|
22nd July, 2008
TAWAU: Kounsol Amanah Rakyat (Mara) babain’ diti pinoposodia’ do 5,883 lot premis pongindopuan id poliliput pogun do gisom baino’ montok posiwaan di mongingindapu’ Mamasok, ka di Luguan Potunud dilo’ i Datuk Nam Martinin.
Mantad tintob dilo’, ka disio 2,145 lot id upa’ do arked, kompleks pongindoupan (1,143), kadai (1,203), watas pomorunan mara (378), bazaar (732), bingkil (245), sinusulap (31) om bistro (6).
Tumanud disio, id Sabah nopo nga’ nokoposodia’ o Mara do 16 premis linimput miampai 297 unit koiyonon pongindopuan montok posiwaan suai ko’ kagaganapan koponoluadan pongindopuan montok monguhup momoruhang do kousinan di mongingindapu’ Mamasok.
“Onom tulan kumolimpuun toun diti, Mara pogun Sabah nokopolulus do kapaalasan RM40.7 riong kuminaa di 936 tulun mongungusaha’,” ka disio ontok minoboros kopihondot do ababayan gaa’ premis pongindopuan om porusahaan Mara nayatan pogun do hiti.
Id sunduk kinopomuhuan pambayar kinapangalasan, minoboros i Nam do Mara Sabah nokopuhu do RM52.6 riong mantad di 8,489 tulun mongongolos gisom di ko 30tw Ko’onom di katatalib.
Naamot dino, i Panakadai Montiri Kousinan Sabah i Datuk Tawfiq Abu Bakar Titingan minokianu di tinaru Mamasok do magahou kosiwatan di pinosodia’ do Mara montok mimogot doid kaganaan pongindopuan.
Ka disio, kiguno yolo’ do kobulun monokisolod om poposili kagaganapan di pinosodia’ do Mara kaampai no premis pongindopuan sabaagi laang ponimpuunan do sumili mongungusaha’ di kalantoi.
“Silihon o premis Mara sabaagi laang ponimpuun id kaganaan kousahawanan pogulu kaanu do linimput sondiri’,” ka disio ontok pinopoimagon do ababayan nokomoi.
Id ababayan dilo’ i Mohd Al Hanafi Osman, 25, mantad Keningau, songulun mongingindapu’ kakamot piromutan pinoimagon sabaagi moniniwa’ bobos tosonong.
|
