|
14th August, 2007
RANAU: I Montiri Kopotundaan Pomorunan Datuk Dr Ewon Ebin minongunsub di mongingia’, molohing om susuimkul do mogisosokodung doid nunu nopo kaganaan om koyuon montok monokodung angkab di Luguan Montiri (Datuk Seri Abdullah Ahmad Badawi) do mongimbulai tulun di kinaangayan tosonong.
Ka disio, nung aiso’ o pisokodungan di toinsanan bohogian dilo’, tantu’ no do amu’ osigampot o angkab do poposili rayat om pogun diti do Kikalantaion, Kibantug om Ointutunan (Cemerlang, Gemilang, Terbilang).
“Kohondot dino, id nunu nopo ababayan toi kaganaan di maan pohoroo’ do bohogian sikul mositi’ no do sokodungon di molohing om susumikul ngaawi’,” ka disio do pinoposotol.
Minoboros isio dilo’ id Ramai Sipoot om Koubasanan Koisaan Molohing om Mongingia’ (PIBG) Zon Gara doid Sikul Mananga’ Kabansaan (SMK) Timbua doros hiti di kawawagu.
Nokotindapou po nogi’ doid ababayan dilo’ i Molohingon SMK Timbua i Yahadi Yasili, Monunurat Pulitik Komontirian i Japirin Sahadi, Mongunguhup Upisor om Monorina’ Balajaran Watas Ranau i Mozainie Yukin om i Kamil Kasibun.
Potilombus dino i Ewon i po nogi’ pono ko tapa’ angkat do SMK Timbua pinapatahak do songinan komputer montok kogunaan sikul dilo’.
Suai mantad dilo’, pinopotunui po nogi’ isio do tutungkap kuminaa di susumikul osonong naangayan id pomorisaan Poniisan Mananga’ Tosiriba’ (PMR) om Setifikit Balajaran Malaysia (SPM) 2006 om tusin ponguhup di paganakan amu’ songkuro kosonong konosipan doid sikul nokomoi.
Kalansanan di Ewon do susumikul ngaawi’ doid watas dilo’ tumilombus popoinlipat pinogot do balajar mooi do kosigampot lobi kasawat naangayan id timpu dumontol.
“Balajaran po nogi’ i aanu silihon do impohon kumaa koponimbanan do koposion do somonu’,” ka disio do minamason.
Naamot dino, i Ponorikohon Manganganjur do ababayan dilo’ i po nogi’ Molohingon PIBG sikul nokomoi i Walimin Suruk pinopointalang do hontolon nopo do ababayan dilo’ nga’ manahak kosiwatan kumaa di mongingia’, molohing nogi’ mogigiyon posorili’ do mogiruruba’ om mogiolon-olon pomusarahan kokomoi mogisusuai ahal.
Suai mantad dilo’, ilo’ po nogi’ nga’ kalansanan do kopongimbulai tangabaa’ di wagu doid sipoot.
“Iti po nogi’ nga’ mongunsub nubasanan mimparagat id sipoot doid mogigiyon montok momogompi’ kolidasan tinan,” ka disio.
Id pialaan dilo’, tinimungan PIBG Sikul Kabansaan (SK) Timbua nokolimbou bontugan soira’ nokotimung do 173 mato id limo ababayan sipoot, ilo’ nopo nga’ kapaampai do mimbuul, sipak raga’, buul tapapon, merentas desa om sukaneka.
Suai mantad dilo’ duo ababayan koubasanan ilo’ nopo nga’ modsinding om nogugan i minongompot do sayau minaan pohoroo’.
Id tukad koduo noindikau do Tinimungan SK Tibabar i nokotimung do 126 mato, sinusuhut do PIBG SK Pinawantai id tukad kotolu miampai 113 mato di notimung.
Ababayan Sipoot om Koubasanan i po nogi’ ababayan i pohoroon do insan suang duo toun dilo’ nakapanau do tolu tdau om natanud di limo tinan sikul tosiriba’ ilo’ nopo nga’ SK Timbua, Tarawas, Tibabar, Togop Darat om Pinawantai.
SMK Timbua nopo nga’ i sosonginan no sikul mananga’ i nakatanud doid ababayan nokomoi.
|
