|
21st July, 2008
PULAU PINANG: Pambantangan do bajet 2009 nga maganu nogi pongihaan doid ahal koingkavason vinasi toi kualiti ontodonon tuhun (Modal Insan) montok manakadai kobuuon do pomounan om kosunizon ikonomi id suang pogun, ka di Montili Kousinan Koduvo, i Tan Sri Nor Mohamed Yakcop.
Mantd no diho ka disido, mositi o kopolintaan om boogizan pomounan do popiohon kopoihaan montok koonuan bakaang toi mekanisme di kosudong montok mamahantoi angkab nokomoi.
“Kosoou o kopolintaan do kopokionuan ontodonon tuhun hobi no montok boogizan pomounan om ihoon kozo montok koonuan lahan di kosudong montok popoingkvasa kualiti ontodonon tuhun di monokodung kobuuon do pomounan pogun.
“Id ahal diti, mositi o boogizan pomounnan om kopolintaan do tomoimo miohon kopoihaan montok popoimbuhai kozuzauvo di taandang mnotok papavasa abaabazan ikonomi do kotihombus kobuu om monongkiahi doid pasalan global,” ka disido.
Minoboos isido diti kuminaa doid magaganu abal di kahapas minoniikon pitimbungakan miampai do hahasanon pomounan montok koonuan kosuangan toi input montok kopotoundaan pabantangan bajet 2009 do ontok ko 29 Vuhan Kavahu diti i maan di Huguan Montili, Datuk Seri Abdullah Ahmad Badawi, do doiti di koniab.
Ka disido, iso mantad bakaabang di okito do koimau popoingkvas vinasi ontodonon tuhun nopo nga miampai popotounda kursus toi pinghudaan kumaa doid susumikul toi graduan montok timpu pointantu poguhui do sumuang id pasalan kalaja.
Minoboos i Nor Mahamed do pabantangan do bajet baino diti nga manaat nogi ponotohan ahal kounalan sosial om mongiho kozo do kosunizon ikonomi pogu do kotihombus kobuu.
Suvai diho, minoboos nogi isido do pituubungan diho nga mogiboboos nogi doid piipio ahal suvai di misudong miampai kosunizon ikonomi pogun om kopokionuan sosial do layat.
Vookon ahal di piboosan nopo nga koumatan infrastruktur, kaampai no koingkavasaon koimauan kotoinaan ‘jalur’ tahaab, panaakan ‘grand’ om panakadazan montok pomounan tongonini om uhan uha (SMI) om popobuu abaabazan pongindopuan id habus pogun.
Ka disido, pituubungan miaga diho nopo nga potihombuson potitikid timpu montok koonuan input om huhusi kopoihaan sabaagi kopotoundaa tumoguvang piohian ikonomi di maso kozo koundoonok.
|
