|
|
|
HUGUAN MONTILI Datuk Ser Abdullah Ahmad Badawi om i sinavaan disido, i Datin Seri Jeanne Abdullah maso mombii poinsomok do ‘Bunga Kantan’ di tinanom id ‘Laman Edible’ i pinomosaavan di sinavaan disido.
|
20th July, 2008
KUALA LUMPUR: Minokianu i Datuk Seri Abdullah Ahmad Badawi do momoomogun toi layat Malaysia mooi do minggisom kozo mongivad sondii mantad kogompit miampai nuununu tangangazan di kaanu momiumbak toi momunso sandad posoihi do pogun Malaysia diti.
Minoboos i Huguan Montili diti tu ogumu kinoumbakon do naantakan kumaa do pogun, mantad ahal sandad posoihi, id kotahunan toi ko id bavang, kaampai no id hivang kokompungan om id posoihi kakadazan.
“Pinggisoman do manamong sandad posoihi nopo nga mositi dodizon iso kopoguhuanan id suang ahal kotundaan pogun.
“Pinggisoman diti mositi papanaon miampai gisomon kozo om totootopot\ om ongi mositi dodizon tonggungan do savi avi boogizan montok mongiho kozo do sandad posoihi do tomoimo adadi tungkus bangsa om montok potungkuson kumaa doid sinakagon mikot,” ka disido di ontok pinopotimpuun Festival Sompomogunan Lanskap om Taman Malaysia 2008 id Taman Tasik Perdana do doiti di koniab.
Kalamazan toi festival di pinaanjul do Hintuun Kakadazan Tagazo Kuala Lumpur diho nopo nga nokotimpuun di koniab gisom ko 27 vuhan kotuu diti.
Minoboos i Abdullah do mositi o tuhun ginumuan do kopiuman do kopoposizon sandad posoihi di tosindak om tavasi nopo nga kaanu manaak kounalan mantad ahal kohidasan om nogi kopoposizon di hobi inongis.
Ka disido, mositi o tuhun mogigizon do pogun diti monongkotohuod tu noonuan o Malaysia do tana do togingo, kotahunan, bavang ngaavi om mogisusuvai susumuni om mamaamasi (flora om fauna).
“Kogingahan diho iso koimaan do Allah, om aanangan o Allah do nunu noopo i togingo om opiodo, mantad diho, kalaja dotokou nopo nga montok momogingo om popopiondo po vagu nunu i kivaa no poinsandad,” ka disido.
Minoboos i Abdullah do id suang Al-Quaran sondii, minoboos i Allah do koumbakon kumaa doid tana om bavang nopo nga nontodonon kinalag do mizau (tuhun) sondii om songian do aantakan, kopogovit iho do vaza talaat kumaa doid mizau sondii.
“Mimang zou do layat Malaysia do kivaa iso kopipiumanan…iso katabazan di kivaa kopipiumanan guminavo om mimang do manamong kogingahan diho miampai au atanagan do nuununu koimaan,” ka disido.
Naamot minambantug do pininggisoman ngaavi do papaanjul festival miaga diho, ahansan di Huguan Montili do kapanaak iho kopiumanan kumaa doid layat montok manakadai poposindak do pogun om nogi natadon dioho sondii.
Minongombit nogi isido kokomoi konsep “Edible Garden”, kokobunan bunga toi taman di kivaa konsep kazu miaga do kinotuan om tuva uva do tonomon di iso kabun id nomboo o loun, gamut tuva dino do aanu akanon, suvai ko kabun diho aanu dodizon montok poposindak do kinoizonon.
“Ponginsomokan diti avasi kozo, maza do ‘edible garden’ kaanu tokou mongikit balanja om asil ngaavi kabun nga aanu nogi dagangon. Aanangan zou do popoiho do kabun miaga diti dodizon iso tapapanazan om id timpu ponogi diho maan miampai totootopot tu ogumu kounalan diho,” ka disido.
Minoboos kuminaa doid magaganu abal di suminusuut, minoboos i Abdullah do Malaysia nopo nga kivaa kahansanan tagazo montok adadi eksport do bunga ngaavi poimizau id habus pogun.
Tumanud disido, kivaa pogun di kaanu koguhian tavasi maza eksport bunga poimizau, poiingkuo po nga eksport do Malaysia miaga diho nopo nga poinggontod doid bunga orkid noopo.
“Mositi tokou do mamadadi diti sabaagi iso pomounan di tagazo,” ka disido.
Nung kobuu o pomounan diti, ka disido, kaanu iho do manakadai popoimbuhai pomounan suvai miaga do ‘nurseri’ di kaanu manaak koonuan pomo’uang kumaa doid popopobuu.
Minoboos i Huguan Montili do potounda o kopolintaan do manakadai popopobuu toi monununda di aanangan montok tumabung doid kaganaan pananaman bunga poimizau montok tuduvan eksport.
|
