Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Io’ Keewon dii Carl mongunsikou nakaanu kosiwatan |  Keewon dan Carl syukuri peluang persembahan di Mrs Borneo Queen 2018 |  Keningau tuan rumah pelancaran Kaamatan Peringkat Negeri: Pairin |  Graduan UMSKAL johan Pertandingan Pidato 1Malaysia |  TLDM anjur Program Interaksi sempena Hari Ulang Tahun ke-84 |  Bayi baru lahir ditemukan di pintu pagar masjid |  APMM pintas 12 PATI di perairan Kinabutan |  Mansuh GST akan buat defisit fiskal meningkat: Madius |  Rozman yakin BN Labuan kekalkan momentum menangi PRU14 |  Mahkamah tolak saman minta PM bentang persempadanan semula di Sabah |  Najib peraku hak Sabah dilaksanakan, kata Zahid |  BN akan terus bangunkan Sabah dan Sarawak |  Kedah unseat Junior Rhinos |  Setback for Sabah Rhinos |  K2 and Tritonic for Borneo Marathon | 
 Kadazan Dusun

Tilombuson nubasanan sopitimbang om sopiulud

17th July, 2017

RANAU: I Puru Parlimen Ranau Datuk Dr Ewon Ebin minongunsub di toinsanan mogiigiyon id pogun diti do toririmo minggoogonsuhatan, sopitimbang om tumilombus popoluhub nubasanan sopiulud i nakasansad.

Ka disio, koyuon miagal dilo’ kiguno tilombuson sabaagi posunduran do pinggisaman momogompi’ om mamajamin kotoronongon pogun om nogi’ mogigiyon orurukut tinaru om ugama’.

“Montok mamajamin do koposion di oulud om otoronong id pogialatan tinaru doid pogun diti, kiguno tokou do miiso’ ginawo magada’ nunu-nunu pomusarahan mindaadala’ i korikot mantad labus i mumbal do mongurias tinaru om ugama’ dati’ sompoopori,” ka disio.

Amu’ olimon do timpu potootohuri diti, haro nopo pangampawong taraat mantad labus i sumuang doid pogun diti om momurilong do pomusarahan mogiigiyon kituduan mamabak pisompuruan pogialatan tinaru, ka disio kawagu.

Pinointalang disio do ahal kopogoduhan pomogunaan ‘Allah’ id nayatan mogigiyon okon Islam di piipiro toun nakatalib nopo nga’ poiradan do pomusarahan om nubasanan di poindala’ mantad labus i moningkau do mogiigiyon.

“Kuri’ po om komilo o lalansanon do minanalasai dilo’ miampai pinapasaga’ do pomogunaan pongundadait nokomoi montok mogiigiyon okon Islam id Sabah om Sarawak,” ka disio pinoposotol.

Nangatan po nogi’ di Ewon o mogiigiyon do maganu ponontudukan mantad atag di bagas Boyoon Montiri Sarawak i Adenan Satem i pinoposotol do koubasanan mogiigiyon Sarawak nopo nga’ montok Sarawak om ingkaa po nogi’ o koubasanan do mogiigiyon Sabah om Semenanjung nopo nga’ montok koubasanan sompoopori.

Minoboros isio dilo’ di ontok pinopoimagon do ababayan ‘Santai dan Hari Raya’ miampai Puru Parlimen Ranau, pinaanjur do Umno Raan Kampung Bongkud Namaus, Longkod Watas Mongundi’ (PDM) om Ikataran Relawan (RELA) Mukim Bongkud id linimput Koperasi kampung dilo’.

Naamot dino i Ponorikohon Manganganjur, Wainsing Gamalid i po nogi’ Luguan Raan Umno kampung dilo’ pinopoilo do ababayan nopo dilo’ nga’ i kumoinsan nogi’ poonjuro’ katalib do kinapamaramaian mongukab puasa’ di wulan Ramadan nakatalib.

Ka disio sundung do okuri’ o mogiigiyon kiugama’ Islam id kampung dilo’, nga’ mantad no do pogipapantangan om pisokodungan tosonong pogialatan mogiigiyon i kogumuan kiugama’ Kristian, nakaanu yolo’ do pinapaanjur kararamaian nokomoi.

Naamot dino i Luguan PDM Bongkud i Pastor James George id booboroson disio lumansan do piuludan mogiigiyon kampung dilo’ lobi po koinggirot do timpu-timpu dumontol.

Minamangun mokianu dati’ do masi id piuludan, kanou tokou monumboyo’ dilo’ miampai sumanganu pogoogoyuon tosonong id koposion om nogi’ buburuon tokou do potitikid tadau, ka disio.

id ababayan po nogi dilo’, pinopotoluod i Ewon do taakanon montok tulun nongolohing om i amu’ songkuro kohimbogui doid kampung nokomoi.

Nowit po nogi’ isio do minooi intong di linimput Longkod Internet 1Malaysia id kampung dilo’ i nokopongo om noukaban di toun 2012.

Nokotindapou po nogi’ id ababayan dilo’ i Luguan Tinimungan Komulakan UPKO Nasional Arthur Sen, Upisor Poinida Parlimen Ranau i Japirin Sahadi, Upisor RELA Ranau Awangku Damit Pengiran Yusof, Monunurat Karaja’ Parlimen Dallius Ubin, tono’ upisor koporintaan om lalansanon nokoiyonon.

   
Email Print
   
 
 
E-browse