Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Hyatt Regency rai 59 kanak-kanak sempena Krismas |  Alyssa Dezek Selebriti kanak-kanak serba boleh |  190 mangsa terlibat simulasi hadapi banjir |  WCS berkonvoi ke Pantai Timur sambil membuat kebajikan |  Kem Sahsiah Guru perkukuh jati diri |  Jabatan Bomba dan Penyelamat Labuan tingkat hubungan dengan media |  IKM tawar kursus Pacuan Empat Roda pertama di Malaysia |  Polis tahan dua lelaki terlibat kes samun bersenjata |  Polis berusaha jadikan Tenom selamat, bebas dadah: DSP Firdaus |  Industri koko antara komoditi penting sumbang pendapatan negara: Nuhaini |  Towards producing a golden generation |  Stroll in the park for Penampang girls |  Ball in Mafry, Ronny’s court |  Keningau girls register second consecutive victory |  Homes razed, 27 firefighters’ help halt more costly damage | 
 Kadazan Dusun

Morobuat toi momoli wagas?

11th August, 2017

Di JOANES ROBERT JOHNNY

“SUAI di gulu, suai nodii baino’”.

Ingkaa no kokitanan toi koyuyuon id watas labus kakadaiyan doid pogun Sabah babaino’ lolobi no id kinoiyonon kampung i popoindalan nubasanan momumutanom.

Morobuat, mindahu’ toi ko’ kumaraja’ id dumo sotopot do iso’ nubasanan i poindalanon di tongo’ mogiigiyon kitinaru Kadazandusun toi ko’ tulun Mamasok suai sabaagi do buburuon sangaangadau diolo’ di gulu po.

Nga’ baino’, abaabayan miagal ilo’ miagal do nosiliu sabaagi do iso’ abaabayan montok po do momonu’ toi monuang do timpu, om orosian tana’ diolo’ do kologos, nga’ okon nodi ko’ sabaagi intonodon poinbida’ kopogogonuan diolo’ sabaagi momutanom.

Nung di pogulu, manananom parai sotopot do iso’ intonodon poinbida’ sobohogian di tongo’ mogiigiyon id labus pogun di gulu po om nosiliu no do iso’ koburuonan poinbida’ toi oponsol do maan indalano’, nga’ baino’ koyuon dilo’ nokosimban nodi, amu’ nodi miagal di gulu.

Nga’, haro po nogi’ i kakal po mongusaha’ tana’ toi dumo diolo’ tu’ mamantang yolo’ kumaa nunu i pinotungkus mantad molohing kumaa diolo’, om haro i mongoi porobuat montok no do mongumbal ‘parai wagu’.

Haro po nogi’ tulun i kiharo ronohon diolo’ sondiri’ nga’ orohian nogi’ do mongoi indahu’ id dombokon tu’ amu’ kasaga’ do manamong dumo disio sondiri’ solinaid do timpu pagandadan gisom do onsok parai.

Baino’ nopo, okito tokou id hombo-hombo kokompungan, haro nodi i momili’ do mongusaha’ tana’ ronohon diolo’ montok koburuonan suai, sabaagi kulam sada’ po tu ko’ pinologos tomod, om haro i lobi kadala’, maan diolo’ tarano’ kumaa tulun suai.

Di gulu nopo, aiso’ komoyon do mamagaji tulun suai do momonsoi iso-iso’ karaja’ id dumo sundung pia do songkuro pia ginayo i maan buato’ tu’ koinsanai dilo’ numaan buruono’ miampai nubasanan ‘mitatabang’.

Id saalom do ‘mitatabang’, oinggirot piromutan, miilang susuiyon, mogiolon sorita’ ponumpoirak, om lobi oponsol kaanu do mogiuhup-uhup kumaraja’, i tawagat kosiliu lobi agaan.

Ontok tangadau, maganu po nogi’ yolo’ timpu do mundorong om mogiulung-ulung do makan om rumirihat toruhai pogulu do mongoput karaja’, om miagal koubasanan, ontok sodopon di, oinsanan diolo’ mogititimung id walai di sanganu dumo montok mogiilang makan om moginum.

Nokosimban

Nga’ baino’, ointob-intob po dati’ id hombo haro tokito dati’ koyuon mogiindahu’ toi mitatabang id dumohon tu’ sompopori tulun haro nodi kosibukon diolo’ sondiri’ suai mantad ko’ momili’ do amu’ nodi morobuat.

Iso’ mantad sabap diolo’ do tumingkod morobuat nopo nga’ kinapagonan balanja’ montok mangaradu ronohon diolo’ tu’ momoguno nodi tongo’ misin miagal tarakto po tu ko’ kobuta om nogi’ pamagaji diolo’ tulun mongoi pananom toi moi pongomot.

Nung di pogulu nopo, okito tokou tongo’ tangaanak kampung hiti om hilo’ mimburutak do mongoi uhup di tongo’ komolohingan diolo’ do momonsoi karaja’ id dumohon kaampai no ngaawi’ karaja’ monompin po toi mamagamas, mindagus, monotok, mananom om mongomot.

Poingkuro pia, sabap no do naampawong tongo’ koinwoguonan pomogunan miagal gadjet om internet, okuuri’ nodi’ tangaanak babaino’ i orohian do lumintuhun id ronohon lolobi no mongoi ulok do burutak.

Komi tulun

Haro piipiro po nogi’ tulun i nuhot di Monuunurat NST minangakun do amu’ nodi kopomorobuat tu’ songingkaraja’ nodi ngaawi’ tangaanak diolo’ hilo’ id kakadaiyan tagayo toi id labus pogun, iri no tu’ osusa’ yolo’ do morobuat sondiri’ nung amu’ kosukup tulun do momuburu’.

“Nung intobon nopo, iri om iri gatang wagas om gatang pamayar tokou do tarakto toi pamagaji do tulun mongoi pangaraja’ do dumo tokou gisom do koomot, nga’ nung kakal aparu om agaras tinan, aiso’ sala’,” ka di James Robert, mantad Kampung Molisau Tenghilan id hombo minomili do amu’ nodi morobuat toun diti, nga’ pinopologos tulun suai do mongusaha’ dumo dilo’.

“Okitoku nopo babaino’, miagal siiso’ nopo kos koduo-duo diti, nga’ mimang no do haro kosuulan montok yolo’ i mororobuat,” ka di Gustin Gagah, mantad Kampung Bunga.

Songulun mongingia’, i James Sami, minoboros do, miampai kos mengaradu, momorisi’, gaji mananom om mongomot i nakapagon babaino’, mogot po nogi’ isio do momoli wagas id kadai, om isai i orohian do moniwa’ ronohon disio, alapon disio miampai ginawo poingukab.

I Jilias Lintar mantad Tamparuli, minoboros, nung morobuat tulun nga’ montok nopo do akanon sondiri’ mimang do aiso’ kosuulon, nga’ nung montok hontolon ‘komersial’, ilo’ somimang do osonong.

“Miampai haro kaantaban timpu, amu’ no songkuro agaras tinan, lolobi no miampai koyuyuon tawan babaino’ i amu’ manantu’, osonong nogi’ do momoli wagas id kadai,” ka di Jessie Manjin om i Florence Tigur.

Ka di songulun momumutanom, Boe Sindolun, 40an, nung insan-insan nopo isio do pomorobuat, asil nopo dau orikot gisom do duo toun, om osontob ginawo isio soira’ do kopuriman sondiri’ asil mantad tihis rongos sondiri’.

Id sabalik koinsanai komoi dilo’, haro po nogi’ kampung id pogun diti i kakal po do mongomoi do nubasanan mindahu do mongoi pomorobuat dilo’ sabaagi do iso’ koponsolan paganakan diolo’ sundung pia tu’ ongkikaraja’ toi nakapagon pia ngaawi’ balanja’ montok mongorobuat dilo’.

Miagal i nokito om nawayaan sondiri’ di Monuunurat di kawaawagu hilo’ id Kampung Narayat Tambunan, totopot do mongunsikou yolo’ sontob titahak mantad Minamangun tu’ kakal po yolo’ do aparu’ mangaraja’ tana’ diolo’, om lobi koimbayat, sunduan mogitatabang diolo’ siiso’ kampung toi sampaganakan totopot akawas.

Amu’ mongintob umur, tangaanak, komulakan po tu ko’ komolohingan nga’ kakal kisunduan takawas do mangaraja’ om mongusaha’ tana’ i tinungkusan do molohing diolo’.

Sotopot nopo kopio, kokitanan nubasanan morobuat toi mindahu’ miagal di laid dilo’ nosiliu no do iso’ kalangadan kumaa Monuunurat, lolobi no tulun i amu’ no insan ulok id dumo, nga’ kakal po siumbal ‘Parai Wagu’.

Nosiliu no do kalansanan, moi do otilombus no da nubasanan mororobuat, mindahu’ om mogitatabang id dumo dilo’ moi do amu’ atalup otolon timpu, moi do anu potungkuson kumaa sakag wagu dumontol.

   
Email Print
   
 
 
E-browse