Fb
Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
PPM Tawau minomogundop ponginaman mogohimu 50 tuung gas om 15 kutak tumau pagansak |  315 Pengakap Kanak-kanak Sabah Pramuka sertai Perkhemahan Pek Bercuti |  AADK Sandakan teruskan kempen Perangi Dadah Habis-habisan |  UMS akan bina 10 rumah komuniti di Tawau |  Lebih 5,000 mahasiswa UMS terima konvokesyen bermula 18 November ini |  Mahkamah Jenayah Seksual kanak-kanak bakal beroperasi di Sabah tahun depan |  Lebih 10 buah rumah di Labuan rosak akibat angin kencang |  AmGeneral Insurance announces its latest coverage package |  Kids from six countries to compete in Hot Wheels contest |  Ex-Sabah footballers for Quadrangular Tournament |  Chinese consulate warns nationals of scams |  Suspect in fictitious project has police records |  Flood victims from 12 KB villages evacuated |  DBKK pledges corruption-free |  Govt keeping close tabs on worsening weather | 
 Kadazan Dusun

SK Tumunda Salimandut nokotoguang kobolingkahangan noowit do liyud

Banjir

20th January, 2017

Di JOANES ROBERT JOHNNY joanes@newsabahtimes.com.my

KOTA MARUDU: Nosusuhut do kinaantakan liyud gaagama’ rasam po’ompus id kogumuan kinoiyonon doid ponong kabaatan Sabah di tadau Kotolu katatalib, piipiro sikul doid kinoiyonon dilo’ nokotoguang kobolingkahangan. Songinan mantad sikul nadalaan nopo nga’ Sikul Kabansaan (SK) Tumunda Salimandut, Kota Marudu kiikiro 16 kilometer mantad kakadayan diti.

Liyud dilo’ nokoowit do burutak id poliliput luan sikul om nakaraag nogi’ do kakamot mongia’ id sikul nokomoi, suai ko’ ogumu’ susumikul i amu’ nokoongoi sikul.

Songulun mongiingia’ i Phauline Philip, minoboros oruol kopio ginawo dau kokito di burutak akapal om kinaraagon gaagama’ do liyud.

“Isai amu’ oruol ginawo soira’ do kokitom koyuon miagal diti, okito po nogi’ dahai id turos di tongo’ suusumikul nga’ nokotigog, nga’ pounsikou no tu’ haro piipiro tulun komolohingan i opoduli’ i nokorikot do minongoi ponguhup dahai kaampai po nogi’ piipiro suusumikul i nokorikot id sikul,” ka disio kuminaa New Sabah Times.

Phauline i po nogi’ mongingia’ Bahasa Inggeris, Bahasa Melayu, Pendidikan Seni Visual (PSV) om Pendidikan Kesenian id sikul dilo’, pinopoilo do, kogumuan suusumikul amu’ nakaanu do rumikot sabap koyuon modliyud id kinoiyonon diolo’ sompopori, om id pisuk disio sondiri’ haro apat tulun suusumikul no i nakaanu do ruminikot.

“Miampai di apat tulun suusumikul id Tahun 5 Bijak minogiuhup-uhup yahai di do minomorisi’ pisuk dahai miampai minagangkat waig mantad iso’ bawang tokoro’ id dodoros sikul suai mantad minomoguno kakamot pomorisian suai.

“Bohogian Koupisan Bomba om Mananampasi nga’ amu’ nogi’ kaanu do rumikot tu’ nakaanu yahai kointalangan do yolo’ nga’ hilo’ po id watas suai minongoi panampasi di tongo’ mansa’ liyud,” ka disio.

Id timpu kinoposuratan habar diti om id koyuon do moris poris, karaja’ pomorisian watas sikul dilo’ kakal po do pinoindalan di bohogian sikul kaampai po nogi’ piipiro komolohingan om mogiigiyon i ongopoduli’.

Naamot dilo’, i Molohingon Sikul SK Tumunda Salimandut, i Amiruddin Abdullah, minoboros do, somimang do watas sikul nopo dilo’ nga’ asaru’ nogi’ do oliyudan nga’ baino’ no i bobos nakadadala’ i nokoumbal do nosiliu gisom do ogumu’ kinaraagan.

“Wokon mantad i nongogompitan naraag nopo nga’ piipiro kakamot Pendidikan Jasmani (PJ), Reka Bentuk om Teknologi (RBT) om Kakamot Monguhup Mangajar (BBM) suai id suang pisuk, ilo’ kaampai po nogi’ buuk teks, meja om tingkohonon.

Tumanud di Amiruddin, sikul kakal po do ukabon miagal toririmo, nga’ amu’ po milo do popoindalan abaabayan pambalajaran (PdPc) sabap tu’ ogumu’ tomod suusumikul i amu’ nokorikot id sikul sabap do kinaantakan modliud dilo’ id hombo id watas kinoiyonon suusumikul sompopori nga’ nongogompitan.

“Iri no tu’, koinsanai suusumikul i nokorikot naalap tokou do miniampai do momorisi’ watas sikul om pisuk balajar sompopori,” ka disio pinopointalang.

Montok dilo’, minongunsikou isio kuminaa kouhupan koinsanai bohogian kaampai no di tongo’ komolohingan, mongingia’ om suusumikul i nakaampai doid saalom karaja’ pomorisian dilo’ di konihab.

“Pounsikou kumaa di nubasanan sopiuhup-uhup i pinokito di tongo’ bohogian di nakaampai, alansan da do otilombus no da sunduan miagal dilo’ sogigisom,” ka disio kaagu.

Montok rekod, SK Tumunda Salimandut nopo babaino’ diti kiharo soginumu’ 357 tulun suusumikul, 32 tulun mongingia’ om limo puru’ pakakaraja’ momuburu’ (AKP).

Nakaampai po nogi’ do minongoi solowot sikul dilo’ di konihab io Luguan Mongunguhup Kaganaan Kotorinaan Akademik Koupisan Balajaran Pogun Sabah, i Muddin Beting om i Mongingigit Karaja’ Upisor Balajaran Watas Kota Marudu, i Abdul Rahim Tapah.

   
Email Print
   
 
 
E-browse