Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
C130 Hercules tuminubpo do aabpo notoguvang miampai professional, nakatanud SOP |  Kekerapan latihan bolehkan pesawat C130H mendarat dengan selamat |  900 kanak-kanak dirai dalam majlis Mini Konvokesyen 2017 |  Brunei cyclists dominate Century Race |  Ibrahim grinds his way to snooker crown |  Hit and run: Police on manhunt for reckless driver |  Two killed, three injured in two separate accidents |  130 graduates receive scrolls at 4th SIDMA Convocation |  American crowned Miss Scuba International 2017 |  Program pemuliharaan marin, didik m'rakat tentang alam sekitar |  USIA terus perhebat gerakan dakwah |  Muis dan Jheains kerjasama dengan Jakim majukan pusat latihan Jakim di Sabah |  Lapangan Terbang Labuan dibuka semula |  Ocean heroes spreading marine awareness |  Women entrepreneurs urged to use social media | 
 Kadazan Dusun

Pakalaja ngaavi polinta mositi misokodung om kigompitan do papapanau kotoinaan: Radin

21st April, 2017

Di MARUTIN ANSIUNG

TENOM: Pakalaja polinta ngaavi id sangavian koupisan om oginsi kopolintaan, kaampai do kounsol uvang ngaavi id Sabah, nunsub mooi do tomoimo misokodung om kigompitan montok papapanau kotoinaan dioho montok kahantazan doid mogisuusuvai abaabazan kotundaan i poonjulon do kopolintaan.

Minoboos i Montili Kotundaan Habus Kakadazan Sabah, Datuk Seri Panglima Radin Malleh do Integriti di tapantod om nogi pilotian di takavas id tatanga do pakalaja ngaavi polinta nga kiguno nogi montok popoimbuhai kotoinaan di tavasi kozo om kivaa kualiti.

“Osoou ku boos ngaavi di Mahatma Gandhi, iho nopo nga “you must do your work with joy, otherwise you don’t do it at all”, biho dodizon tiuvan do pakalaja ngaavi polinta montok papapanau tonggungan tososondii.

“Nung opusou tokou, kigompitan om kivaa kopiumanan kitonggungan di takavas, pointantu no do kaanu papapanau kalaja dino miampai poimponu ginavo om nogi ounsikou tumoina montok manakadai do tuhun ginumuan.

“Poingkuo po, sokio nung au tokou kopiuman do ouhan ginavo om kikoimaan negative ontok suuon montok monoodo nunu noopo kalaja dino, pointantu no do obohingkang tokou monoodo dino om asil kalaj diho nga au kadampot kualiti miaga di kahansanan, om kountazag kredibiliti om kualiti kotoinaan do kotinanan nokomoi.

“Miaga toi do nung songuhun mongingimuau dino do kikopiumanan do toguvangon diho kiguno montok kaandangan do tuhun ginumuan, pointantu no do kigompitan zioho om ounsikou pakalaja mamaakas hivang dino, poingkuo po nung au zioho opusou om nogi kikoimaan au poduli miampai tonggungan dau diho, pointantu no hivang nokomoi do azamut om au kopontob ginavo do tuhun ginumuan,” ka disido.

Noboos disido iti di ontok pinopohombus pason pinopoimagon do Abaabazan Pitongkizadan di Robert Malangkig, bagas Upisol Eksekutif Kounsol Uvang Tenom i minundahiu kuminaa Kounsol Uvang Kota Marudu, om i Petrocelli Joseph, bagas Injiniol do Koupisan Kalaja Tagazo (JKR) Tenom, i minundahiu kuminaa Hongkod Upis JKR Kota Kinbalu, nazu do Kounsol Uvang Tenom, id Hintuun Datuk Seri Panglima Antenom, doiti di tadau Koiso nakatahib.

Abaabazai diho nga nazu nogi montok manaandak kinoikatan di Jaiping Minsu, Upisol Eksekutig kavvagu do Kounsol Uvang Tenom om i Nelson George, Injiniol JKR Tenom, Dody Jude Anthony, Injiniol Koupisan Vaig Tenom om i Robert Gampawi, Injiniol Koupisan Pomuvaigan om Huzungon (JPS) Tenom.

Tuminoina i Robert Malangkig sabaagi Upisol Eksekutig Kounsol Uvang Tenom sohinaid tohu toun tohu vuhan, naamot di suminovohi disido, Jaiping nopo nga Upisol Eksekutif Kounsol Uvang Kota Marudu, mantad po di toun 2011.

Radin, isido ponogi i Puu Hintuun Koundangan Pogun (Adun) Malalap, minoboos do piohonan upisol ngaavi polinta i nadadi koubasanan toomod id sistom pentadbiran kopolintaa nopo nga au kountazag do pisokodungan om pionitan di poinsandad id tatanga do pakakalaja polinta nokomoi.

Minoboos vagu isido do kobuuon id iso uvang dino momoguno pisokodungan di tavasi om pilotian di tapantod id tatanga do koupisan ngaavi kopolintaan.

Miampai aiso pisokodungan om pilotian, pointantu no do obuihit montok upisol uvang i ponogi Poniikon Kounsol Uvang montok monguhud do uvang ngaavi dino, ka disido.

naamot diho, minoboos i Upisol Eksekutif Kounsol Uvang Tenom, Jaiping, do duvo undovoon tagazo di onuan ponotohan montok popoingkavas kahantazan tavasi do kotoinaan Kounsol Uvang Tenom nopo nga popoingkavas pomuuvan sukai id kinoizonon ngaavi oontok sukai do Kounsol Uvang, om nogi monguhan kobohingkaangan ngaavi kogompit kinoizonon hivang pataaman sizamut id uvang Tenom.

Potindapou nogi id abaabazan diho i Upisol Uvang Tenom i Madiyem Layapan, Buuan Kotundaan Mogiigizon (PPM) Melalap, Simon Mamat, Buuan Kotundaan Mogiigizon Kemabong i Sukimin Rukini, Upisol Uvang Nabawan i Fredian Gan, panakadai upisol ngavi uvang Tenom om Kemabong i Kassim Yunus om Jasli Tindi, Clarence Puin Pinduruh, Datin Angeline Tom, upisol om pakalaja ngaavi om nogi Puu Kounsol Uvang Tenom, huguan ngaavi koupisan om buuan ngaavi mogiigizon posoihi Tenom.

   
Email Print
   
 
 
E-browse