|
10th May, 2008
KENINGAU: Koupisan Pomuvoigan om Pamapasan (JPS) momoguno kosokodungan id tinimungan buuan ngaavi mogiigizon om mogiigizon kampung montok kaanu nodii kalaja ngaavi monuhid bavang do todoon tumanud ikoton kalaja tootopot.
Injiniol JPS id doiti Abd. Rahim Abd. Rahman minoboos, sokodung mantad buuan ngavi mogiigizon kiguno kozo montok kaanu nodii kalaja ngaavi monuhid bavang kaampai no kapanadaan vokok danau aanu monoodo miampai tavavasi.
Ka disido, somoonu kivaa nogi uvang i asansagan do popoundun montok dodizon vazaan bavang nga ino koovit ogumu kovosian kumaa mogiigizon kinoizonon.
“Nung aiso kalaja mantad buuan ngaavi mogiigizon om mogiigizon i kogompit pointantu no do kalaja ngaavi monuhid bavang montok modihin kopiangan id uvang i kikantakan takavas miampai sangod opiang i au aanu do monoodo,” ka disido ontok tuminombuhui uvang atag kopoundohian bavang Pampang om projik popoinsavat ningkokoton vokok kopohuzungan kumaa danau Kg. Buluh Silou, Kg. Masak om kampung ngaavi di poindoos.
Babaino diti ka disido, sokodung id tinimungan buuan ngaavi mogiigizon avasi kozo nakaanu nodii kalaja ngaavi ikogompit miampai kopohuzungan monoodo miampai tavavasi.
Sundung i do ingkaa Abd. Rahim minoboos, boogizan JPS hobi miingat-ingat id suang kapanadaan vokok tu ino kopogompit uvang danau toi ko kopohuzungan kulam nung kahabazan dino kohobi.
Nokotindapou nogi Popobuu Mogiigizon Liawan Tam Thau Fatt, Kapitan Michael Liew om Mohoingon Kampung (KK) Kg. Masak Ungut Linitok om Mohoingon Kampung Bulu Silou Petrus Linitok.
Kinotombuhuzan New Sabah Times id poompus bavang Pampang kalaja ngaavi monuhid bavang i nokotoguvang do greg ontok di ko 26 Vuhan Koopod om Duvo 1996 om kalaja ngaavi popoinsavat ningkokoton vokok danau nga manaak vaig kulam mogiigizon id Kg. Bulu Silou, Kg. Masak om posoihi dino maamaso todoon.
Id suang kobuuon i suvai Panakadai Montili Kotundaan Dahabus Kakadazan Datuk Haji Sairin Haji Karno mokianu Koupisan Kalaja Pindahanan (JKR) monoina miampai tosisikap tisan i nopiang id talun alun Masak i nokopoundun kiniopon songian iso padsakazan Kancil nokotudok id tampat dino di toun nakatahib.
Ka disido, tisan nopiang dino mositi todoon do tosisikap tu ino kohigaganan kumaa momoguno talun alun dino.
“Au tokou mimang kaantakan palit i nantakan kumaa songuhun mantad paganakan i nogompitan miampai kohigaganan id tampat dino,” ka disido miampai minobos do paganakan di nogompitan i nokoundun kavasa maganu haang undang undang kumaa kopolintaan mazaa kuut.
Mantad dino ka disido, boogizan dino apatut maganu haang tosikap monoina tisan nopiang dino mooi do ahal di au osoou au ouhit.
Mogiigizon id uvang dino nga mongunsub mooi boogizan dino maganu haang tosikap miampai kantakan tisan nopiang i ahaid no nokohogos dino.
|
