|
10th May, 2008
TAWAU: Iso’ hamin papan novuvu id suang kinantakan kinotutudan id iso uvang kokompungan, id douvi Taman Dingin, Batu 1 Jalan Apas Tawau, di minsosodopon koniab.
Upisol Kalaja Bomba om Manampasi Tawau Aziz Zakaria @ Johnny Oyong minoboos, boogizan disido nokotoimo luputan kinantakan dino di kuang hobi jam ko 2.14 minsosodopon om tuutulus dino minonuu duvo injin momisok tapui miampai do 12 puu naabo-abpo kuminaa tampat kinantakan.
Ontok nokoikot ka disido, hamin dino id koozuzuvo do notutudan di nokosindab nodii kozo om au naanu minanampasi, nga boogizan disido nakahantoi minanahob tapui mantad kalalad kumaa hamin poindodoos.
“Tapui nahantoi do minomisok kuang hobi himo minit kahapas dino,” ka disido.
Tumanud di Johnny, aiso kiniopon nokoundun toi ko nosinduahan, nontodonon om ginumu kinolugian kakal id koponoizukan.
Id suang ahal kogompit, Johnny ontok nasamaanan nga minamason mogiigizon mooi do tomoimo miingat-ingat ontok momoguno nuununu koumatan lotilik toi ko pagansakan, miampai do au monoodo kopoputan lotilik id lahan aiso kasagaan.
Iti saasabap no do kantakan miaga dino koovit do antakan kohigaganan kotutudan.
|
