Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Spektra Selasih terbit karya sulung, 'Jibam' |  TRUMS anjur Program Kepimpinan Global |  Perayaan Krismas KK bermula kelmarin hingga Khamis |  43 keluarga Kampung Bomboi terima bantuan tangki air |  Pekerja ladang didenda RM20 ribu, cuba sogok penguat kuasa |  Hampir 3,000 penyata GST-03 belum diserah |  Empat pemancing diselamatkan APMM selepas 20 jam hanyut |  Keningau maintain charge |  KK exponents dominate karate |  Zachary wins third archery gold |  ONCAMPUS Hull offers pathway to higher education |  Young foreigner jailed for possessing other’s MyKad |  Cabbies and e-hailing service drivers unaware of scheme |  Pray for a better and safer KK, SCC president Bishop Melter asks Christians |  YES contributes RM150,000 towards KK Christmas carnival | 
 Kadazan Dusun

Pisokodungan KTRS om duo tadika id koponudukan tenis nokosigampot limo toun

17th June, 2017

Di ROZZALIN HASHIM rozzalin@newsabahtimes.com.my

SANDAKAN: Piromutan tosonong id pialatan Kelab Tenis Remaja Sandakan (KTRS) om duo tadika id watas diti i pinopointutun d sipoot tenis kumaa tangaanak tadika kiumur onom toun, do babaino’ nokosigampot nodii do kumolimo toun.

“KTRS ounsikou kopio kokito ogumu’ tangaanak tadika i minumbal do sipoot diti,” ka di Porosidin KTRS i Taren Sunil Manoharan i nokotindapou doid kinopoimpuunan poinbida’ ababayan 2017 doid Syn Hua Kindergarten, doros hiti di konihab.

Pinointalang disio do pingludaan (kolinik) aiso’ kabayar montok toun diti nokointonod nodi wulan Koduo nga’ pinotohuri o kopoimaganan pinsingilaan sipoot tenis doid ngoduuduo tadika dilo’, Syn Hua om Pui Gin.

Pinosotol di Taren Sunil do kinalataion ababayan dilo’ mantad no do sokodung ouli’ mantad mononorina’, sitaf om tongo’ mongiingia’ doid ngoduuduo tadika nokomoi.

Pinointalang po nogi’ disio do kinopinsingilaan sipoot tenis di nokotimpuun doid Syn Hua di toun 2012 montok onom wulan, i nokounsub do tongo’ kororohian tangaanak om potilombus dino sinowoli do Akademi Tenis Remaja Manoharan (MJTA) do talib dilo’.

Ka disio, nosusuhut di kinoporojistoran do MJTA sabaagi unit moomoluda’ mantad KTRS, ababayan dilo’ pinoindalan nogi’ doid Tadika Pui Gin di toun 2014.

Minoboros po nogi’ isio do bohogian disio popoindalan pingludaan sipoot tenis di otootopot kikoundaran kumaa di tongo’ tutumanud.

Pinopoilo po nogi’ isio do KTRS aiso’ angkab do mongontok yuran id pinsingilaan dilo’.

Poingkuro po minamason isio di tongo’ molohing i orohian kopinsingilo o tanak diolo’ do sipoot nokomoi, kasaga’ poporojistor pinsingilaan i bayaran poindalanon do KTRS id Kompleks Sipoot Sandakan.

Id kinopoimaganan i pinoindalan do sopisuai doid duo tadika dilo’ i naampai po nogi’ di Monunurat i Jocelyn Lee om duo moomoluda’ pinapatahak do setifikit kopongunsikohan kumaa Molohingon Mongiingia’ Syn Hua i Sim Yit Choo om i Molohingon Mongiingia’ Pui gin i Yapp Chun Lan.

KTRS nga’ pinopointutun po nogi’ do sipoot tenis maya’ kinopongukaban kelas impuunon aiso’ kabayar montok komulakan kusai doid St. Mary Hostel, do hiti.

Mongunsub po nogi’ o KTRS di toinsanan molohing do papatanud di tanak diolo’ id pialaan tinimungan mogisuai nayatan umur i poonjuron doid poliliput Sabah.

“Kelab diti monguhup do molohing poporojistor tanak diolo’ tumanud pialaan atantu’,” ka disio i lumansan do lobi kogumu’ mamamain tenis i aanu mongimbulai.

   
Email Print
   
 
 
E-browse