi abaabazan dino.
Naamot dino minoboos i Shamsiah kalaja kopolijistahan himo tanak kaampai no tohu miobpinai id Hamin Kotundunan Arutperum Jothi i au kaanu sumikul tu aiso do suat kinosusuvon aanu do monimpuun di koniab nogi.
“Sundung i do ingkaa, okon saviavi kiis aanu monguhan miampai tosikap saasabap no do suat i gunoon mositi potoundaon mooi kalaja kopolijistahan aanu papanau,” ka disido.
Apat mantad tanak ngaavi dino nopo nga i K. Tharsini, 11, om tohu miobpinai N. Dineshkumar, 7, N. Roja, 7, om N. Pondian, 8, kivaa suat tampat kinosusuvon mantad hamin pongusapan om i S. Velan, 11, aiso do nuununu suat.
|
