Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Fiesta Sehati RTM berlangsung pada 24 dan 25 Februari ini |  Hamidah Juara Pertandingan Akhir Radio Ok SandakanFm |  MQuit Masjid, program khas galak imam dan qariah bebas rokok |  Program Geografi UMS laksana CSR di Tamparuli |  Lelaki maut tertembak ketika memburu di ladang |  Kempen kesedaran merokok rangsang pengurangan perokok muda: Ismail |  Guru maut pertembungan dua kereta pacuan empat roda |  Pegawai Jabatan Air Negeri Sabah dibicara serentak |  Malam Santai Karyawan Seni berjaya himpun karyawan aktif |  MKN Sabah hantar balik 3,036 PATI sejak Januari |  Sabah sudah terima RM3.87b pelan pusingan ketiga RMK11 |  Jelius tinkers on winning strategy |  NCID seize 660gm syabu, two suspects arrested |  Water Dept scandal – March 20 decision on revisions |  One in five M’sians still lights up | 
 EDUCATION

Upisol Pionitan mositi kumalaja tavavakas montok kahantazan do poingkakaton BN: Ewon

14th March, 2017

RANAU: Sinuu di Puu Parlimen Ranau, Datuk Dr Ewon Ebin o upisol ngaavi pionitan i dinadi do Upis Parlimen Ranau, mooi do kumalaja tavavakas montok mongiho kozo kahantazan poingkakaton do Barisan Nasional (BN) id pomihian tagazo mikot.

Noboos disido iti di ontok pinopohombus pason id abaabazan kapataakan suat toi watikah pamadadizan kuminaa doid 18 truhun Upisol Pionitan Parlimen id Hinimput Pitimbungakan Upis Parlimen Ranau, do doiti.

Tumanud di Ewon, kalaja tagazo sabaagi upisol pionitan, nopo nga montok monginsomok do layat id kinoizonon tososondii montok kaanuan kopoihaan ngaavi kiguno hobi no kokomoi ahal ngaavi di kaanu momiumbak sokodung dioho kumaa kopolintaan.

Ka disido, ahal ngaavi miaga do koinsavaton gatang bakaang, gatang tumau om nogi sukai bakaang om kotoinaan (GST) nopo nga ahal ngaavi koiso i tomoimo poimbuhazon om mositi onuan pomuginavaan poimponu montok mogium lahan do monguhan dino.

Montok tuduvan diti ka disido, songuhun upisol pionitan mositi kivaa toihaan di tahaab om nogi kikomauan montok popointahang nookuo o gatang bakaang dino do nokotoguvang kinoinsavaton om nogi kaanu popointahang kokomoi kavasian pomogunaan do GST kumaa layat.

Tumanud disido, papabaahing i tomoimo gunoon do boogizan gugumaga popoimbuhai ahal ngaavi diho kaanu papasabap sokodung do layat kumaa kopolintaan do koingkudi nung au tokou mindau id gana montok popointahang koozuvo di totopot, ka disido.

“Dadi ontok minduduuk pomihian tagazo do mikot, mositi tokou kumalaja tavavakas mantad baino tumihombus popovokis totondos ngaavi boogizan havan i baino maso kozo opulokis popotimpuun kimpin miampai aiso gontob, kaampai no papasasad mogisuusuvai batos toomis i izioho sondii nga nokoiho do au kaanu monuhuk dino.

“Sundung tu au tokou noihaan songian o pomihian tagazo do kaanjul om nokoiho tokou do BN di totopot diho kakaal avakas id Ranau, nga ada tokou no oindamaan do ahansan om au momohizo, mositi tokou do tomoimo potopunda id nunu noopo koozuvo om nogi opoi mindau id gana, miaga kozo do pomihian tagazo diho kaanjul do suab,” ka disido.

Di poguhui diho, id pason di Upisol Poimbida Parlimen Ranau, i Japirin Sahadi, minoboos do kapamadadizan upisol ngaavi pionitan diho nopo nga tinuidong montok manakadai do Puu Parlimen diho sondii montok kimpin om otihobus do kahantazan id pomohian tagazo di tiinu.

Ka di disido, montok mamantod po vagu vinakas tinimungan upisol pionitan nokomoi, minomohoou o Upis Parlimen Ranau do koupisan kopolintaan om oginsi kopolintaan do suvai, miaga do Kotinanan Pomounan Gata Sbah (LIGS), Sabah Electricity Sdn Bhd (SESB), Koupisan Vaig om suvai po dino do manaak kopointahangan sabaagi toihaan impoon dioho montok tumoguvang do miampai layat.

Tumanud di Japirin, pangan kopointahgan miaga diho potihombuson id tikid timpu montok papavakas po vagu toihaan om koimauan do upisol ngaavi montok tumoguvang miampai layat id kinoizonon tososondii montok popointahang impoon ngaavi di kiguno do polinta.

Potindapou nogi ontok diho i Huguan Upisol Pionitan Parlimen Ranau i Johnny Samin, Huguan Tinimungan Komuhakan UPKO Nasional i Arthur Sen, Kumoduvo Huguan Tinimungan UPKO Ranau i Alyiu Zinin om i Monunuat Kalaja UPKO Ranau, i Dallius Ubin. –Di JIMMY AKAU

   
Email Print
   
 
 
E-browse