Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Hyatt Regency rai 59 kanak-kanak sempena Krismas |  Alyssa Dezek Selebriti kanak-kanak serba boleh |  190 mangsa terlibat simulasi hadapi banjir |  WCS berkonvoi ke Pantai Timur sambil membuat kebajikan |  Kem Sahsiah Guru perkukuh jati diri |  Jabatan Bomba dan Penyelamat Labuan tingkat hubungan dengan media |  IKM tawar kursus Pacuan Empat Roda pertama di Malaysia |  Polis tahan dua lelaki terlibat kes samun bersenjata |  Polis berusaha jadikan Tenom selamat, bebas dadah: DSP Firdaus |  Industri koko antara komoditi penting sumbang pendapatan negara: Nuhaini |  Towards producing a golden generation |  Stroll in the park for Penampang girls |  Ball in Mafry, Ronny’s court |  Keningau girls register second consecutive victory |  Homes razed, 27 firefighters’ help halt more costly damage | 
 Kadazan Dusun

Freddy Harmthon tumilombus mimparagat id kaganaan momolihis

12th August, 2017

Di JOANES ROBERT JOHNNY

KINATANGKANGAHON sabaagi songulun pakakaraja’ koporintaan naamot do minongoput balajaran doid iso’ univositi nokoiyonon amu’ kapangantob di Freddy Harmthon montok tumilombus momuburu’ seni.

Mononorimo Gaa’ Artis Wagu Dusun Bohogian Kusai Bobos Tabantug 2015 KDCA om tukad Kotolu id saalom pialaan pomupusan Bontugan Sinding Dusun (JLD) RTM Sabah VFM 2014 dilo’ sotopot kopio amu’ insan tingkod do modsuupu’ sinding katalib do piipiro linaid aiso’ habar.

Susuminding sinding i roitan do ‘Suni Tupusku’ dilo’ babaino’ diti minaganu koutusan montok mundorong mantad nunu nopo karaja’ om abaabayan id saalom Koisaan Artis Nokoiyonon Sabah (PERTISA) montok manahak kopomodulionan poinponu’ kumaa balajaran disio id kaganaan ‘Master Of Occupational Safety And Health Risk Management’ doid Universiti Poingukab Malaysia (Open University Malaysia).

Ontok do rinomut Momolihis NST di kawaawagu diti, minangakun i Freddy do kakal po isio do aparagat modsuupu’ karya seni id hombo wokon mantad sinding kawaawagu sinuupu’ disio i asasaru’ no do opirongou-rongou id rodiu nopo babaino’ nga’ miagal ‘Tupusku Poinggirot’, ‘Tupusnu Mumbal Sumuai’, om ‘Natabas Tukad Piginawaan Toh’.

Toririmo mogihum ralan

“Sundung pia tu osibuk balajar maya’ do program Pendidikan Jarak Jauh (PJJ), kakal oku po do kaanu mogihum timpu tosimbayan montok modsuupu’ sinding sabaap kaganaan tuunion nosiliu no do korohianan ku mantad di tokoro’ po,” ka disio.

Potunud Kotorinaan FH Production dilo’ baino’ mimparagat po nogi id saalom karaja’ studio disio id kaganaan pamagambaran video po tu ko’ sinding, id hombo sompopori nopo isio do sumiliu sabaagi juruteknik id sesi pamarakaman nokomoi.

Montok rekod, FH Production nopo dilo’ nga’ iso’ studio pamarakaman poinsanganu di Freddy i poinsumpak hilo’ id watas Putatan, koposodia’ po nogi’ kotorinaan jurufoto om magaganu video montok mogisuusuai abaabayan.

Kumaa isai-isai i orohian montok mokianu kotorinaan diolo’, milo po nogi’ do rumomut disio maya’ do WhatsApp (019-3009618) toi email fhproduction79@gmail.com toi sumolowot po nogi’ laman sosiol Facebook diolo’ id https://www.facebook.com/FHProductionstudio/.

“Sotopot nopo kopio, karaja-karaja’ diti momoguno kopomodulionan om totopot mongudipon, nga’ osimbayan oku nogi’ do pakaraja; sosongulun miampai aiso’ ponodosan,” ka disio.

“Nunu i kiguno nopo nga’ pamalanan di oulud om jodual i kiguno do maan tonudo’ suai mantad ko’ osotol momonsoi laang montok manantu’ palan tokou oulud lolobi no id saalom jodual pamansaiyan tuunion om suntingan gambar toi video.

Suai mantad dilo’, babaino’ diti, aparagat po nogi’ i Freddy do modsuupu’ sinding minding sindingon di tongo’ modisisinding wagu i orohian, om baino’ haro no piipiro no sinding disio nosinding piipiro tulun artis Sabah.

Nuhot id kokomoi palan montok album wagu, ka disio, ontok nopo timpu diti kakal aiso’ palan montok poposoliwan album wagu (solo) nga’ masa’an po nogi’ id saalom laang papaasil album kompilasi miampai piipiro koombolutan artis suai id saalom studio rakaman i miagal (FH Production).

Kobolingkahangan ‘cetak rompak’

Moboros id kokomoi kobolingkahangan i haro id saalom kaganaan momolihi snokoiyonon babaino’, ka disio, olunggui tomod ginawo disio miampai kokitanan om koyuyuoan babaino’ i montok nopo disio nosiliu no do ‘kanser’ kuminaa pomurunan nokomoi i komoyon do ‘Cetak Rompak’.

“Sorohon nopo boribu ringgit aawi’ tokou montok poposoliwan iso’ album aiso’ rati sabap haro bohogian aiso’ tinonggungan i popogumu’ album toi karya-karya tokou katalib do piipiro linaid do pinosoliwan. Ka disio, haro bohogian i maganu kosiwatan miampai poporumpos koinsanai video Karaoke diolo’ id hard disk montok padagangon miampai aiso’ kasaga’an mantad di tongo’ artis, ilo’ no i nosiliu sabaagi ‘lanun’ cetak rompak nokomoi.

“Nung koyuon miagal diti otilombus, amu’ tokou no osuaiyan nung id timpu-timpu sumonu’, aiso’ no sinding toi album artis nokoiyonon Sabah anu do polobuson sabap nubasanan cetak rompak diti,” ka disio. Montok dilo’, minongunsub om mokiinsian po nogi’ i Freddy kumaa koinsanai mononokodung om pominat sinding nokoiyonon Sabah do amu’ momoli CD toi DVD cetak rompak, nga’ momoli mantad diolo’ (artis) sondiri’.

Artis kinoiyonon mantad watas Kiulu diti pikiikiro do sumuti’ mantad nunu nopo abaabayan id studio mantad ko 14tw diti montok manahak timpu kumaa balajaran disio montok tumoguang poporisaan Semester 3 ontok ko 20 om ko 23tw diti, nga’ kakal po monorimo kopokionuan kotorinaan.

I Freddy babaino’ nopo diti nga’ kiharo duo album solo i kitulu ‘SuniTupusku’ om ‘Sodop Pitongkiadan’ om iso’ po album tinimungan miampai PERTISA i kitulu Pertisa EVO.

   
Email Print
   
 
 
E-browse