Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
PBS minonoodo luputan pulis kogompit totondos huminabus BN |  Poinsanganu himo pindulu poimpasi, duvo PATI tinaan do ESScom |  Dua warga asing ditahan bawa lima peluru hidup |  RM30 ribu peruntukan pengelolaan program Rela |  Umno bahagian Semporna tidak gentar hadapi persaingan, kata Nasir |  Rozman dicalon semula pertahan kerusi Labuan |  Pelbagai aktiviti kebudayaan Murut pada Pesta Kalimaran akan datang |  Malaysia-Singapore ‘Shinkansen’ possibility excites world rail body |  Hat-trick by Universiti Malaysia Sabah |  Count Back win for Ana-Thomas |  Great escape by U-19 squad |  Foreign duo detained for possessing live ammunition |  Perodua Alza burnt after rear-end collision |  Hemophilia: Be discerning with Internet medical advice |  Masidi: Military tourism next for KK | 
 Kadazan Dusun

Ababayan ‘turun padang’ lalansanon koposindak kotumbayaan rayat

21st April, 2017

TAMPARULI: Ababayan mindahu’ toi ‘turun padang’ di tongo’ lalansanon kaampai no lalansanon takawas pogun koposindak do kotumbayaan rayat kumaa koporintaan.

I Ponorikohon Bohogian Parti Bersatu Rakyat Sabah (PBRS) Tamparuli Handry Luaran minoboros, maya’ ababayan miagal dilo’ do aanu mongimbulai iso’ piromutan oronit id pialatan rayat om lalansanon.

Minongomi kinotombuluyan di Boyoon Montiri Datuk Seri Musa Aman do hiti kopihondot ababayan Roadshow Yayasan Sabah id Lintuhun Mogiigiyon Tun Hamdan di kaawagu diti, minoboros isio do agayo ponongkounsikohan do puru PBRS om komponen Barisan Nasional (BN) do hiti om Kiulu di kinotombuluyan dilo’.

“Kinotombuluyan di Boyoon Montiri kaagal do minogowit binabang di wagu montok mogiigiyon kosuul no id watas Lintuhun Koundangan Pogun (DUN) Tamparuli tu’ babaino’ diti noobian do pembangkang,” ka disio id iso’ kopointalangan.

Kalansanan po nogi’ disio do kapanahak i Boyoon Montiri do kopomodulianan poinbida’ kumaa DUN Tamparuli diti loolobi no id sunduk kopotundaan mooi do kotopong di DUN ngaawi’ di suai.

Kokomoi do ababayan pinoindalan do Yayasan Sabah dilo, ka di Handry nakapanahak ilo’ do kosiwatan kumaa rayat do monongkiruba’ di tongo’ lalansanon takawas BN om koporintaan.

Maya’ po nogi’ do ababayan dilo’ ak disio, rayat loolobi no id DUN Tamparuli nokopokinongou sondiri’ di kopointalangan kapaampai do tongo’ ahal doun kaawagu i tomod-tomodon di bohogian angatantu’ do popoinsala’ montok momurilong do rayat.

Potilombus dino nunsub disio toinsanan rayat do hiti popohunung kinosilapan diolo’ di ontok pinomilian tagayo pogun di pogulu diti.

“Lumansan o PBRS Tamparuli do ahal di notoliban dilo’ onuon di mogiigiyon om mongungundi’ sabaagi ponontudukan om amu’ popowonsoi dlo’ id pomilian tagayo pogun diti obontol,” ka disio pinoposotol.

Ka disio, kalansanan po nogi’ do PBRS kinopointalangan po’ompus do koporintaan loolobi no i Boyoon Montiri di maso id pitimbungakan Lintuhun Koundangan Pogun kokomoi mogisusuai ahal wookon dilo’ GST om kopohompit do tongo’ kotinanan atantu’ amu’ maan populitiko’.

Sabalik dino ka disio, toinsanan bohogian kiguno mogisokodung popointalang doid rayat di koundaran mantad ababayan om katatapan ngaawi’ i poindalanon do koporintaan.

Jerayawara Yayasan Sabah i nokoindalan do hiti di kaawagu diti pinoimagon di Musa i po nogi’ Ponorikohon Kotinanan Mongingigit Tonggungan Yayasan Sabah.

Soginumu’ 52 pokiikitanan mantad mogisusuai koupisan om kotorinaan koporintaan, kotinanan pinsingilaan takawas koporintaan om poriwit, suai ko’ 20 mongungusaha’ sinuusulap.

Wookon di pinoindalan kaampai no pituubungan poingukab do JobsMalaysia, karnival palajaran, Seminar Skor A+, pokiikitanan karaja’ om nogi’ kaunseling palajaran.

   
Email Print
   
 
 
E-browse