|
20th July, 2008
DI KAAWAGU DITI, Komiti Umat Katolik (KUK) Chapel St. Maria Molisou pinapaanjur do kotombuluyan doid Walai Kotundunan Cheshire Likas i natanud di 46 tulun.
Okon nopo ko’ molohing nga’ nowit nogi’ diolo’ o tangaanak do tuminanud id kinotombuluyan dilo’.
Id kinotombuluyan dilo’ i binuruan di Ponorikohon KUK i Albert Joseph mogisusuai ababayan pinapanau diolo’ kaampai no minogirurumo miampai di mongingiyon do walai kotundunan nokomoi.
Ababayan suai i pinapanau diolo’, minongoi yolo’ intong di posorili’ kinoiyonon dilo’.
Suai mantd dilo’ minongunsikou po nogi’ yolo’ di mongingiyon do hilo’ maya’ kaparangahan sinding kaampai no i susuminding nointutunan i Ateng Joannes R. Johnny om i taka’ dau i Jovita R. Johnny i nakatanud doid kinotombuluyan nokomoi.
Tumanud di Albert, wokon nopo do hontolon toi rikoton doid kinotombuluyon dilo’ nga’ montok manahak kopopurimanan kumaa di nangkatanud ngaawi’ do songkuro kosuulon doid pogipopodulianan sompipi’ tiso’ om tiso’.
“Osonong kopio o ababayan miagal diti lolobi no kumaa di tangaanak i nakatanud,” ka disio.
Kogumuan di nakatanud doid kinotombuluyan dilo’ pinopolombus do kansantaban ginawo tu’ nakaanu yolo’ do minintong di kosusaan do tulun suai om nokopoimbulai do kopurimanan mongupus sompipi’ tulun.
Id kinotombuluyan dilo’ pinapatahak po nogi’ yolo’ do toluod montok di mogigiyon id walai kotundunan nokomoi.
Katalib o kinotombuluyan doid walai kotundunan nokomoi, luminombus yolo’ do pinapaharo kotombuluyan id pipiro kinoiyonon di suai kaampai no id tisan rahat Tanjung Aru.
|
