|
18th July, 2008
TAWAU: I ngaawi’ mingluluda’ do Longkod Pinsingubasan Kotorinaan Pogun (PLKN) pinokianu momoguno poinsonong di toinsanan komilaan om toilalaan di naanu diolo’ om minsodu’ mantad nunu-nunu koulalaho’ taraat i kopogowit kopidsalaan tinan sondiri’.
I Komander Rejimen 516 Susumangod Wataniah Brig. Jen Datuk Liew Yun Fah, minoboros do mositi’ po nogi’ diolo’ do sumili mamasok di kiguno om i aanu posunduran do pogun.
“I mingluluda’ PLKN nopo nga’ wokon mantad nuludan kopomuruanan pogun do timpu dumontol… kohondot dino kiguno yolo’ do sumodia’ manaan do tinonggungan nokomoi pointonod do babaino’,” ka disio.
Minoboros isio dilo’ ontok pinirubaan miampai di mingluluda’ Kiim PLKN Shan Shui, katalib minintong do ababayan pingludaan “Flying Fox” di tinimungan do puru rejimen disio doid kiim dilo’ di kaawagu diti.
Kokomoi dilo’, pinopoilo i Liew do pinsingubasan nopo dilo’ nga’ kihontolon do mongingkawas po do ginaras di puru rejimen nokomoi kosuul no id tongo’ ahal di kopogompit do komilaan i kiguno diolo’ do songonuon.
Pinsingubasan sopiagal dilo’, ka disio tilombuson papaharo do po’ompus timpu montok mamagampot rikoton om hontolon di pinoloting.
Minongunsub po nogi’ i Liew di sakag wagu do sumompuru do tinimungan Susumangod Wataniah mooi do karati om koilo yolo’ di tinonggungan kopio do tinimungan dilo’ suai ko’ karamit toilaan kohondot do koponingoligan pogun.
Lobi 130 puru tinimungan Rejimen 516 Susumangod Wataniah tuminanud do pinsingubasan dilo’.
|
