Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Io’ Keewon dii Carl mongunsikou nakaanu kosiwatan |  Keewon dan Carl syukuri peluang persembahan di Mrs Borneo Queen 2018 |  Keningau tuan rumah pelancaran Kaamatan Peringkat Negeri: Pairin |  Graduan UMSKAL johan Pertandingan Pidato 1Malaysia |  TLDM anjur Program Interaksi sempena Hari Ulang Tahun ke-84 |  Bayi baru lahir ditemukan di pintu pagar masjid |  APMM pintas 12 PATI di perairan Kinabutan |  Mansuh GST akan buat defisit fiskal meningkat: Madius |  Rozman yakin BN Labuan kekalkan momentum menangi PRU14 |  Mahkamah tolak saman minta PM bentang persempadanan semula di Sabah |  Najib peraku hak Sabah dilaksanakan, kata Zahid |  BN akan terus bangunkan Sabah dan Sarawak |  Kedah unseat Junior Rhinos |  Setback for Sabah Rhinos |  K2 and Tritonic for Borneo Marathon | 
 Kadazan Dusun

RELA Sabah pinapaanjur ababayan kopongunsuban id Masjid Ubudiyyah Tamparuli

15th June, 2017

Di JOANES ROBERT JOHNNY joanes@newsabahtimes.com.my

TAMPARULI: Id kopihondot wulan Ramadhan Al Mubarak, Koupisan Sukarelawan Malaysia (RELA) Pogun Sabah pinapaharo Abaabayan Kopongunsuban Nilai-Nilai Murni doid Masjid Ubudiyyah, Kakadaiyan Tamparuli, hiti di kawaawagu diti.

Abaabayan dino’ i pinotimpuun mantad kosuabon po dilo’ tinindapou di kiikiro 300 puru’ RELA om mogiigiyon nokoiyonon om piipiro lalansanon ugama’ id watas nokomoi.

Minoimagon abaabayan dilo’ nopo nga’ i Lalansanon Kopotundaan Mogiigiyon (PPM) Tamparuli, i po nogi’ Luguan Bohogian Parti Bersatu Sabah (PBS) Tamparuli, i Datuk Jahid Jahim.

Minoboros ontok minoimagon abaabayan nokomoi, alansan po nogi’ i Jahid do abaabayan miagal dilo’ anu do tilombuson ontok timpu gulu om kosudong montok posilihon sabaagi iso’ abaabayan poinbida’ ontok monikid timpu wulan Ramadhan.

Minongunsikou om minamarayou po nogi’ isio kuminaa bohogian mangaanganjur tu’ nokosorou do pinapaharo abaabayan tosonong miagal dilo’.

“Alansan da do maya’ abaabayan miagal diti kaanu do monginggirot piromutan tokou tiso’ om tiso’,” ka disio kaagu. Kohondot dilo’ ka disio, pisompuruan rayat orurukut tinaru om ugama’ diti kiguno gompion montok monilombus do piuludan.

“Kotoronongon om pouludan i haro do solinaid diti oinraagan nung amu’ no pinggisaman do momogompi’. Potilombus dino, minamason isio mooi do wulan Ramadhan diti pongonuan kosiwatan montok monginggirot pisompuruan om mongilag do pioduhan montok no do kopongimbulaian koburuon di pointopot.

Id poompus do ramai dilo’, pinoindalan po nogi’ ponontudukan ugama’ toi panambarasan tazkirah Ramadhan, naamot do magandad timpu sungkai, om abaabayan mogonsok bubur lambuk mantad di tongo’ puru’ RELA. Nokotindapou po nogi’ io Kumoduo Luguan Potunud Kotorinaan RELA Malaysia, i TKPJR Hashim Shikh Ab Kadir, om i Potunud RELA Pogun Sabah, TPJR Mohammad Pauzi Jhumat.

Id saalom do koyuon kounsikahan, kataadan om kabarakatan do wulan Ramadhan, abaabayan dilo’ pinowotik po nogi’ miampai kinopomoromitanan kouhupan om toluod kuminaa di tongo’ tinimungan tulun i amu’ songkuro osonong kononosipan montok posodia’an id kopihondot Syawal i pikiikiro doti do rumikot.

Wokon mantad ponuangan id poompus abaabayan dilo’ nopo nga’ kinopotikidan kiginumu’ 1500 bubur lambuk kuminaa oinsanan mogiigiyon nokoiyonon i pinosodia’ di tongo’ puru’ RELA watas Tuaran.

Suai mantad dilo’, io Jahid, i TKPJR Hashim om i TPJR Mohammad Pauji minanahak po nogi’ toluod kuminaa di soginumu’ 30 tulun puru’ RELA om tinimungan asnaf.

Pinopotikid po nogi’ yolo’ takanon bubur lambuk kuminaa mogiigiyon nokoiyonon kaampai po nogi’ tongo’ tulun ginumuan i tuminombului doid pasar Kakadaiyan Tamparuli.

   
Email Print
   
 
 
E-browse