Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
PMS popobuzu RM20,000 tikid uvang di kihizab manaandak Kalamazan Kalimaran |  KOTUNDAAN SABAH MOMOGUNO PISOKODUNGAN TOTINDUGU DO KOONDUAN OM KOKUSAZAN: MUSA |  Utamakan kualiti projek, beri manfaat kepada rakyat |  34 sertai kursus Membuat Kek Kukus dan Karipap Pusing |  PMS salur RM20,000 kepada setiap daerah anjur Kalimaran |  Festival Trak Makanan KK berlangsung meriah |  LANTIK SEORANG WANITA DALAM LEMBAGA PENGARAH: MUSA |  Tidak mudah berputus asa kunci kejayaan Patricia Yapp |  MP says best to keep PLUS in govt hands |  Borneo Cup U-11 off to a spectacular start |  Tambunan powers to victory |  Greater solution needed to address Moyog river pollution |  Tekun Nasional entrepreneurs reminded to repay loans |  RM20,000 allocated for Kalimaran Festival |  No property damage in weak Tongod quake | 
 Kadazan Dusun

Tiagak Datuk Paul Baklin ginaa’an ‘Bulawan Sigah’

13th September, 2017

Di ERSIE CHELL ANJUMIN

KOPIONGOI di tinonggungan om kolubukan dau minongukab ralan do Koisaan Koubasanan Kadazandusun Sabah (KDCA) id watas Labuk, kinapamagaa’an gaa’ ‘Bulawan Sigah’ kuminaa di tiagak Datuk Paul Baklin, apatut kopio.

Bulawan Sigah, gaa’ koduo bobos tasawat id mogiigiyon tinaru Kadazandusun posusuhut do ‘Huguan Siou’, patahakon kumaa tosoosongulun montok kopongokunan om pongunsikohan di kinogompitan aparagat nogi’ tinonggungan takawas id kopointutunan rikoton do KDCA.

Kinapamagaa’an Bulawan Sigah do KDCA kumaa di tiagak Datuk Paul Baklin komoyon po nogi’ do kopongokunan i agayo rati okon nopo ko’ kumaa di sakag dau nga nogi’ montok mogiigiyon Dusun Labuk i kogumuan diolo’ mongiingiyon doid watas Tisan Kosilahon Sabah kapaampai do Beluran om Telupid.

Pinomungaran Dusun Labuk kumaa mogiigiyon dilo’ nanu kopihondot do ngaran Baang Labuk i po nogi’ ralan piromutan om ogumu’ kogunaan kumaa sistom kopongiingiyonon do mogiigiyon id watas nokomoi.

Mogiigiyon Dusun Labuk pasanganu nogi’ do kinolumison poinpoopori i koimbayat do ginumuan, wookon nopo nga’ seni tuunion i popiamung do nogungan om kulintangan, hinombo soira’ do piompoton popouni, tuni dilo’ ointutunan do ‘titik tungkil’.

Loyuk dilo’ pongompot do sayau koubasanan Dusun Labuk, ‘Magalai Labuk’. Suai ko ilo’, posokoton koubasanan Dusun Labuk pinungaranan do ‘Baju Labuk’ nga’ pasanganu nogi’ do kinolumison di poinpoopori. Id kinapangaramaian Kaamatan doid Hongkod Koisaan KDCA Penampang di ko 30 om ko 31tw Kolimo toun di nakatalib, montok kumoinsan nogi’ mogiigiyon Dusun Labuk pinopokito do kinolumison tungkusan koubasanan diolo’.

Om toun diti nopo, i tiagak Datuk Paul Baklin i minongunsub do kopongupusan tungkusan koubasanan maya’ do KDCA (pogulu diti ointutunan do KCA toi Koisaan Koubasanan Kadazan) id watas Labuk ginatang miampai gaa’ Bulawan Sigah.

Momuruan kitinonggungan

I tiagak Datuk Paul Baklin nosusu doid Kampung Kuala Sapi di ko 14tw Kohopod om Iso’ 1938, songulun i nointutunan mantad no do kopomuruanan disio.

Nokoumbal isio sinili do molohingon kampung minonowoli di tama’ dau i KK Gurandi Jambuah om minonilombus do tinonggungan do tama’ dau minongingkawas ikonomi mogiigiyon kampung.

I tiagak nokoumbal po nogi’ nosili mongongobi’ rayat montok watas Labuk di toun 1976. Id sunduk koubasanan, i tiagak nokogompit doid ogumu’ pinggisoman papabantug seni koubasanan om tungkusan mogiigiyon Kadazandusun.

Isio po nogi’ wookon di minonuridong do KCA/KDCA om minonimpuun nogi’ pinopointutun do koisaan dilo’ id nayatan mogiigiyon Kadazandusun id watas Labuk, Sugut, Beluran om Sandakan.

Pinggisaman dau dilo’ gisom do baino’ diti agayo kinouhupan kumaa KDCA raan Kampung Kuala Sapi, Beluran do papabantug Dusun Labuk id mato mogiigiyon suai.

Nokoidu’ pogun isio di ko 9tw Koiso’ 2004 di maso kiumur do 66 toun, mingiduan songulun sinawaan om 10 tulun tanak.

Kapamantangan tolumis

Minongobi’ di tiagak tama’ dau, i John i po nogi’ tanak kotuahan kusai ruminamit do gaa’ dilo’ mantad di Huguan Siou i po nogi’ Kumoduo Boyoon Montiri Sabah, Tan Sri Joseph Pairin Kitingan di ontok kinapamaramaian kohuliton toun kinoposilihan Huguan Siou di ko-33 id Dataran Tugu Nunuk Ragang, id Ranau di kaawagu diti.

Ka di John gaa’ di naramit tiagak tama’ dau dilo’ okon nopo ko’ nosili koondosan kumaa paganakan di tiagak nga nogi’ montok toinsanan mogiigiyon Dusun Labuk.

“Kounsikohan tu’ minanahak gaa’ diti kumaa di tama’ ku…. Ounsikou oku sabab tinonggungan disio toririmo do poinhondom om otopot nopo, gaa’ diti agayo rati kumaa dahai om nogi’ mogiigiyon Dusun Labuk.

“Sabaagi sinakagon Dusun Labuk, kalansanan ku oinsanan dati (mogiigiyon Dusun Labuk) kaanu mi’iso’ ginawo, misokodung id koponuridongan songinan tinaru i okon nopo ko’ kalantoi om koburu’ idk opotundaan om pomusarahan nga poinggompi’ do nantadon tinaru sondiri’. Kada’ tokou lihuai nantadon tokou.

“Turianan tokou o tinaru suai i nokoburu’. Taamon tokou pogoyuon di mogiraratu’ om osolon…. Manahak sokodung, monguhup gisom agaasan, mooi do tinaru tokou kotilombus koburu’ om kotopong di suai,” ka disio ontok rinomut do New Sabah Times.

Naamot dino i tanak kotuahan di tiagak, i Christina, pinopolombus do kosuduon dau di gaa’ pinatahak kumaa di tama’ dau.

“Amu’ ku miniiman do oonuan i tama’ ku do gaa’ Bulawan Sigah. Ounsikou om osudu’ yahai sabab oilaan dahai do i tiagak opoduli’ kopio di koburuon do tinaru tokou Kadazandusun.

“Tulun Labuk toririmo posuulon dau. Montok disio, tulun Labuk nopo nga’ paganakan dau om otopot ilo’. Kotopotan nopo nga’ mogiigiyon Kadazandusun id Labuk toririmo do mogiulud.

“Kalansananku o mogiigiyon Kadazandusun kotilombus koburu’ id toinsanan kaganaan kaampai no koubasanan om nubasanan tokou.

“Id koobian do paganakan di (Datuk) Paul Baklin, insan oku po do mongunsikou kumaa KDCA sabab minanahak kapamagaa’an kumaa dau,” ka disio.

Naamot dilo’, oondos po nogi’ i Christina kokito kinoburuon do mogiigiyon Dusun Labuk.

“Sukod wagu do babaino’ diti mongupus nodii do koubasanan tokou (Dusun Labuk). Oondos oku kokito pinggisaman diolo’ do popoburu’ om papabantug seni om tungkusan Labuk miampai amu’ managak do kointutunan koubasanan tinaru diti,” ka disio.

I Christina nopo nga’ moninimpuun do ‘Baju Labuk’ ilo’ nopo nga’ posokoton koubasanan Dusun Labuk i pinointutunan id Kampung Kuala Sapi, Beluran di toun 1980-an.

Mantad no do pongunsuban di tama’ dau, minonimpuun yau do pinggisoman miampai minomuruan sontinimungan koonduan do momonsoi Baju Labuk i babaino’ diti nookunan sabaagi kointutunan mogiigiyon Dusun Labuk.

Ii Christina om tadi’ dau i Alice, ogumu’ po nogi’ ponguhupan kumaa monunurat pointonod di tolu toun nakatalib di maso do monunurat minomonsoi ponorisidan kokomoi kinolumison do koubasanan mogigiyon Dusun Labuk om posokoton koubasanan, ‘Baju Labuk’.

Kapamagatangan diti otopot nopo nga’ kopongunsub okon nopo ko’ koisaan KDCA nga nogi’ kotinanan poinpoopori miagal do Koisaan Kosonian om Tungkusan Labuk (LaSTAGE) id pinggisaman momogompi’, popoinggayo om popointutun tungkusan koubasanan mogiigiyon Dusun Labuk.

Amu’ olimon do okon ko’ gaa’ i pokimamahaan, nga’ mantad do koinggoritan di nawaya’an, apatut o tosoosongulun i kitonggungan do gatangon om unsikohon.

   
Email Print
   
 
 
E-browse