|
20th July, 2008
SEGAMAT: Otumbazaan o kopolintaan do kaanu mongingkudi ginumu pakakalaja songkosuvazan miamai muut-suut, mantad do 2.1 lizong do babaino kumaa do 1.8 lizong tuhun do ontok 2010 maza kopoonjulan mogisusuvai haang, ka di Montili Ontodonon Tuhun, i Datuk Dr S. Subramanian di koniab.
Minoboos isido do maganu ponginsomokan o kopolintaan om pamalanan poimatu mooi o pakakalaja kinoizonon do kaanu monovohi toguvangon om kajala di sinuangan do pakakalaja songkosuvazan do babaino.
“Haang ngaavi diti nopo nga kaampai no manaak pinghudaan di misudong miampai kaandak om kopokionuan doid pasalan pakalajaan kumaa doid savi avi pakakalaja kinoizonon,” ka disido di ontok pinopoimagon Mini Karnival Pakalajaan i pinaanjul do komontilian disido do doiti.
Ka disido, popotounda o Koupisan Kotundaan Pakalajaan, iso oginsi do komontilian, popotounda kosivatan ngaavi pinghudaan kabaahan kumaa doid komuhakan ngaavi om kakalaja kinoizonon maza kopoonjulan Abaabazan Sistom Pinghudaan Dual Nasional (SLDN).
Minoboos i Subramaniam do abaabazan SLDN di pinointutun di toun 2005 nopo nga nakahantoi pinopovuhai sinakagon di hobi kitoihaan om kivaa vinakas monongkiahi.
Maza do hongkod ngaavi pinghudaan di pinotounda, abaabazan ngaavi pinghudaan di pokionuon id pomounan do baino diti, hobi obonongkiahi id piahatan ngaavi do mogigium kalaja doid pasalan pakalajaan, ka disido.
Minokianu nogi i Subramaniam do pakakalajaan ngaavi mooi do manaak kopoguhuanan kumaa doid vinakas kalaja kinoizonon tu ogumu mantad dioho di kikosudongan om okon ko kosusuka’ai mamagaji do pakakalaja songkosuvazan.
Ka disid, mositi nogi o layat Malaysia do monongki’aau kosivatan pakalajaan di maan poimbuhazo do Projik Iskandar Malaysia id Johor.
“Miampai do kivaa diho abaabazan om projik WPI diti, kaanu o layat kinoizonon do kalaja om monokodung kumaa doid koingkavasan poroduktiviti pogun om kaanu mongingkudi gontob aiso kalaja do babaino, iho nopo nga 3.6 piatus id suku toun koiso 2008 maza luputan di pinahabus do Koupisan Kopoihaan Malaysia,” ka disido.
Minoboos isido do popotounda do baino diti o Koupisan Vinakas Kalaja do Sistom Kopolijistohan Pakalajaan om Poposudong Kalaja (JSC) i pinobuu om gunoon pakazon do komponi swsta om nogi oginsi ngaavi kopolintaan miaga do Maktab Kerjasama Malaysia (MKM) om Suruhanjaya Kotoinaan Pabalajalan (SPP).
Ka disido, kopolokuan (iklan) panaakan kalaja nopo nga kavasa obii maza laman web id RTM 1 om abaabaaan “Hello On Two” id RTM 2 ontok potitikid tadau, tumimpuun do kaam ko 7.45 doungosuvab gisom jaam ko 10.30 doungosuvab.
|
