Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Ramai Magahau Zon Semenanjung nakaanu raramit di kounsub |  Kopomiaraan paha’ tantadan kopongingkawas nindopuan mogiigiyon labus kakadayan |  Makanan tradisi cermin identiti, kata Henry |  Zarondin: Sempadan perairan negara sentiasa diawasi |  Program Tugu Budaya Etnik Sabah dinaiktaraf |  International debut for Sabah gymnasts |  World Heart Day 12.5KM Charity Run on Oct 8 |  Over 1,800 to ‘Run For Peace’ in Sandakan |  Magahau festival well received in west Malaysia |  PCA hopes to get new building to meet service expansions |  Missing raw ingredients threaten local food preps |  Tun Juhar pays visit to Danawan Island ops base |  Sambutan Aidilfitri SK Sungai Lada meriah |  Penunggang motosikal maut dalam kemalangan |  PAS Sabah gesa kerajaan henti perkhidmatan syarikat urus bekalan elektrik kontrak di tiga kampung | 
 Kadazan Dusun

Piromutan sosiol kapabanta’ do mahasiswa, mahasiswi kopooposion di otopot

18th March, 2017

SANDAKAN: Piromutan sosiol osuul montok manahak kapabantaan om koponuridongan do kinoulunan di tongo’ mahasiswa om mahasiswi sabaagi iso’ mantad komilaan ‘soft skill’ i kiguno songonuon diolo’.

I Kumoduo Boyoon Montiri Sabah Datuk Seri Raymond Tan Shu Kiah, minoboros do ilo’ nopo nga’ sabab no do mahasiswa om mahasiswi kiguno pabantaan di koyuon suang mogiigiyon mooi do otootopot diolo’ do karati komoyon koposion om okon ko’ ou’ung di pambalajaran id kampus.

I Raymond minoboros dilo’ id teks booboroson disio i binasa’ di Ponorikohon Alumni Sikul Anglikan Sandakan, Henley Liew di maso pinopoimagon do Ngabas Borneo 2017, id Lintuhun Balairaya Rumah Murah Kampung Sim-Sim do hiti di kaawagu diti.

Ka disio, iso’ mantad rikoton do ‘falsafah’ palajaran pogun nopo nga’ montok monuridong susumikul sabaagi tulun di miadas om oulud.

“Yolo’ nopo nga’ posunduran tosuul do pogun om kiguno onuan kapangahakan, kopontudukan om kopurimanan montok papasaga’ diolo’ sumili tulun di kinimbulayan om kitonggungan kumaa tinaru, ugama’ nogi’ pogun,” ka disio.

Minoboros isio do mogiigiyon kampung di ogirot doid kopomogunaan, adat om koubasanan miagal do mogipapantang, mogitatabang, mogitotombului om toririmo poposuul sunduan piobpinoian nopo nga’ koyuon tosonong i kiguno pasarabakon kumaa doid mahasiswa om mahasiswi.

“Koyuon osonong dilo’ kiguno potonomon id ginawo diolo’ mooi do koinsanai sakag tokou pasanganu pogoyuon om kinoulunan di osonong,” ka disio i minoboros do mantad po nogi dilo’ do rikoton mongimbulai ‘modal insan’ di kitoilaan om kosili ombitanan mogiigiyon aanu monigampot.

Nokopogulu, Ngabas Borneo 2017 onjuran do Univositi Multimedia Melaka (MMU) i pinopiamung do ababayan ponokopaganakan om bingkil monuduk tangaanak mogiigiyon minomili’ do Kampung Sim-Sim sabaagi kinoiyonon diolo’.

Ababayan sominggu’ dilo’ natanud di 25 susumikul, tinanud di tolu sitaf MMU kaampai no i Potunud Totuo, Bohogian Ahal Susumikul MMU i Zamzuri Abd Majid, Potunud Ababayan i Mohd Aiman Faiz om mongongobi’ mantad Ahal Susumikul MMU i Fazli Sharil.

Suai ko ilo’, siam paganakan id Kampung Sim-Sim minaganu do ponokotanak kapaampai di tongo’ susumikul i tuminanud do ababayan nokomoi.

Mogisusuai ababayan pinoindalan po’ompus sominggu dilo’ kaampai no tuminakad do Nulu Sim-Sim, bingkil kopongunsuban miampai komulakan, kinotombuluyan doid Longkod Koponondulian Gompi’ Urang Utan Sepilok om pinitabangan miampai mogiigiyon kampung.

Naamot i Zamzuri doid booboroson disio pinopointalang do ababayan po nogi dilo’ nga’ montok poposuni sunduan sukarelawan di tongo’ susumikul om manahak kotorinaan kumaa mogiigiyon.

Kohondot dilo’, kalansanan nakaanu yolo’ do nawaawaya’an om pininsingilaan po’ompus do ababayan diti, ka disio. Minonongkounsikou po nogi’ isio kuminaa mogiigiyon Kampung Sim-Sim i minanahak sokodung diolo’ pinapalantoi kinopoindalanan ababayan nokomoi.

   
Email Print
   
 
 
E-browse