|
|
|
Potunud Tolungku Tondu Hongkod Kota Kinabalu, Lim Kim Moi miampai Potunud Takavas Tolungku Suria Idris pinopokito kain batik i pinahabus di songintolungku.
|
22nd July, 2008
KOTA KINABALU: Koupisan Tolungku mangazu do kapadagangan tounan pinahabus do kinuama hongon di songintolungku i maamaso papanau do ukum.
Tuduvan kapadagangan asil kinuama hongon dino kiangkab popointahang misi om visi Koupisan Tolungku Malaysia id suang mongumohig di songintolungku mazaa pinghudaan om kabaahan vokasional i pinapanau id saviavi institusi tolungku.
Potunud Tolungku Sabah Mohd Sabri Bin Yaacob minoboos id suang iso’ pitimbungakan magaganu abal id Hongkod Upis Tolungku Hongkod Kota Kinabalu id Kepayan, di koninab.
“Kapadagangan asil kinuama hongon diti kiangkab manaak ningkokoton kumaa kabaahan i kivaa id potitikid di pointolungku, popointahang kumaa mogiigizon do i songintolungku nga kaanu manaak toihaan i tavasi kumaa mogiigizon om pogun,” ka di Sabri.
Minoboos isido ontok toun diti Koupisan Tolungku Malaysia pinopoinsi kopomuuvan mantad asil kapadagangan kinuama hongon pototongkop pogun kiginumu do RM10 lizong.
“Koupisan Tolungku Sabah pinopoinsi kopomuuvan asil nadagang kinuama hongon mantad tolungku pototongkop pogun toun diti kiginumu do RM80 ngoibu,” ka disido.
“Kiginumu do 40 mogisusuvai kavo kinuama hongon asil di pointolungku id Hongkod Tolungku Kota Kinabalu kusai om koonduan i tinoodo mantad bosi, kazu om ozuvon id hivang tolungku om Wisma Merdeka mantad 28 Vhan Kotuu gisom 4 Vuhan Kavahu.
Suvai ko Hongkod Tolungku, institusi tolungku i kogompit id suang kapadagangan asil kinuama hongon kaampai no Tolungku Tawau, Sandakan om Henry Gurney Keningau.
“Hongkod tolungku Sandakan mangazu do kapadangan kohobusan kinuama hongon mantad 23 gisom 31 Vuhan Kavahu om Tolungku Tawau pisosoomo mangazu kapadagangan ahapas Hari Raya Puasa,” ka di Sabri.
Minoboos isido papaabal izioho lamai kapadagangan kinuama hongon kumaa ginumuan mazaa radio, kohobusan abal, papaatod suat tahap kumaa hobi 100 koupisan kopolintaan.
“Suvai mantad dino papatazad nogi izikoi kiginumu do 3,000 pamlet taman pomuhominan id Lok Kawi, Melingsung Summer Bay om pomuhominan kopolintaanom poposokot banner id piipio trafik light id uvang Bandaraya gisom kumaa biizungon talun alun Papar,” ka disido.
Minonimba iso’ tudizo, minoboos i Sabri tuhun ginumuan kavasa mokianu mogisusuvai kohobisan kinuama hongon id Hongkod Tolungku Kota Kinabalu suvai ko momohi kohobusan i notoodo no haid.
“Mangazou nogi izikoi tuhun ginumuan mikot id lamai kapadaganganid Wisma Merdeka mantad jam ko 9 minsusuvab gisom 10 totuvong,” ka di Sabri.
|
