|
|
|
NOUMBAK TINIHIB IBUT...Yahya (tanga) minooi intong kozuzuvo taap do hamin di Abdullah Hasim, id nomboo do tihihib ibut tohogod o taap dino.
|
17th May, 2008
KOTA KINABALU: Au kotumbozo o Sabah do gatang vagas nudal, kaampai no vagas topuak do poompungon tu 70 piatus mantad vagas id pasalan id pogun Sabah diti nopo nga vagas nudal.
Minoboos i Kumoduvo Vovozoon Montili Sabah, i Datuk Seri Panglima Haji Yahya Hussin do: “Au tokou mimang kopongompungan diti do kopolugi touvi do momomoguno id Sabah om kotongob tokou nogi do kapasabap iho do gatang vagas minsavat”.
Mantad digo, mokianu zou do Kopolintaan Hongkod do mogium lahan tavasi kozo montok papatantu gatang runcit koonuan montok vagas nudal id gontob tapatut,” ka disido.
Minoboos isido diti kuminaa doid magaganu abal di kahapas kinapataakan sakadai kuminaa doid munggui ibut tohogod id Kampung Contoh, Petagas, somok doid di koniab.
Yahya, isido ponogi i Montili Pomutanaman om Pomounan Taakanon Sabah, kipomusaavan do kopoompungan diho nopo nga kopogovit kokikitanai do gatang vagas topuak di nudal id Sabah, pisosoomo do koinsavat hobi kinavas mantad gatanf do babaino.
“Kopoompungan diti nga kapasabap nogi do momomoguno ngaavi id Sabah do aiso pomihian suvai om asansagan momohi vagas topuak di nudal tu vagas kinoizonon nopo nga koponguasa noopo 30 piatus no pasalan id Sabah,” ka disido.
Katatapan montok papaampung gatang vagas nudal, kaampai no vagas topuak Thailand id Semenanjung, Sabah om Sarawak nopo nga sabaagi iso mantad himo haang di pinoboos di Huguan Montili, Datuk Seri Abdullah Ahmad Badawi, montok monguhan gatang paai om vagas.
Haang suvai nopo nga kaampai no popotindooi vagas Super Tempatan 15 piatusm di tamangan o gatang dino id piahatan do RM1.66 so-kilogram gisom RM1.80 so-kilogram tumanud zon; papatatap gatang siling Super Special Tempatan 5 piatus id gatang do RM2.80 sokilogram om Vagas Super Tempatan 10 piatus id gatang do RM2.70 sokilogram (tumimpuun ontok o 1 Vuhan koonom 2008).
Suvai diho, papavasa nogi kopodohinan paai id piahatan do pogun miampai muubuzu om popoinsavat Gatang Minimum Terjamin (GMP) mantad RM650 iso tan kumaa do RM750 iso tan.
Naamot diho, Yahya, i tinanud di Monunuat Pulitik disido, i Haji Mahlan Haji Zinin, Kumoduvo Huguan Umno Boogizan Putatan, i Haji Abd. Kahar Mohd Zain, Upisol Uvang Putatan, i Ag. Abd Ghani Pr. Yusof, miampai do buuan ngaavi mogigizon posoihi do tuminombuhui munggui ibut tohogod om pinataak sakadai kuminaa doid mogigizon do kampung di nogompitan.
|
