Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Hyatt Regency rai 59 kanak-kanak sempena Krismas |  Alyssa Dezek Selebriti kanak-kanak serba boleh |  190 mangsa terlibat simulasi hadapi banjir |  WCS berkonvoi ke Pantai Timur sambil membuat kebajikan |  Kem Sahsiah Guru perkukuh jati diri |  Jabatan Bomba dan Penyelamat Labuan tingkat hubungan dengan media |  IKM tawar kursus Pacuan Empat Roda pertama di Malaysia |  Polis tahan dua lelaki terlibat kes samun bersenjata |  Polis berusaha jadikan Tenom selamat, bebas dadah: DSP Firdaus |  Industri koko antara komoditi penting sumbang pendapatan negara: Nuhaini |  Towards producing a golden generation |  Stroll in the park for Penampang girls |  Ball in Mafry, Ronny’s court |  Keningau girls register second consecutive victory |  Homes razed, 27 firefighters’ help halt more costly damage | 
 Kadazan Dusun

Kougaan id Marawi: 232 tuhun nagakom do Esscom id uvang Esszone

100817-lead-1

10th August, 2017

Di MARRYAN RAZAN

KOTA KINABALU: Uvang Koumohigan Poimbida Disan Kohisaon Sabah (Esscom) nakapamagakom 232 tuhun ontok Kalaja toi Operasi Misompuu id kinoizonon dinda do Zon Toumohig Kohisaon Sabah (Esszone) mantad di kinaantakan kougaaan id pulou Marawi, Koibutan Filipin.

Minoboos i Vozoon Montili Sabah, Datuk Seri Musa Aman, do pinamagakaman diho asil mantad 6,188 ponohinuvan id kinoizonon dinda do Esszone.

“Pinopoimpaagat nogi o Esscom do ponoihian pomolisaan om pinapapanau piipio pinamagakaman id hivang daat i minaan do oginsi ngaavi koumohigan om kopokuasaan id uvang Esszone ontok timpu ponuu muvung i pinokuasa mantad po di vuhan Kohimo gisom vuhan Koonom 2017,” ka disido di ontok pangan tudizo sisimban id pitimbungakan Hintuun Koundangan Pogun (DUN) Sabah, id Hinominon Hintuun Koundangan Pogun, doiti di koniab.

Noboos disido iti di ontok minonimba tudizo di Puu Hintuun Koundangan Pogun (Adun) Bongawan, Datuk Mohamad Haji Alamin, i minudizo nunu haang timpu tonibo om tanau i nanu om pisosoomo onuon do boogizan Esscom montok monguhan tundoonok kosuangon do layat songkosuvazan maza daat binuzu kougaan id pulou Marawi, Koibutan Filipin.

Minoboos i Musa do binuzu kougaan id pulou Marawi, pinapapanau o Esscom do mogisuusuvai haang kaampai no haang timpu tonibo, iho nopo nga popoingkavas panamangan id kavaigan pivohitan miampai ponoihian intensif om papapanau “coordinated patrolling” miampai do tinimungan koumohigan Filipin.

“Pinopoingkavas nogi o Esscom do ponoihian om pomolisaan id kinoizonon di natantaman hivang tindahon do modidikot aiso kavasaan (PTI) id Esszone miampai pinapapanau Operasi Misompuu.

“Suvai diho, pinopoingkavas o Esscom do panamangan om pomolisaan id vavazaan ngaavi sumuang om humabus i noimagon miaga do tutubpoon kapal om lolokiton id Esscom,” ka disido.

Minoboos isido do suvai ko diho, kopolintaan maza Esscom nga maganu nogi piipio haang timpu tonibo om timpu tanau montok monguhan tundoonok kosuangon do layat songkosuvazan maza daat.

Ka disido, montok monguhan ahal ngaavi koumohigan id pivohitan pogun, haang timpu tanau di nanu nopo nga papaanjul pionitan tohu pohudon, “Trilateral Cooperative Agreemant (TCA)” id piahatan do pomogunan Filipin, Indonesia om Malaysia.

Minoboos isido do maza piangazat diho, tootohu pomogunan nokomoi kotumbozo monuidong do “High Level Committee” montok monguhan ahal koumohigan pivohitan id piahatan do pomogunan.

“Tootohu pomogunan nga kotumbozo nogi monuidong do Hongkod Informasi Misompuu (kaampai no piahanan upisol id piahatan pomogunan) montok popoingkavas do “marine domain awarenes” montok piomungan kopoihaan id piahatan pomogunan, pinguhdaan kitimpu id piahatan do pomogunan montok monuidong do “inter-operabilitiy” om mamantod pisokodungan ponohinuvan id piahatan do pomogunan,” ka disido.

Minoboos i Musa do ontok di ko 19 vuhan Koonom nakatahib, minonoidong o kopolintaan do Maritime Command Centre (MCC) i poinhongkod id Bongao Filipin, Takakan Indonesia om Tawau Malaysia, kitoguvangan sabaagi hongkod ponimungan data om kooridnasi panamangan tohu pomogunan montok popoingkavas koumohigan do kavaigan.

“Hongkod diti nonuan kalaja popisamo kapanaon do kapal vaig ngaavi id kavaigan Kohisaon Sabah, hobi no id Daat Sulu om Sulawesi id pinggisoman mangantob tapanazan lanu om nogi panazangan id uvang nokomoi,” ka disido.

Minoboos isido do ontok ponogi diho, piipio haang topulokis om ponginsomokan pinapanau do Tinimungan Susumangod Malaysia (ATM) id siibo do Markas Tinimungan Kalaja Sangavian 2 (Markas Angkatan Tugas Bersama 2) doid ponguhanan ahal kosuangon hobi no do layat songkosuvazan om manamong pivohitan pogun id Disan Kohisaon Sabah.

“Vookon haang panamangan om panahoban diho nopo nga pomo’uangan aset Susumangod Daat Diraja Malaysia (TLDM) mantad tohu kapal kumaa onom kapal i tumoina id uvang operasi Op Pasir.

“Optimum do kalaja ponoihian tohu Sea Basing, iho nopo nga Bunga Mas 5 id kavaigan Kudat, Kapal Auksilari Tun Azizan id Kavaigan Pulau Taganak om Bantaan Daat Tun Sharifah Rodziah id Kavaigan Beting Bodgaya id posoihi Kavaigan Pulau Bohey Dulang,” ka disido.

Ka vagu disido, ponginsomokan suvai nopo nga pomo’uangan aset ponongkisangod mantad TLDM id nomboo tohu kapal pinoizon id sektor koiso, naamot do duvo kapal id sektor koibutan.

“Markas diti popotoina soginumu 13 radar id po’ompus Kavaigan Kudat gisom id Kavaigan Pulau Danawan. Pongumbanganan gagambalan poumbanganon potoguvang pivohitan Malaysia-Filipin id nomboo tikid radar ginonop do sistem Observe Camera.

“Sistom kamera diti pinoingkavas vinasi di vuhan Kohimo miampai muubuzu montok manaak kokitanan di hobi atalang montok padau om kapal di tumahib do pivohitan pomogunan,” ka disido.

Minoboos i Musa do suvai ko pinopoizon do puu susumangod dinda id pulou ngaavi doiho id uvang operasi, markas diti nga popoizon nogi do puu Quick Reaction Force (QRF) om nogi padau ponongkisangod id kinoizonon strategik montok tuduvan monohibang, momolisa om manaan nunu noopo padau di kovoizan i humabus om sumuang maza pivohitan do Malaysia-Filipin.

Minoboos isido do Esscom om tinimungan koumohigan suvai tomoimo kogompit id pinggisoman mongiho kozo do kotoonongan id uvang Disan Kohisaon Sabah do tomoimo atamangan do kosindakon do layat id pogun Sabah diti do otihombus ajamin.

   
Email Print
   
 
 
E-browse