Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Patuh prosedur kuarantin sebelum bawa masuk tumbuhan ke Sabah |  Dancing tourists at mosque – ministry weighs in |  SATTA to investigate viral video |  Ban by Likas mosque; no thanks to China tourists |  ‘Mixed blend of hulksters’ |  Brilliant Sabah U-19 squad notch up full points |  16-year-old Jessica shines again |  Deadly pest threat |  Kotinanan ngaavi kohigkangan natagan sumikap lijistol, monginvagu lisin: Yeo |  Tonudo prosedur kuarantin poguhui mogovit sumuang kavo poinsuni: Junz Wong |  Tutumombuhui tagahon naamot timpu momiombo id Mosogit Kakadazan Tagazo Kota Kinabalu |  KPLB papavakas Abaabazan Ekonomi Desa id Kadamaian |  Kebajikan, keselesaan rakan jadi keutamaan kerajaan baharu: Dr Daud |  Pelancong dilarang masuk melawat masjid untuk sementara waktu |  APM buka Pejabat Unit Pertahanan Awam di Pulau Sebatik | 
 Kadazan Dusun

Kotonudan do ‘Kokol Nature Adventure Ko-3 do ko 24tw Kosiam 2017

19th June, 2017

Di JOANES ROBERT JOHNNY (joanes@newsabahtimes.com.my)

KOTA KINABALU: Oinsanan i orohian do tumanud id pialaan tongkusan Kokol Nature Adventure (KNA) Edisi Ko-3 alapon do rumojisto id pialaan nokomoi.

Bohogian mangaanganjur mantad Casero Events, maya’ di Mononorina Potunud diolo’, i Steve Johnny Mositun minangalap oinsanan i orohian do tumanud id pialaan dilo’ i maan pohoroo’ ontok ko 24tw Kosiam diti.

Abaabayan i notimpuun mantad di toun 2014 po dilo’ miampai ngaran id timpuunon po nopo nga’ Kokol Duathlon Challenge, suminuang toun kotolu kinopoonjuran dau toun diti.

Di gulu po, suai mantad ko’ tumangkus, oinsanan tutumanud kiguno do mogihum tiso’ diolo’ ud hombo, songulun asansagan do tumangkus om songulun po kaagu sumakai bosikol gisom do opupusan.

Nga’, katalib do nakaanu kinopomungaranan kaagu, miampai ponuangan tumangkus nopo, sinimbanan diolo’ ngaran pialaan dilo’ kuminaa Kokol Nature Adventure di.

Miampai kinolumison kokitanan id poompus waya’an doid kinoiyonon tongkusan dilo’, loolobi po dilo’, somimang kikoimbayatan po nogi’ pialaan dilo’ miampai linumis kokompungan i awaya’an diolo’ id poompus timpu do tumangkus.

“Maan tokou tilombuso’ i kategori toi abaabayan pialaan 17km route montok koduo-duo bohogian tondu’ om kusai poingukab (18-39 toun) id hombo i kawaya’ kokompungan i kibawang bobos i kapanahak diolo’ do kaantaban, naamot po nogi’ kawaya’ nuluhon i otidong, toi ralan tumakad Kokol.

Naamot dilo’, ka disio, montok bohogian Kusai/Koonduan Veteran (40 poingkawas) pikiikiro do maya’ id ralan kisinodu’15km i amu’ kawaya’ do bawang.

“Ounsikou tomod tokou soira’ do kaanu koponguhupan mantad Villaku Boutique Homestay sabaagi kinoiyonon poinbida’ tokou toun diti montok di ko 4 toun misusuhut.

Miagal toun nakatalib, abaabayan dilo’ nakaanu po nogi’ kosokodungan di Lalansanon Kopotundaan Mogiigiyon (PPM) N.13 Inanam, i po nogi’ Luguan Parti Bersatu Sabah (PBS), i Fredolin Totin sabaagi mangaanganjur koduo.

“Mantad koponorinaan Casero Events, mongunsikou yahai kumaa di Fredolin maya’ di sakadai om nogi’ koponguhupan bohogian disio mantad po di toun 2014.

Ka disio, sabaagi mangaanganjur i asaasaru’ momoguno Kampung Kokol sabaagi kinoiyonon montok kopoonjuran abaabayan dilo’, ounsikou ginawo diolo’ do kokito ogumu’ kinosimbanan id ahal do abaabayan kinotombuluiyan hilo’ mantad po di toun 2014 om ilo’ nosiliu sabaagi visi om misi diolo’, id hombo Kokol pikiikiro no da do kaanu monorimo ginumu’ tutumombului mantad labus pogun.

“Kaanu po nogi’ iti sabaagi laang montok monguhup di tongo’ tulun kampung tokou id ahal kopongindopuan diolo’, om lobi ogumu’ po bohogian i pikiikiro do rumikot papaharo abaabayan hilo’,” ka disio kaagu.

Titungkap tusin kigatang lobi RM9000 pikiiiro do magandad di tongo’ tutumanud ngaawi’ om kikosiwatan po nogi’ yolo’ do kalantoi tikit kinasip.

Yuran kotonudan montok koduo-duo bohogian koonduan om kusai poingukab nopo nga’ RM120, naamot RM110 montok koonduan om kusai Veteran. Kopomorosjitoran kotonudan id tongkusan dilo’ pikiikiro do maan sompono’ ontok ko’ 20tw Kawalu 2017.

Oinsanan tutumanud pikiikiro do kaanu T-shirt, medal sabaagi finisher, Race Bib, Timing Wrist Tag, kosiwatan do tumanud Lucky Draw om kaanu E-certificate.

Montok kointalangan tumilombus toi ko’ poguhatan id kokomoi do abaabayan dilo’ milo do rumomut dio Hellena (017-801-7075) toi i Roger (019-532- 6399), toi ko’ milo do rumomut diolo’ maya’ laman facebook.com/caserosabah.-

   
Email Print
   
 
 
E-browse